Luka 12 - Somi He Ɔ

Osatopeemi he kɔkɔbɔmi

¹ Jamɛ a be ɔ mi nɔuu ɔ, benɛ nihi akpe akpehi abɔ ba bua a he nyɛ nɛ nihi ngɛ nihi a nɔ nae ɔ, Yesu bɔni e kaseli ɔmɛ demi ke: “Kekleekle ɔ, nyɛ hɛ̃ nɛ hi nyɛ he nɔ ngɛ Farisifo ɔmɛ a ma sasɛ nɛ ji osato peemi ɔ he.

² Se nɔ́ ko be nɛ a tsi nɔ nɛ a be lɛ kpo jee, aloo nɛ a ngɔ laa nɛ a be lee.

³ Lɔ ɔ he ɔ, nɔ́ tsuaa nɔ nɛ nyɛ de ngɛ diblii mi ɔ, a maa nu ngɛ la hɛ mi; nɛ nɔ́ nɛ nyɛ tu ngɔ wo tue mi ngɛ se tsuhi a mi ɔ, a maa fiɛ ngɛ tsuhi a yi mi.”

Nɔ nɛ sa gbeyeyemi

⁴ “Se nyɛ, ye huɛmɛ ɔmɛ ɔ, i ngɛ nyɛ dee ke: Nyɛ ko ye nihi nɛ gbee nɔmlɔ tso ɔ nɛ kɔlɔ ɔ se ɔ a be nɔ́ ko nɛ a ma nyɛ maa pee hu ɔ gbeye.

⁵ Se ma tsɔɔ nyɛ nɔ nɛ sa nɛ nyɛɛ ye gbeye: Nyɛɛ ye nɔ nɛ ke e gbe se ɔ nɛ e ngɛ he blɔ kaa e ma sake ngɔ fɔ gehena mi ɔ gbeye. Ee, i ngɛ nyɛ dee ke, lɛ gbeye nyɛɛ ye.

⁶ “Anɛ pi pesewahi enyɔ nɛ a juaa otokliihi enuɔ lo? Se Mawu hɛ ji akpɛti kake ngmelu nɔ.

⁷ Se snyɛ yi bwɔmi tete a kane kulaa. Lɔ ɔ he ɔ nyɛ ko ye gbeye; nyɛ he jua wa pe otokliihi babauu.”

Yesu he odaseyemi ngɛ nimli a hɛ mi

⁸ “I ngɛ nyɛ dee ke: Nɔ tsuaa nɔ nɛ gbaa mi woɔ ye ta ngɛ nimli a hɛ mi ɔ, Nɔmlɔ Bi ɔ hu ma gba mi nɛ e maa wo e ta ngɛ Mawu bɔfo ɔmɛ a hɛ mi;

⁹ se nɔ nɛ kuaa mi ngɛ nimli a hɛ mi ɔ, a ma kua lɛ ngɛ Mawu bɔfo ɔmɛ a hɛ mi.

¹⁰ “Nɛ nɔ tsuaa nɔ nɛ maa tu munyu ko ngɔ si Nɔmlɔ Bi ɔ, a kɛ maa pa lɛ; se Mumi Klɔuklɔu ɔ lɛɛ, nɔ nɛ maa tu musu bɔmi munyu ko ngɔ si lɛ ɔ, a kɛ be lɛ pae.

¹¹ “Ke a kpaka nyɛ kɛ ya kpe he ɔmɛ kɛ matsɛmɛ kɛ ganɔhi a hɛ mi ɔ, nyɛ ko gba nyɛ he nya ngɛ bɔ nɛ loo nɔ́ nɛ nyɛɛ kɛ ma je nyɛ nya loo nɔ́ nɛ nyɛ ma de ɔ he.

¹² Ejakaa nɔ́ nɛ sa kaa nyɛ de ɔ. Mumi Klɔuklɔu ɔ maa tsɔɔ nyɛ ngɛ lɛ ngmlɛfia a nɔ nɔuu.”

