Luka 15 - Somi He Ɔ

To nɛ laa a

¹ Jeha nɛ ɔ onia tsuli kɛ yayami peeli ɔmɛ tsuo hɛ mɛ su e he nɛ a ba bu lɛ tue.

² Farisifo ɔmɛ kɛ mlaa tsɔɔli ɔmɛ tu munyu huitihuiti nɛ a de ke: “Nɔ nɛ ɔ kɛ yayami peeli yeɔ ni.”

³ Nɛ e bu mɛ kikɛmɛ a abɛ nɛ ɔ ke:

⁴ “Nyɛ ti mɛnɔ nɛ ke e ngɛ to lafa nɛ a kpɛti kake laa a, e be nyingmi nɛɛ kɛ nɛɛ ɔ sie ngɛ nga a nɔ nɛ e ya hla nɔ́ nɛ laa a kɛ maa su benɛ e maa na lɛ?

⁵ Nɛ ke e na lɛ ɔ, e woɔ lɛ fɔɔ ekonɔ nɛ e naa bua jɔmi;

⁶ nɛ ke e ba we mi ɔ, e tsɛɛ e huɛmɛ kɛ e pakabi kɛ kpee, nɛ e deɔ mɛ ke: “Nyɛɛ kɛ mi nɛ na buajɔmi, ejakaa i na ye to ɔ nɛ laa a.’

⁷ I ngɛ nyɛ dee ke, ja nɔuu buajɔmi maa ba hiɔwe ngɛ yayami peelɔ kake nɛ tsakee e tsui ɔ he pe dali nyingmi nɛɛ kɛ nɛɛ nɛ tsui tsakemi he hia we mɛ ɔ.”

Sika nɛ laa a

⁸ “Aloo te yo nɛ ngɛ sika hiɔ nyɔngma nɛ ke kpɔ kake laa a nɛ e be kane sue nɛ e bɛɛ we ɔ mi nɛ e hla fitsofitso kɛ maa su be nɛ e maa na?

⁹ Nɛ ke e na a, e tsɛɛ e huɛmɛ kɛ e pakabi kɛ kpee nɛ e deɔ mɛ ke: ‘Nyɛɛ kɛ mi nɛ na bua jɔmi, ejakaa i na ye sika kpɔ nɛ laa a.’

¹⁰ Ja nɔuu i ngɛ nyɛ dee ke, bua jɔmi baa Mawu bɔfo ɔmɛ a kpɛti ngɛ yayami peelɔ kake nɛ tsakee e tsui ɔ he.”

Bi nyumu nɛ laa a

¹¹ Nɛ e ke: “Nyumu ko ngɛ bimɛ nyumuhi enyɔ.

¹² Nɛ a kpɛti jokuɛyo ɔ de e tsɛ ɔ ke: ‘Tsaatsɛ, ha mi o ni ɔmɛ a mi nɔ́ nɛ ji ye blɔfami nɔ.’ Nɛ e dla e ni ɔmɛ a mi ngɔ ha mɛ.

¹³ Nɛ lɔ ɔ se ɔ, e sui be ko kɛkɛ nɛ jokuɛ ɔ bua kulaa nya, nɛ e doma kɛ ho he ko lokoo ya, nɛ Hejɛ ɔ ekɛ je mi bami sakasaka ya kpata e ni ɔmɛ a hɛ mi ngɛ.

¹⁴ Se benɛ e puɛ kulaa a, hwɔ nɛ nya wa ko ba te si ngɛ jamɛ a zugba a nɔ tsuo, nɛ e bɔni lɛ fimi.

¹⁵ Nɛ e pue nɔ kɛ ho nɛ e kɛ e he ya bɔ jamɛ a zugba a nɔ bi ɔmɛ eko he; nɛ e ha e ya e ngmɔ ɔ mi ya lɛ kpotoohi.

¹⁶ Nɛ e jio lɛ kaa jinɛ e ko na yɔ nɛ kpotoo ɔmɛ yeɔ ɔ eko nɛ e ye nɛ e tɔ, se nɔ ko hi lɛ.

