Luka 19 - Somi He Ɔ

Yesu kɛ Zakeo

¹ Yesu ya sɛ Yeriko nɛ e ngɛ mi poe kɛ yaa.

² Nɛ oʼɛ, nyumu ko ngɛ lejɛ ɔ nɛ a tsɛɛ lɛ Zakeo, nɛ onia tsulɔ nɔkɔtɔma kɛ niatsɛ ji lɛ.

³ E ngɛ hlae nɛ e na Yesu nɛ e le lɛ, se nihi babauu ɔ he ɔ, e nyɛ we ejakaa nɔmlɔ kpiti ji lɛ.

⁴ Lɔ ɔ he ɔ, e sa fo kɛ sɛ hlami nɛ e ya kuɔ sikamore tso ko, konɛ e hyɛ lɛ, ejakaa lejɛ ɔ blɔ e maa gu.

⁵ Nɛ Yesu su lejɛ ɔ, e wo e hɛ nɔ, nɛ e de lɛ ke: “Zakeo, o he nɛ esɔ nɛ o kple si, ejakaa o we ɔ mi ma to mwɔnɛ ɔ.”

⁶ Nɛ Zakeo he sɔ kɛ kple si nɛ e fua Yesu atuu.

⁷ Nɛ benɛ ni ɔmɛ na a, mɛ tsuo a tu munyu huitihuiti ke: ‘E ya to nyumu yayami peelɔ ngɔ.”

⁸ Se Zakeo da si nɛ e de Nyɔmtsɛ ke: “Nyɔmtsɛ, oʼɛ, ma ngɔ ye nihi fa ngɔ ke ohiafohi, nɛ ke i kɛ yaka nya pomi kpɔ nɔ ko nɔ́ ko ngɛ e dɛ ɔ, ma ku ngɔ bɔ he si eywiɛ ha lɛ.”

⁹ Nɛ Yesu de lɛ ke: “Mwɔnɛ yi wami hemi ba we nɛ ɔ mi, ejakaa lɛ hu Abraham bi ji lɛ.

¹⁰ Ejakaa Nɔmlɔ Bi ɔ ba nɔ nɛ laa a hlami kɛ yi wami hemi.”

Sika kpɔ ɔ he abɛ ɔ

¹¹ Benɛ a ngɛ ni nɛ ɔmɛ tue bue ɔ, e bu abɛ ko kɛ si nɔ, ejakaa e su Yerusalem tã nɛ a susu kaa amlɔ ɔ nɔuu Mawu matsɛ yemi ɔ ma je e he si.

¹² Lɔ ɔ he ɔ e ke: Ablade ko doma kɛ ho lokoo ya konɛ e ya ngɔ e matsɛ yemi nɛ e kpale kɛ ba.

¹³ E tsɛ e sɔmɔli nyɔngma nɛ e je cedi nyingmi enyɔ ngɔ ha mɛ; nɛ e de mɛ ke: ‘Nyɛ plɛ he kɛ ya su ma ba.’

¹⁴ Se e ma mi bi ɔmɛ nyɛ lɛ, nɛ a tsɔ tsɔli kɛ fie e se ke: ‘Wa sume nɛ ɔ nɔ nɛ o ba ye wa nɔ matsɛ.’

¹⁵ “Nɛ e ba mi kaa benɛ e nine ya su matsɛ yemi ɔ nɔ nɛ e kpale e se kɛ ba a, e fa ke a tsɛ jamɛ a sɔmɔli ɔmɛ nɛ e ngɔ e sika a ngɔ ha a kɛ ba, konɛ e na nɔ́ nɛ a na ngɛ sika a he plɛmi mi’

¹⁶ Nɛ kekle nɔ ɔ ba ba de ke: ‘Nyɔmtsɛ, sika a fɔ nyɔngma.’

¹⁷ Nɛ e de lɛ ke: ‘Ayekoo, sɔmɔlɔ kpakpa, akɛnɛ o ye anɔkuale ngɛ nɔ nyafii kulaa mi he ɔ, ye ma nyɔngma nɔ.’

¹⁸ Nɛ nɔ nɛ ji enyɔ ɔ ba ba de ke: ‘Nyɔmtsɛ, o sika a fɔ enuɔ.’

¹⁹ Nɛ lɛ hu e de lɛ ke: ‘Mo hu ye ma enuɔ nɔ.’

²⁰ Nɛ nɔ kake ɔ hu ba ba de ke: ‘Nyɔmtsɛ, oʼɛ o sika a nɛ i fi ngɔ wo duku mi ngɔ to ɔ ji nɛ ɔ nɛ;

²¹ i ya ye mo gbeye ejakaa o yi mi wa; o woɔ nɔ́ nɛ o ngɔ fɔɛ si, nɛ o kpaa nɔ́ nɛ o du we.’

²² Se nyɔmtsɛ ɔ de lɛ ke: ‘Sɔmɔlɔ yayami, mo nitsɛ o nya mi munyu ma kɛ kojo mo.’ Nɛ o le kaa yi mi walɔ ji mi; i woɔ nɔ nɛ i ngɔ fɔɛ si, nɛ i kpaa nɔ nɛ i du we ɔ,

²³ mɛni he je mɔ nɛ o kɛ ye sika a ya ha we tsakeli ɔmɛ, konɛ ke i ba a nɛ ma ba he ye ni kɛ hekpa?’

²⁴ Kɛkɛ nɛ e de nihi nɛ daa si ngɛ e kasa nya a ke: ‘Nyɛ kpɔ sika a ngɛ e dɛ, nɛ nyɛ ngɔ ha nɔ nɛ ngɛ cedi nyingmi enyɔ ɔ.’

