Luka 17 - Somi He Ɔ

Yayami

¹ Yesu de e kaseli ɔmɛ ke: “Bɔ tsuaa bɔ nɛ pee ɔ ja nane kpatami nihi ba; se musu tloo nɔ nɛ a guu e nɔ kɛ baa a!

² Afani nɛ a kɛ teji wɛ muɔ e kuɛ nɛ a ya sake lɛ ngɔ fɔ wo mi pe nɛ e ma kpata tsɔwi nɛ ɔmɛ a ti nɔ kake nane.

³ Nyɛɛ yɛ nɛ hi! “Ke o nyɛmi tɔ o nɔ ɔ, kã e hɛ mi; nɛ ke e pia e he ɔ, kɛ pa lɛ.

⁴ Nɛ ke si kpaago nɛ e tɔ o nɔ ligbi kake, nɛ e kpale e se kɛ ba o ngɔ si kpaago ligbi kake nɛ e ke: ‘I pia ye he!’ ɔ, kɛ pa lɛ.”

Hemi kɛ yemi

⁵ Nɛ bɔfo ɔmɛ de Nyɔmtsɛ ɔ ke: “Piɛ wa hemi kɛ yemi ɔ he ha wɔ!”

⁶ Nɛ Nyɔmtsɛ ɔ ke: “Ke nyɛ ngɛ hemi kɛ yemi kaa sinapi wu ngu kake ɔ, jinɛ nyɛ ma de sikamino tso nɛ ɔ ke: ‘Hia kɛ o sipoku nɛ o ya ma wo mi!’ nɛ e maa bu nyɛ tue.”

Sɔmɔlɔ ko blɔnyanitsumi

⁷ “Se nyɛ ti mɛnɔ lɛ ngɛ sɔmɔlɔ nɛ e kɛ na kpakpla ngɛ hue aloo e ngɛ lohwehi lɛe, nɛ ke e je ngmɔ mi kɛ ba pɛ ɔ, e ma de lɛ ke: ‘Ba hi si esɔ esɔ nɛ o ye ni?’

⁸ Se e be lɛ dee mohu ke: ‘Dla nɔ́ nɛ ma ye ɔ ngɔ ma si, nɛ o mia konɛ o sɔmɔ mi nɛ ma ye ni nɛ ma nu nɔ́ ko lolo, nɛ lɔ ɔ se ɔ konɛ mo hu o ye ni nɛ o nu nɔ́ ko?’

⁹ Anɛ e maa na jamɛ a sɔmɔlɔ ɔ si kaa e pee nɔ́ nɛ a fa lɛ ɔ? I kpa we si.

¹⁰ Ja nɔuu nyɛ hu, ke nyɛ pee nihi kulaa nɛ a fa nyɛ ɔ́, nyɛ de ke: ‘Sɔmɔli nɛ he be se nami komɛ ji wɔ; nɔ́ nɛ ji wa blɔ nya kaa wa tsuɔ ɔ, kɔlɔ ɔ pɛ wa tsu nɛ ɔ nɛ.’ ”

Yesu tsa tsitsɛmɛ nyɔngma

¹¹ Nɛ e ba mi kaa benɛ Yesu yaa Yerusalem ɔ, e ya gu Samaria kɛ Galilea kpɛti.

¹² Nɛ benɛ e ya sɛ ma ko mi ɔ, nyumuhi tsitsɛmɛ nyɔngma kɛ lɛ ba kpe, nɛ a daa si ngɛ se tsitsa lokoo.

¹³ Nɛ a kpa ngmlaa ke: “Mawetsɛ Yesu naa wɔ mɔbɔ!”

¹⁴ Nɛ benɛ e na mɛ ɔ, e de mɛ ke: “Nyɛɛ ya nɛ nyɛɛ ngɔ nyɛ he ya tsɔɔ osɔfo ɔmɛ.” Nɛ e ba mi kaa benɛ a yaa a, a he tsi ɔ ta.

¹⁵ Se a ti nɔ kake ɔ, benɛ e na kaa a tsa lɛ ɔ, e kpale e se kɛ ba nɛ e wo Mawu hɛ mi nyami kɛ gbi wawɛɛ.

¹⁶ Nɛ e kɛ e hɛ mi ba bu si ngɛ Yesu nane nya, nɛ e na lɛ si. Se nɔ nɛ ɔ ɔ, Samariano ʼi.

¹⁷ Nɛ Yesu he nɔ nɛ e bi lɛ ke: “Anɛ pi nimli nyɔngma nɛ he ta a? Se nimli nɛɛ ɔ jije a ngɛ?