¹⁷ Nɛ benɛ e hɛ mi tsɔ lɛ ɔ, e ke: ‘Yaa hyɛ tsaatsɛ apaatsɛmɛ abɔ sɔuu nɛ ngɛ niyeni babauu nɛ a pee we he nɔ ko, nɛ imi lɛɛ hwɔ gɛ mi gbee ngɛ hiɛ ɔ nɛ ɔ.

¹⁸ Ma te si nɛ ma ya tsaatsɛ ngɔ nɛ ma ya de lɛ ke: “Tsaatsɛ, i pee yayami si Mawu kɛ mo,

¹⁹ nɛ i sɛ́ kaa a tsɛɔ mi o bi hu; ngɔɔ mi ngɔ pee o apaatsɛmɛ ɔmɛ eko.” ’

²⁰ Nɛ e te si nɛ e pue nɔ kɛ ba e tsɛ ngɔ. “Se benɛ e nyɛɛ tsitsa lokoo kɛ ma a, e tsɛ na lɛ, nɛ e muklii mi sa lɛ, nɛ e sa fo kɛ ho ya fua lɛ nɛ e fiɔ e nya he.

²¹ Nɛ e bi ɔ de lɛ ke: ‘Tsaatsɛ, i pee yayami kɛ si Mawu kɛ mo, nɛ i sɛ kaa a tsɛɔ mi o bi hu!’

²² Se e tsɛ ɔ de sɔmɔli ɔmɛ ke: ‘Nyɛ ya je tade nɛ ngɛ fɛu pe kulaa a kɛ ba esɔ, nɛ nyɛ kɛ ba wo lɛ, nɛ nyɛɛ wo e nine si ga kɛ e nane hu tokota;

²³ nɛ nyɛɛ ngɔ na bi nɛ tu zɔ ɔ kɛ ba nɛ nyɛ ba gbe, nɛ nyɛ ha waa ye ni nɛ wa na bua jɔmi;

²⁴ ejaakaa ye bi nɛ ɔ gbo, nɛ e hɛ tsɛ ekohu; e laa nɛ a na lɛ.’ Nɛ a bɔni nyami.

²⁵ “Se e bi nɔkɔtɔma a ngɛ ngmɔ mi, nɛ benɛ e ma nɛ e su we ɔ mi ta a, e nu saku kɛ dohi a he.

²⁶ E tsɛ sɔmɔli ɔmɛ a ti nɔ kake kɛ ba se, nɛ e bi lɛ ke: ‘Mɛni a ngɛ pee nɛ ɔ?’

²⁷ Nɛ e de lɛ ke: ‘O nyɛmi ɔ ba, nɛ o tsɛ gbe na bi nɛ tu zɔ ɔ ejakaa e su e dɛ mi kpɛii nɛ nɔ́ ko nɔ́ ko be e he.’

²⁸ Nɛ e muklii mi fu, nɛ e kplɛɛ we we ɔ mi sɛmi. Lɔ ɔ he ɔ e tsɛ ɔ je kpo nɛ e ba kpa lɛ pɛɛ.

²⁹ Se e he nɔ nɛ e de e tsɛ ɔ ke: ‘Hyɛ jehahi abɔ sɔuu nɛ i sɔmɔ mo, nɛ i tɔ we o kita ko nɔ gblee, nɛ imi lɛɛ o ha we mi to ku ko tete po gblee konɛ i kɛ ye huɛmɛ nɛ nya;

³⁰ se mwɔnɛ nɛ o bi nɛ ɔ nɛ kɛ ajuamahi ya ye o ni ɔmɛ ba a, lɛɛ o gbe na bi nɛ tu zɔ ɔ ngɔ ha lɛ.’

³¹ Nɛ e tsɛ ɔ de lɛ ke: ‘Ye bi, mo lɛɛ o kɛ mi lɛ ngɛ daa nɛ ɔ, nɛ nɔ́ tsuaa nɔ́ nɛ i ngɛ ɔ, o nɔ ʼi,

³² se e sa kaa wa nya nɛ wa bua nɛ jɔ wa he, ejakaa o nyɛmi nɛ ɔ gbo, nɛ e hɛ tsɛ ekohu, e laa, nɛ a na lɛ.’ ”