Luka 20 - Somi He Ɔ

He blɔ nɛ Yesu ngɛ

¹ E ba mi kaa ligbi ɔ eko nɔ benɛ Yesu ngɛ Sane Kpakpa a fiɛe kɛ ngɛ ma a tsɔɔe ngɛ sɔlemi we ɔ, osɔfo nikɔtɔtɔma amɛ kɛ mlaa tsɔɔli ɔmɛ kɛ nikɔtɔma amɛ ba e ngɔ,

² nɛ a ba de lɛ ke: “Tsɔɔ wɔ he blɔ nɛ o ngɛ he je nɛ o peɔ ni nɛ ɔmɛ, nɛ mɛnɔ ji nɔ nɛ ha mo kikɛmɛ a he blɔ nɛ ɔ?”

³ E ha mɛ heto ke: “Imi hu ma bi nyɛ sane kake nɛ nyɛ ha mi heto:

⁴ Yohane baptisimi ɔ nɛɛ, hiɔwe e je aloo nimli a dɛ mi e je?”

⁵ Se a sa nya ngɛ a kpɛti ke: “Ke wa de ke e je hiɔwe ɔ, e ma de ke: ‘Mɛni he je nɛ nyɛ he we lɛ yi mɔ?’

⁶ Nɛ jeha nɛ ɔ ke wa de ke e je nimli a dɛ mi ɔ, ma a kulaa maa fia wɔ tɛ, ejakaa a kpa si kaa Yohane ɔ, gbalɔ ʼi.”

⁷ Nɛ aha lɛ heto ke a li he nɛ e je.

⁸ Nɛ Yesu de mɛ ke: “Lɛɛ imi hu i be nyɛ tsɔɔe nɔ́ he blɔ nɛ i ngɛ nɛ i kɛ peɔ ni nɛ ɔmɛ.”

Wai ngmɔ ɔ mi apaatsɛmɛ ɔmɛ a he abɛ ɔ

⁹ Yesu ya nɔ nɛ e bu ma a abɛ nɛ ɔ ke: “Nyumu ko pee wai ngmɔ nɛ e ngɔ ha huli apaa yemi, nɛ e doma, nɛ e se ya kɛ.

¹⁰ Nɛ benɛ be ɔ su ɔ e tsɔ tsɔlɔ ko kɛ ya huli ɔmɛ a ngɔ konɛ a ha lɛ wai ngmɔ ɔ mi yiblii ɔ eko; se apaatsɛmɛ ɔmɛ fia lɛ ni, nɛ afie lɛ kɛ dɛ̃ gu.

¹¹ E kpale tsɔ tsɔlɔ kpa ko hu, se lɛ hu a fia lɛ ni, nɛ a pue e hɛ mi si, nɛ a fie lɛ kɛ dɛ gu.

¹² E kpale tsɔ nɔ nɛ ji etɛ; se lɛ hu a plaa lɛ, nɛ a tsitsɛɛ e kuɛ se kɛ je kpo

¹³ Nɛ wai ngmɔtsɛ ɔ ke: ‘Kɛ ma pee kɛɛ? Ma tsɔ ye bi nɛ i suɔ ɔ; eko ɔ lɛɛ ke a na lɛ ɔ, a ma gbo lɛ zo.’

¹⁴ Se benɛ huli ɔmɛ na lɛ ɔ, a de a he ke: ‘Ni yelɔ ɔ ji nɛ ɔ nɛ; nyɛɛ ba nɛ nyɛ ha waa gbe lɛ, konɛ ni ɔmɛ nɛ pee wa nɔ.’

¹⁵ Lɔ ɔ he ɔ, a tsitsɛɛ e kuɛ se kɛ je wai ngmɔ ɔ mi nɛ a ya gbe lɛ. Lɔ ɔ he ɔ, kɛ wai ngmɔtsɛ ɔ maa pee mɛ kɛɛ?

¹⁶ E ma ba kpata huli ɔmɛ a hɛ mi, nɛ e maa ngɔ wai ngmɔ ɔ ngɔ ha ni kpahi.” Se benɛ a nu ɔ a ke: “Kpaoo!”

¹⁷ Se Yesu hyɛ mɛ kɛ kpe nɛ e ke: “Mɛni ji nɔ́ nɛ a ngma nɛ ɔ mɔ, ke: ‘Tɛ ɔ nɛ tsu fiali ɔmɛ sake fɔ he ɔ, Kɔlɔ ɔ nɔuu lɛ plɛ kɔ nya tɛ nɛ ɔ nɛ.’

¹⁸ Nɔ tsuaa nɔ nɛ maa nɔ tɛ nɛ ɔ nɔ ɔ, e mi ma tsɔtslɔɔ; se nɔ nɔ nɛ e maa nɔ ɔ, e maa wɛɛ lɛ mɔnyɔmɔnyɔ.”

Oniatsumi he sane

¹⁹ Osɔfo nikɔtɔma amɛ kɛ mlaa tsɔɔli ɔmɛ ngɛ hlae nɛ a nu Yesu ngɛ lɛ ngmlɛfia a nɔ nɔuu se a ya ye ma a gbeye, ejakaa a kɔ se kaa a he nɛ e bu kikɛmɛ a bɛ nɛ ɔ nɛ.

²⁰ Nɛ a wo e he ka, nɛ a tsɔ huɔli, nihi nɛ pee a he kaa dali, konɛ a wo e nya tso kpɛ benɛ pee nɛ a ngɔ lɛ ngɔ wo amlaalo hewami kɛ he blɔ ɔ dɛ mi.

²¹ Nɛ a bi lɛ ke: “Tsɔɔlɔ, wa le kaa o tuɔ munyu nɛ o tsɔɔ ni dami nya, nɛ jeha nɛ ɔ hu o hyɛ we nimli a hɛ mi, se mohu anɔkuale mi o tsɔɔ Mawu blɔ ɔ ngɛ.

