Luka 13 - Somi He Ɔ

Tsakee o blɔ ɔmɛ nɛ o he mi ko kpata

¹ Jamɛ a be ɔ mi nɔuu ɔ, ni komɛ ngɛ lejɛ ɔ nɛ sɛ̃ɛ Galileabi nɛ Pilato ngɔ a muɔ ngɔ futu a bɔ sami ɔmɛ a mi ɔ he sane ɔ ha lɛ.

² Nɛ Yesu he nɔ nɛ e bi mɛ ke: “Anɛ nyɛ susu kaa kikɛmɛ a Galileabi nɛ ɔmɛ ji yayamipeeli pe Galileabi ɔmɛ tsuo he je nɛ a na kikɛmɛ a amanehlu nɛ ɔ lo?

³ Dɛbi, se mohu i ngɛ nyɛ dee ke, ke nyɛ tsakee we nyɛ blɔ ɔmɛ ɔ, nyɛ tsuo nyɛ hɛ mi ma kpata ja kɛ̃.

⁴ Aloo nyɛ susu kaa nihi nyɔngma kɛ kpaanyɔ ɔ nɛ Siloa mɔ ɔ hule pue a nɔ nɛ e gbe mɛ ɔ, mɛ kɛkɛ ji yayami peeli pe nimli tsuo nɛ ngɛ Yerusalem ɔ lo?

⁵ Dɛbi, se mohu i ngɛ nyɛ dee ke, ke nyɛ tsakee we nyɛ blɔ ɔmɛ ɔ, nyɛ tsuo nyɛ hɛ mi ma kpata jã kɛ.”

Ngmɔkɔ tso nɛ wui yiblii ɔ he abɛ ɔ

⁶ Nɛ e bu mɛ kikɛmɛ a abɛ nɛ ɔ ke: “Nɔ ko du ngmɔkɔ tso ngɛ e wai ngmɔ mi, nɛ e ya e nɔ yiblii hlami, se e nɛ eko.

⁷ Kɛkɛ nɛ e de ngmɔ hulɔ ɔ ke: ‘Oʼɛ jeha etɛ ji nɛ ɔ tsuo ɔ, i baa ba hlaa yiblii ngɛ ngmɔkɔ tso nɛ ɔ nɔ, se i nɛ eko. Poo lɛ ngɔ fɔ si. Mɛ he je hu nɛ e ngɛ zugba a gbee ɔ?’

⁸ Se ngmɔ hulɔ ɔ he nɔ nɛ e de lɛ ke: ‘Nyɔmtsɛ, ha nɛ e hi si jeha nɛ ɔ hulɔ kɛ maa su be nɛ ma tsua he nɛ ma wo sisi kuku,

⁹ kaa alinɔ e maa wo yiblii lo; se ke pi ja a loko o po lɛ ngɔ fɔ si.’ ”

Yesu tsa yo ko nɛ kpɛ ngɛ Hejɔɔmi Ligbi ɔ nɔ

¹⁰ Hejɔɔmi Ligbi ɔ eko nɔ ɔ, Yesu ngɛ ni tsɔɔe ngɛ kpe he ɔ eko,

¹¹ nɛ oʼɛ, yo ko ngɛ lejɛ ɔ nɛ mumi yayami wo lɛ hiɔ jeha nyɔngma kɛ kpaanyɔ, nɛ e kpɛ, nɛ enyɛ we e mi nɛ e kpa kulaa po.

¹² Se benɛ Yesu na lɛ ɔ, e tsɛ lɛ nɛ e de lɛ ke: “Yo, a pɛne mo ngɛ o hiɔ ɔ mi!”

¹³ Nɛ e kɛ e ninehi pue e nɔ, nɛ amlɔ ɔ nɔuu ɔ, e da tlɔmɔɔ, nɛ e wo Mawu hɛ mi nyami.

¹⁴ Se kpe he nɔkɔtɔma a muklii mi wo la akɛnɛ Yesu tsa nɔ ngɛ Hejɔɔmi Ligbi ɔ nɔ ɔ, nɛ e he nɔ nɛ e de asafo ɔ ke: “Ligbi ekpa lɛ ngɛ nɛ sa kaa a tsuɔ ni ngɛ mi; lɔ ɔ he je ɔ nyɛɛ ba ngɛ lɛ be ɔmɛ a mi konɛ a tsa nyɛ, se pi ngɛ Hejɔɔmi Ligbi ɔ nɔ!”

¹⁵ Se Nyɔmtsɛ ɔ he nɔ nɛ e de lɛ ke: “Osatotsɛmɛ! Anɛ Hejɔɔmi Ligbi ɔ nɔ ɔ nyɛ ti nɔ tsuaa nɔ pɛne we e na loo e teji ngɛ niyeni nɔ́ ɔ he kpakaa we lɛ ya ha we lɛ nyu lo?

¹⁶ Oʼɛ, kikɛmɛ a yo nɛ ɔ nɛ ji Abraham bi yo nɛ Satan fi lɛ kikɛmɛ a jeha nyɔngma kɛ kpaanyɔ nɛ ɔ ɔ, anɛ e dɛ́ kaa a pɛneɔ lɛ ngɛ kikɛmɛ a kpa nɛ ɔ mi ngɛ Hejɔɔmi Ligbi ɔ nɔ lo?”

¹⁷ Nɛ benɛ e de enɛ ɔ ɔ, zo gbe e henyɛli ɔmɛ tsuo, nɛ asafo ɔ tsuo na buajɔmi ngɛ nyakpɛ nihi nɛ e pee ɔ kulaa he.