¹⁸ Blɔɔ a nɛ́ a ti nɔ ko nɛ kpaleɔ e se kɛ hɛ mi nyami ba haa Mawu, kaa ja maseno nɛ ɔ lo?”

¹⁹ Nɛ e de lɛ ke: “Tee si nɛ o ya; o hemi kɛ yemi tsa mo!”

Matsɛyemi ɔ bami

²⁰ Nɛ benɛ Farisifo ɔmɛ bi Yesu ke: “Te be nɛ Mawu matsɛ yemi ɔ maa ba” a, e ha mɛ heto ke: “Mawu matsɛ yemi ɔ bɛ́ kaa nɔ́ ko nɛ a naa;

²¹ nɛ jeha nɛ ɔ hu a be dee ke: ‘Oʼɛ, e ngɛ hiɛ ɔ! aloo oʼɛ, e ngɛ lejɛ ɔ!’ ejakaa oʼɛ, Mawu matsɛ yemi ɔ ngɛ nyɛ mi.”

²² Nɛ e de e kaseli ɔmɛ ke: “Be maa ba nɛ nyɛ ma hla Nɔmlɔ Bi ɔ ligbi ɔmɛ eko nɛ nyɛɛ na, nɛ nyɛ be nae.

²³ Nɛ a ma de nyɛ ke: ‘Oʼɛ, e ngɛ hiɛ ɔ, aloo: oʼɛ e ngɛ lejɛ ɔ!’ Nyɛ ko ya, nɛ nyɛ ko nyɛɛ a se.

²⁴ Ejakaa bɔ nɛ oslaba ngaa nɛ e haa hiɔwe sisi fa kpɛɛ ɔ, ja nɔuu kɛ̃ Nɔmlɔ Bi ɔ maa hi ngɛ e ligbi ɔ nɔ.

²⁵ Se kekleekle ɔ, ja e na amanehlu babauu, nɛ kikɛmɛ a yi nɔbi nɛ ɔmɛ kua lɛ.

²⁶ Nɛ bɔ nɛ e ba mi ngɛ Noa ligbi ɔmɛ a mi ɔ, jã nɔuu e maa ba mi ngɛ Nɔmlɔ Bi ɔ ligbi ɔmɛ a mi hulɔ.

²⁷ A ngɛ ni yee, a ngɛ da nue, a ngɛ yihi ngɔe, nɛ a kɛ mɛ ngɛ gba hae kɛ ya su ligbi nɛ. Noa sɛ daka a mi nɛ nyu afua a ba nɛ e ba kpata mɛ tsuo kulaa a hɛ mi.

²⁸ Jeha nɛ ɔ bɔ nɛ e ba mi ngɛ Lot ligbi ɔmɛ a mi hulɔ ɔ, a ngɛ ni yee, a ngɛ da nue, a ngɛ ni hee, a ngɛ ni juae, a ngɛ tsohi due, nɛ a ngɛ tsuhi mae;

²⁹ se ligbi nɛ Lot je Sodom ɔ, Mawu nɛ la kɛ suɔɔ kɛ je hiɔwe, nɛ e kpata mɛ tsuo kulaa a hɛ mi.

³⁰ Ja nɔuu kɛ e maa ba ligbi nɛ a ma je Nɔmlɔ Bi ɔ kpo ɔ.

³¹ “Jamɛ a ligbi ɔ nɔ ɔ, nɔ nɛ ngɛ tsu yi mi nɛ e nihi ngɛ we mi ɔ, e ko kple si ba kukuɔ, nɛ nɔ nɛ ngɛ ngmɔ si hu e ko kple si kɛ ba we mi.

³² Nyɛ kai Lot yo ɔ!

³³ Nɔ tsuaa nɔ nɛ hlaa kaa e baa e klaa yi ɔ, e maa laa lɛ; se nɔ tsuaa nɔ nɛ maa laa lɛ ɔ, e ma he e yiwami.

³⁴ I ngɛ nyɛ dee ke: Jamɛ a nyɔ ɔ mi ɔ, nyumuhi enyɔ maa hwɔ sa kake nɔ, a maa ngɔ nɔ kake nɛ a ma si nɔ kake.

³⁵ Yi enyɔ maa wɛɛ ngɛ he kake, a maa ngɔ nɔ kake, nɛ a ma si nɔ kake. [

³⁶ Ni enyɔ maa hi ngmɔ si, a maa ngɔ nɔ kake nɛ a ma si nɔ kake.]”

³⁷ Nɛ a bi lɛ ke “Mawetsɛ, jije?” Se e de mɛ ke: “He nɛ nɔ gbogboe fɔɔ si ngɛ ɔ, lejɛ ɔ okpokuhi buaa a he nya ngɛ.”