²² Anɛ e da kaa wa tsuɔ onia haa Kaisare, aloo e dɛ?”

²³ Se benɛ Yesu kpa a ga a si ɔ, e de mɛ ke:

²⁴ “Nyɛɛ ngɔ cedi kɛ ba nɛ ma hyɛ! Mɛnɔ foni kɛ biɛ lɛ ngɛ nɔ nɛ ɔ?” Nɛ a ha lɛ heto ke: “Kaisare nɔ ʼi.”

²⁵ Nɛ e de mɛ ke: “Lɛɛ nyɛɛ ngɔ Kaisare nihi ngɔ ha Kaisare, nɛ Mawu nihi ɔ nyɛ ngɔ ha Mawu!”

²⁶ Nɛ a nyɛ we e nya tso kpɛ ko nɛ a wo ngɛ ma a hɛ mi, nɛ e heto ɔ pee mɛ nyakpe nɛ a ma a nya.

Ni gbogboehi a sitemi he sane

²⁷ Nɛ Sadukifo ɔmɛ hu nɛ tsɔɔ kaa ni gbogboehi a si temi ko be ɔ, a ti ni komɛ ba e ngɔ nɛ a ba bi lɛ

²⁸ ke: “Tsɔɔlɔ, Mose ngma ha wɔ ke: ‘Ke nɔ ko nyɛmi nɛ ngɛ yo gbo nɛ e si we bi ɔ, e nyɛmi ɔ nɛ ngɔ e yo ɔ konɛ e wo nina ngɔ ha e nyɛmi ɔ.’

²⁹ Jeha nɛ ɔ nyɛmimɛ kpaago hi si, nɛ a kpɛti nɔkɔtɔma a ngɔ yo, nɛ e gbo nɛ e si we bi.

³⁰ Nɛ e se nɔ ɔ ngɔ yo ɔ, nɛ lɛ hu e gbo nɛ e si we bi.

³¹ Nɛ nɔ nɛ ji etɛ ɔ hu ngɔ lɛ, nɛ ja nɔuu ni kpaago ɔ tsuo pee; se a si we bimɛ nɛ a gbo.

³² Nɛ mɛ tsuo a se ɔ yo ɔ hu ba gbo.

³³ Lɛɛ ni gbogboehi a si temi ɔ mi ɔ, a ti mɛnɔ yo e maa pee, ejakaa mɛ ni kpaago ɔ tsuo kɛ lɛ hi si?”

³⁴ Yesu ha mɛ heto ke: “Je nɛ ɔ mi bimɛ ngɔɔ yo, nɛ a kɛ yo haa gba;

³⁵ se nihi nɛ maa sa je nɛ ma a kɛ ni gbogboehi a si temi ɔ nami ɔ, a ngɔɛ yo, nɛ pohu a kɛ yo ha we gba;

³⁶ nɛ jeha nɛ ɔ hu a be gboe hulɔ, ejakaa a ngɛ kaa hiɔwe bɔfohi nɛ Mawu bimɛ ji mɛ, akɛnɛ si temi bimɛ ji mɛ he je ɔ.

³⁷ Se kaa ni gbogboehi maa te si ekohu ɔ, Mose nitsɛ tsɔɔ ngɛ hue kpɔ ɔ sane ɔ mi benɛ e tsɛ Mawu ke, Abraham Mawu kɛ Isak Mawu kɛ Yakob Mawu ɔ.

³⁸ Mawu ɔ, e pi ni gbogboehi a Mawu, se mohu hɛ kali a Mawu ji lɛ; ejakaa e hɛ mi ɔ nihi tsuo kulaa hɛ ngɛ.”

³⁹ Se mlaa tsɔɔli ɔmɛ a ti ni komɛ he nɔ nɛ a de lɛ ke: “Tsɔɔlɔ, o munyu ɔ ngɔ.”

⁴⁰ Nɛ a kɛ́ lɛ sane ko bimi hu.

Mesia a he sane

⁴¹ Nɛ Yesu bi mɛ ke: “Kɛ pee kɛɛ nɛ a deɔ ke Kristo ɔ David bi ji lɛ ɔ?

⁴² Ejakaa David nitsɛ de ngɛ La womi ɔ mi ke: ‘Nyɔmtsɛ ɔ de ye Nyɔmtsɛ ɔ ke: Hii ye hiɛ ɔ nɔ,

⁴³ Kɛ maa su be nɛ ma ngɔ o henyɛli ɔmɛ Ngɔ pee o nane si sɛ̃.’

⁴⁴ Ke David tsɛ lɛ ‘Nyɔmtsɛ ɔ’ lɛɛ kɛ peɔ kɛɛ nɛ e ji e bi mɔ?”

Yesu bɔ mlaatsɔɔli ɔmɛ a he kɔkɔ

⁴⁵ Ma a tsuo hɛ mi nɛ Yesu de e kaseli ɔmɛ ke:

⁴⁶ “Nyɛ hɛ nɛ hi nyɛ he nɔ ngɛ mlaa tsɔɔli ɔmɛ a he, se a suɔ tade wuyawuyahi a mi nyɛɛmi, nɛ a suɔ jua nɔ ngamihi kɛ nikɔtɔmahi a sihi hehi ngɛ kpe he ɔmɛ kɛ okplɔɔ yi himi ke a tsɛ ni yemi;

⁴⁷ nihi nɛ mii yalɔyi a wehi, nɛ lakpa tomi he ɔ, a sɔlee sɔlemi gagaagahi ɔ; ni nɛ ɔmɛ a fɔ bumi maa pe nine.”