²⁵ Nɛ a de lɛ ke: ‘Nyɔmtsɛ, e ngɛ cedi nyingmi enyɔ.’

²⁶ ‘I ngɛ nyɛ dee ke, nɔ tsuaa nɔ nɛ ngɛ nɔ́ ko ɔ, lɛ nɔuu a ma ha; se nɔ nɛ be nɔ́ ko ɔ, nɔ́ nɛ e ngɛ ɔ tete a ma kpɔ ngɛ e dɛ.

²⁷ Se jamɛ a ye henyɛli ɔmɛ nɛ sume kaa ma ye a nɔ matsɛ ɔ, nyɛɛ ngɔ mɛ kɛ ba hiɛ ɔ nɛ nyɛ ba gbe mɛ ngɛ ye hɛ mi.’ ”

Yesu Yerusalem sɛmi

²⁸ Nɛ benɛ Yesu de enɛ ɔ ɔ, e be sɛ hlami kɛ ma Yerusalem blɔ ɔ nɔ.

²⁹ Nɛ e ba mi kaa benɛ e su Betfage kɛ Betania ngɛ yoku nɛ a tsɛɛ Nuyoku ɔ he ɔ, e tsɔ e kaseli ɔmɛ a ti ni enyɔ;

³⁰ e ke: “Nyɛɛ ya kɔpe nɛ ngɛ nyɛ hɛ mi ɔ mi, nɛ ke nyɛ sɛ mi ɔ, nyɛ maa na teji bi nɛ nɔ ko hi e nɔ hyɛ muɔɔ si ngɛ lejɛ ɔ; nyɛɛ pɛne lɛ nɛ nyɛɛ ngɔ lɛ kɛ ba.

³¹ Nɛ ke nɔ ko bi nyɛ ke: ‘Mɛni he je nyɛ ngɛ lɛ pɛnee’ ɔ, nyɛ de lɛ ke: ‘E he ngɛ Nyɔmtsɛ ɔ hiae.’ ”

³² Nɛ ninɛmɛ nɛ a tsɔ ɔ pue nɔ kɛ ho, nɛ a ya na kaa bɔ nɛ e de mɛ ɔ.

³³ Se benɛ a ngɛ teji bi ɔ pɛnɛe ɔ, nɔtsɛ ɔ bi mɛ ke: “Mɛni he je nyɛ ngɛ teji bi ɔ pɛnee?”

³⁴ Nɛ a ke: “E he ngɛ Nyɔmtsɛ ɔ hiae.”

³⁵ Nɛ a kɛ lɛ ba Yesu ngɔ nɛ a kɛ a tadehi pue teji bi ɔ nɔ, nɛ a wo Yesu ngɔ hi nɔ.

³⁶ Nɛ benɛ e yaa a, a kɛ a tadehi ha blɔ ɔ nɔ.

³⁷ Nɛ benɛ e su he nɛ a kpleɔ Nuyoku ɔ ngɛ ɔ, e kaseli asafo ɔ tsuo bɔni nyami, nɛ a je Mawu yi wawɛɛ ngɛ he wami ni tsumihi tsuo nɛ a na a he;

³⁸ a ke: “A gbaa matsɛ nɛ ma ngɛ Nyɔmtsɛ ɔ biɛ mi ɔ, hejɔmi ngɛ hiɔwe nɛ hɛ mi nyami ngɛ hiɔwe lokoo!”

³⁹ Nɛ Farisifo ɔmɛ a ti ni komɛ je asafo ɔ mi de lɛ ke: “Tsɔɔlɔ, ka o kaseli ɔmɛ.”

⁴⁰ Se Yesu he nɔ nɛ e de mɛ ke: “I ngɛ nyɛ dee ke, ke ni ne ɔmɛ ma ma a nya a, lɛɛ tɛhi ma kpa ngmlaa.”

Yesu fo ya pue Yerusalem nɔ

⁴¹ Nɛ benɛ Yesu su ta nɛ e na ma a, e fo ya pue e nɔ,

⁴² nɛ e ke: “E ji ngɛ o ligbi nɛ ɔ nɔ ɔ, o na le nihi nɛ hi ha o he jɔmi jinɛ saii! Se jeha nɛ ɔ a ngɔ laa mo.

⁴³ Ejakaa o ligbi hi ma, nɛ o henyɛli ɔmɛ maa tsua muɔ ngɔ wo o he, nɛ a maa po klaangma ngɔ wo o he, nɛ a ma sa o yi ngɛ he tsuaa he,

⁴⁴ nɛ a maa ngɔ mo ngɔ fia si kɛ o bimɛ nɛ ngɛ o mi ɔ, nɛ a be tɛ kake sie ngɛ eko nɔ ngɛ o mi, ejakaa o yo we o slaami be ɔ!”

Yesu ya sɔlemi we ɔ

⁴⁵ Nɛ Yesu ya sɔlemi we ɔ nɛ e bɔni nihi nɛ ngɛ ni juae ngɛ mi ɔ fiemi;

⁴⁶ e de mɛ ke: “A ngma ke: ‘Ye we ɔ, sɔlemi we ʼi,’ se nyɛɛ lɛɛ nyɛɛ ngɔ pee ojofiali a kplo!”

⁴⁷ Nɛ Yesu ya tsɔɔ ni daa ngɛ sɔlemi we ɔ; se osɔfo nikɔtɔma amɛ kɛ mlaa tsɔɔli ɔmɛ kɛ ma a mi nikɔtɔma amɛ ngɛ hlae nɛ a kpata e hɛ mi;

⁴⁸ se a li blɔ nɔ nɛ a maa gu, ejakaa ma mluku ɔ tsuo heɔ lɛ yeɔ, nɛ a buɔ lɛ tue.