Luka 24 - Somi He Ɔ

Yesu sitemi

¹ Otsi ɔ kekleekle ligbi ɔ nɔ mɔtu mla a, yi ɔmɛ ba yɔkɔ ɔ he, nɛ a hɛɛ tsopa kɛ e he via nɛ a dla to ɔ kɛ ba.

² Nɛ a na kaa a kpɛne tɛ ɔ kɛ je yɔkɔ ɔ nya;

³ se benɛ a sɛ mi ɔ, a nɛ́ Mawetsɛ Yesu gbogboe ɔ.

⁴ Nɛ e ba mi kaa benɛ a pee yaa ngɛ enɛ ɔ he ɔ, oʼɛ, nyumuhi enyɔ nɛ wo tade klaiklai ba da a kasa nya.

⁵ Se benɛ a ngɛ gbeye yee nɛ a ma a hɛ̃ si ɔ, nyumu ɔmɛ de mɛ ke: “Mɛni he je nyɛ ngɛ hɛ kalɔ ɔ hlae ngɛ ni gbogboehi a kpɛti?

⁶ E be hiɛ ɔ, se mohu e te si! Nyɛ kai bɔ nɛ e de nyɛ benɛ e ngɛ Galilea a,

⁷ ke: ‘Ja a ngɔ Nɔmlɔ Bi ɔ ngɔ wo yayami peeli a dɛ mi, nɛ a sɛu lɛ, nɛ ligbi nɛ ji ligbi etɛ ɔ nɛ e te si ekohu.’ ”

⁸ Nɛ a kai e munyu ɔmɛ,

⁹ nɛ a kpale a se kɛ je yɔkɔ ɔ he, nɛ a ya sɛɛ ni nɛ ɔmɛ tsuo ha ni nyɔngma kɛ kake ɔ kɛ nihi nɛ piɛ ɔ.

¹⁰ Se Maria Magdalena kɛ Yohane kɛ Yakobo nyɛ Maria kɛ yihi nɛ piɛ a he ɔ ji nihi nɛ ba sɛɛ ni nɛ ɔmɛ ngɔ ha bɔfo ɔmɛ ɔ nɛ.

¹¹ Se kikɛmɛ a munyu nɛ ɔmɛ pee kaa nyazia ngɛ a tue mi, nɛ a he we yi.

¹² Se Petro te si nɛ e sa fo kɛ ya yɔkɔ ɔ he; nɛ benɛ e kɔkɔ e yi si nɛ e hyɛ mi ɔ e na kploba amɛ nɛ a pueɔ si ekpa ekpa. Nɛ e je lejɛ ɔ kɛ ho we mi ya, nɛ e nya kpɛ e he ngɛ nɔ nɛ ba a he.

Sislami kɛ Emao yami

¹³ Nɛ oʼɛ, jamɛ a ligbi ɔ nɔ nɔuu ɔ, a kpɛti ni enyɔ ngɔ pue nɔ kɛ yaa kɔpe ko nɛ kɛ Yerusalem kemi maa pee sitomi nya kpaago nɛ a tsɛɛ lɛ Emao ɔ mi.

¹⁴ Nɛ a ngɛ hihi nɛ ba amɛ kulaa a he ni sɛɛe ngɛ a kpɛti.

¹⁵ Nɛ e ba mi kaa benɛ a ngɛ ni ɔmɛ sɛɛe nɛ a ngɛ a he sanehi bie ɔ, Yesu nitsɛ ba na mɛ, nɛ e kɛ mɛ nyɛɛ.

¹⁶ Se a ha a hɛngmɛhi a nɔ nɛ a ko yo lɛ.

¹⁷ Nɛ Yesu bi mɛ ke: “Mɛni nyɛ ngɛ sɛɛe ngɛ blɔ ɔ nɔ ɔ?” Nɛ a da si kɛ a hɛ mi mɔbɔmɔbɔ.

¹⁸ Nɛ a ti nɔ kake nɛ a tsɛɛ lɛ Kleopa a ha heto nɛ e de lɛ ke: “Anɛ mo pɛ ji nibwɔ ngɛ Yerusalem nɛ li sanehi nɛ ba lejɛ ɔ ngɛ be nɛ ɔmɛ a mi ɔ lo?”