Sinapi wu ɔ he abɛ ɔ

¹⁸ Jeha nɛ ɔ Yesu ke: “Mawu matsɛ yemi ɔ ngɛ kaa mɛni, nɛ mɛni he ma ngɔ to?

¹⁹ E ngɛ kaa sinapi wu kake ngmelu nɛ nyumu ko ngɔ nɛ e ya du ngɛ e ngmɔ mi, nɛ e puɛ, nɛ e pee tso kpetekpleenyɛ, nɛ hiɔwe lohwe pɛlitsɛmɛ baa ba peɔ tsuhi ngɛ e kɔni ɔmɛ a mi.”

Ma sasɛ ɔ he abɛ ɔ

²⁰ Nɛ e de ekohu ke: “Mɛni he ma ngɔ Mawu matsɛ yemi ɔ ngɔ to?

²¹ E ngɛ kaa ma sasɛ nɛ yo ko ngɔ nɛ e ngɔ wo sowe etɛ mi kɛ ya su be nɛ kulaa sa.”

Agbo tokofii ɔ

²² Nɛ Yesu ya kpa mahi kɛ kɔpehi a mi tsɔɔ ni, nɛ e po mi kɛ yaa Yerusalem.

²³ Nɛ nɔ ko bi lɛ ke: “Mawetsɛ, anɛ nihi bɔɔ kɛkɛ yiwami a ma he lo?” Se e de mɛ ke:

²⁴ “Nyɛɛ plee agbo tokofii ɔ mi sɛmi he, ejakaa i ngɛ nyɛ dee ke, nihi fuu ma hla nɛ a sɛ mi, se a be nyɛe.

²⁵ “Be mi nɛ we tsɛ ɔ te si nɛ e ya nga sinya a, nɛ nyɛ ma bɔni sinya a simi ngɛ se je, nɛ nyɛ ma de ke: ‘Nyɔ́mtsɛ, Nyɔmtsɛ, bli wɔ,’ nɛ e ma he nɔ nɛ e ma de nyɛ ke: I li he nɛ nyɛ je’ ɔ,

²⁶ kɛkɛ ɔ nyɛ ma bɔni demi ke: ‘Wa ye ni nɛ wa nu ni ngɛ o hɛ mi, nɛ o tsɔɔ ni ngɛ wa magbɛ ɔmɛ a mi.’

²⁷ Nɛ e ma de mɛ ke: ‘I ngɛ nyɛ dee ke i li he nɛ nyɛ je; nyɛɛ je ye nɔ nyɛ ninɛmɛ nɛ nyɛ tsuɔ nihi nɛ dɛ blɔ!’ ɔ,

²⁸ lejɛ ɔ ya fomi kɛ lungu nya kpemi maa hi, benɛ nyɛ maa na Abraham kɛ Isak kɛ Yakob kɛ gbali ɔmɛ tsuo ngɛ Mawu matsɛ yemi ɔ mi nɛ nyɛ nitsɛmɛ lɛɛ a fie nyɛ ɔ.

²⁹ Nɛ nihi maa je beleku (pu je he) kɛ bonyoku (puisinɔ he) kɛ omlɛyi (hue mi je) kɛ leneyi (wo si je) maa ba nɛ a ma ba hi okplɔɔ he ngɛ Mawu matsɛ yemi ɔ mi.

³⁰ Nɛ oʼɛ, sekpɛtsɛmɛ ngɛ nɛ maa pee kekletsɛmɛ, na kekletsɛmɛ hu ngɛ nɛ maa pee sekpɛtsɛmɛ.

Suɔmi nɛ Yesu ngɛ kɛ ha Yerusalem

³¹ Jamɛ a be ɔ mi nɔuu ɔ, Farisifo ɔmɛ ekomɛ ba e ngɔ ba de lɛ ke: “Jee hiɛ ɔ nɛ o ho, ejakaa Herode ngɛ mo hlae nɛ e gbe.”

³² Nɛ e de mɛ ke: “Nyɛɛ ya nɛ nyɛ ya de jamɛ a kɔkɔbo ɔ ke: Oʼɛ, i ngɛ mumi yayamihi hiae, nɛ i ngɛ nihi tsae mwɔnɛ ɔ kɛ hwɔɔ, nɛ ligbi nɛ ji ligbi etɛ ɔ ma gbe nya.’

³³ Se kɛ̃ ɔ ja i nyɛɛ mwɔnɛ ɔ kɛ hwɔɔ kɛ hwɔɔ se, ejakaa e be mi bae kaa a maa gbe gbalɔ ko ngɛ he ko kaa ja Yerusalem.

³⁴ “Yerusalem, Yerusalem, mo nɛ o gbee gbali ɔmɛ, nɛ o fiaa nihi nɛ a tsɔɔ mɛ o ngɔ ɔ tɛ, si nyɛmɛ i hla kaa i buaa o bimɛ ɔmɛ a nya, kaa bɔ nɛ kungwɔ buaa e bimɛ a nyɛ ngɔ woɔ e pɛlihi a sisi ɔ, nɛ nyɛ kplɛɛ we.’

³⁵ Oʼɛ, a si nyɛ we ɔ we doku ha nyɛ. Se i ngɛ nyɛ dee ke: Nyɛ be mi nae hu kɛ maa su be nɛ e maa ba mi kaa nyɛ ma de ke: ‘A gbaa nɔ nɛ ma ngɛ Nyɔmtsɛ ɔ biɛ mi ɔ!’ ”