¹⁹ Nɛ e bi mɛ ke: “Mɛni sanehi?” Nɛ a de lɛ ke: “Yesu Nazareno ɔ nɛ ji gbalɔ nɛ ngɛ he wami ngɛ ni tsumi kɛ munyu tumi mi ngɛ Mawu kɛ ma a tsuo hɛ mi ɔ he sane ɔmɛ,

²⁰ kɛ bɔ nɛ wa osɔfo nikɔtɔma amɛ kɛ wa ma nikɔtɔma amɛ ngɔ lɛ ha nɛ a bu lɛ gbenɔ fɔ, nɛ a sɛu lɛ ɔ.

²¹ Se wɔɔ lɛɛ wa hɛ ngɛ nɔ kaa jinɛ lɛ ji nɔ nɛ ma kpɔ Israel ɔ nɛ; nɛ enɛ ɔ tsuo se ɔ, mwɔnɛ ji ligbi etɛ nɛ a pee ni nɛ ɔmɛ.

²² Se jeha nɛ ɔ wa ti yi komɛ hu ha wa nya kpɛ wa he, ejakaa a ya yɔkɔ ɔ he mla mi,

²³ nɛ benɛ a nɛ́ e gbogboe ɔ, a ba nɛ a ba de ke bɔfohi komɛ hu je a he kpo tsɔɔ mɛ nɛ a de ke e hɛ ngɛ.

²⁴ Nɛ nihi nɛ kɛ wɔ ngɛ ɔmɛ a ti ni komɛ ya yɔkɔ ɔ he, nɛ a ya na kaa bɔ nɛ yi ɔmɛ de ɔ nɔuu; se Yesu ɔ nɛ a nɛ.”

²⁵ Kɛkɛ nɛ Yesu de mɛ ke: “Oo kuasiahi nɛ nyɛ ngɛ siɔɔ ngɛ nyɛ tsui mi ngɛ nihi tsuo nɛ gbali ɔmɛ de ɔ hemi kɛ yemi he.

²⁶ Anɛ pi nɛ e sa kaa Kristo ɔ nɛ na amanehlu nɛ ɔmɛ konɛ e sɛ e nyami ɔ mi lo?”

²⁷ Nɛ e bɔni kɛ je Mose kɛ gbali ɔmɛ kulaa nɔ, nɛ e tsɔɔ mɛ nihi nɛ ngɛ ngmami ɔmɛ tsuo mi ngɛ e he ɔ sisi.

²⁸ Nɛ a su kɔpe nɛ a yaa a, nɛ e pee kaa nɔ nɛ e yaa e hɛ kpɛ.

²⁹ Nɛ a nyɛ e nɔ, nɛ a ke: “O kɛ wɔ nɛ hi si, ejakaa je ngɛ jɔe nɛ e piɛ bɔɔ nɛ du ma bu.” Nɛ e ya kɔpe ɔ mi, nɛ e kɛ mɛ ya hi si.

³⁰ Nɛ e ba mi kaa benɛ e kɛ mɛ hii si ngɛ niyeni ɔ he ɔ, e kɛ̃ abolo nɛ e gbaa nɔ, nɛ e kuɔ mi nɛ e ngɔ ha mɛ;

³¹ kɛkɛ nɛ a hɛngmɛ bli nɛ a yo lɛ; se e laa ngɛ a hɛ mi, nɛ a nɛ lɛ hu.

³² Nɛ a de a he ke: “Anɛ wa tsui he dɔɛ la ngɛ wa mi benɛ e kɛ wɔ ngɛ munyu tue ngɛ blɔ ɔ nɔ nɛ e tsɔɔ wɔ ngmami ɔmɛ a mi ɔ?”

³³ Nɛ a te si ngɛ lɛ ngmlɛfia a nɔ nɔuu, nɛ a kpale a se kɛ ba Yerusalem, nɛ a ba na ni nyɔngma kɛ kake ɔ kɛ nihi nɛ kɛ mɛ ngɛ ɔ nɛ a bua a he nya;

³⁴ nɛ jamɛ a ni ɔmɛ de mɛ ke: “E ngɛ mi kaa Nyɔmtsɛ ɔ te si, nɛ e je e he kpo tsɔɔ Simon.”

³⁵ Nɛ mɛ hu a bɔ mɛ nɔ́ nɛ ba ngɛ blɔ ɔ nɔ ɔ kɛ bɔ nɛ pee nɛ a yo lɛ ngɛ abolo mi kuɔmi ɔ mi ɔ.

Yesu je e he kpo tsɔɔ e kaseli ɔmɛ

³⁶ Nɛ benɛ a ngɛ munyu ɔ tue nɔuu ɔ, Yesu nitsɛ ba da a kpɛti nɛ e de mɛ ke: “Nyɛ he manye!”

³⁷ Se a hɛli si nɛ a ye gbeye, a susu kaa kpade a ngɛ nae ɔ nɛ.

³⁸ Nɛ e de mɛ ke: “Mɛni he je nyɛ tsui ngɛ poe? Nɛ mɛni he je hulɔ nɛ nyɛ ngɛ nɔ́ jee ngɛ nyɛ tsui mi?

³⁹ Nyɛɛ hyɛ ye ninehi kɛ ye nanehi kaa imi nitsɛ ʼi; nyɛɛ ta ye he nɛ nyɛɛ hyɛ; ejakaa kpade ko be he lo kɛ wu kaa bɔ nɛ nyɛ ngɛ hyɛe kaa i ngɛ nɛ ɔ.”

⁴⁰ Nɛ benɛ e de enɛ ɔ ɔ, e ngɔ e ninehi kɛ e nanehi ngɔ tsɔɔ mɛ.

⁴¹ Se benɛ a he we yi kɛ mwɔɔ ngɛ bua jɔmi sɔuu he nɛ a hɛ mi pee mɛ yaa a, e bi mɛ ke: “Nyɛ ngɛ nɔ ko nɛ a yeɔ ngɛ hiɛ ɔ lo?”

⁴² Nɛ a ha lɛ lo kpɔ fã ko nɛ a hoo;

⁴³ nɛ e sɔle, nɛ e ye ngɛ a hɛ mi.

⁴⁴ Nɛ e de mɛ ke: “Enɛ ɔmɛ ji ye munyuhi nɛ i kɛ nyɛ tu benɛ i kɛ nyɛ ngɛ lolo ɔ nɛ, kaa ja nihi kulaa nɛ a ngma ngɛ Mose Mlaa a kɛ gbali ɔmɛ kɛ La amɛ a mi ngɛ ye he ɔ na ba mi.”

⁴⁵ Kɛkɛ nɛ e bli a juɛmi nya, konɛ a na ngmami ɔmɛ a nya.

⁴⁶ Nɛ e de mɛ ke: “Bɔ nɛ a ngma ji nɛ ɔ nɛ, kaa Kristo nɛ na amanehlu nɛ e te si kɛ je gbeje ngɛ ligbi nɛ ji etɛ ɔ nɔ

⁴⁷ nɛ a fiɛ tsui tsakemi kɛ yayami pami ngɛ e biɛ ɔ mi ngɔ tsɔɔ mahi tsuo, nɛ a bɔni kɛ je Yerusalem.

⁴⁸ Nɛ nyɛ ji kikɛmɛ a ni nɛ ɔmɛ a he odase yeli.

⁴⁹ Nɛ oʼɛ, i ngɛ hae nɛ Tsaatsɛ si womi ɔ nɛ ba nyɛ nɔ; lɔ ɔ he ɔ nyɛɛ hi si ngɛ Yerusalem ma a mi kɛ ya su be nɛ a maa je hiɔwe ba wo nyɛ he wami.”

A ngɔ Yesu kɛ ho hiɔwe ya

⁵⁰ Nɛ e ngɔ mɛ kɛ je kpo kɛ ho Betania kasa nya ya, nɛ e wo e ninehi a nɔ nɛ e gbaa mɛ.

⁵¹ Nɛ e ba mi kaa benɛ e ngɛ mɛ gbaae ɔ, e je a ngɔ nɛ a ngɔ lɛ kɛ ho hiɔwe ya.

⁵² Nɛ a ja lɛ, nɛ a kpale a se kɛ ho Yerusalem ya kɛ bua jɔmi babauu;

⁵³ nɛ a ngɛ sɔlemi we ɔ daa nɛ ɔ, nɛ a jɔɔ we Mawu yi jemi kɛ lɛ gbaami.