Niatsɛ kuasia a he abɛ ɔ

¹³ Kɛkɛ nɛ nɔ ko je asafo ɔ mi ba de lɛ ke: “Tsɔɔlɔ, de ye nyɛmi ɔ nɛ e kɛ mi nɛ dla gbo si ni ɔmɛ.”

¹⁴ Se Yesu de lɛ ke: “Maminyumu, mɛnɔ wo mi kojolɔ loo ni dlalɔ ngɛ nyɛ nɔ?”

¹⁵ Nɛ e de mɛ ke: “Nyɛ hɛ nɛ hi nyɛ he nɔ saminya ngɛ hɛ tsumi he; ejakaa pi nɔmlɔ ni nɛ e na nɛ be nɔ ɔ mi nɛ e wami ngɛ.”

¹⁶ Nɛ e bu mɛ abɛ ke: “Nyumu niatsɛ ko zugba ba ni babauu;

¹⁷ nɛ e susu ngɛ e yi mi ke: ‘Kɛ ma pee kɛɛ, akɛnɛ i be he nɛ i kɛ ye ngmɔ mi ni maa to nɛ ɔ?’

¹⁸ Nɛ e ke: ‘Nɔ nɛ ma pee ji nɛ ɔ nɛ: Ma kuɔ ye gba a ngɔ pue si, nɛ ma ma nguahi, nɛ ma to ye ngmɔ mi ni kɛ ye ni ɔmɛ tsuo ngɛ lejɛ ɔ;

¹⁹ nɛ ma de ye klaa ke: Ye klaa, o ngɛ nihi babauu nɛ a ngɔ to ha mo jehahi fuu; jɔɔ o he, ye nɛ o nu, nɛ o tsui nɛ nɔ o mi!’

²⁰ Se Mawu de lɛ ke: ‘Kuasia, nyɔ nɛ ɔ mi nɔuu ɔ, a ma bi o klaa si ngɛ o dɛ; nɛ nihi nɛ o dla ngɔ to ɔ, mɛnɔ nihi a maa pee?’

²¹ Jã nɔ nɛ toɔ juetli ngɔ haa lɛ nitsɛ e he, se e pi niatsɛ ngɛ Mawu blɔfami ɔ ngɛ.”

He kɛ Mawu nɔ fɔmi

²² Kɛkɛ nɛ Yesu de e kaseli ɔmɛ ke: “Lɔ ɔ he ɔ nyɛɛ lɛɛ i ngɛ nyɛ dee ke: Nyɛ ko hao nyɛ he ngɛ nyɛ klaa a he, nɔ́ nɛ nyɛ maa ye, aloo nɔmlɔ tso ɔ he, nɔ́ nɛ nyɛ maa wo.

²³ Klaa a pe ngma, nɛ nɔmlɔ tso ɔ hu pe tade.

²⁴ Nyɛ susu kuakualabite ɔmɛ a he; ejakaa a du we ni, jeha nɛ ɔ hu a kpa we, na a be nito he loo ngma gba po, se Mawu lɛɛ mɛ; nyɛɛ hyɛ bɔ nɛ nyɛ he jua wa hluu pe lohwe pɛlitsɛmɛ!

²⁵ Se nyɛ ti mɛnɔ nɛ ke e gba e he nya a nɛ e ma nyɛ tsa e kami nya ninekpɔ mi kake?

²⁶ Se ke nyɛ nyɛ we nɔ́ nɛ ji nyafii nɛ nyɛɛ pee ɔ, mɛ he je nyɛ gbaa nyɛ he nyɛ ngɛ nihi nɛ piɛ ɔmɛ a he mɔ?

²⁷ Nyɛ susu mɔmɔ ɔmɛ a he, bɔ nɛ a puɛɛ; a tsu we ni, nɛ jeha nɔ hu a tsɛ̃ we kpa, se i ngɛ nyɛ dee ke, Salomo kɛ e hɛ mi nyami ɔ tete mia we kaa enɛ ɔmɛ a ti kake.

²⁸ Jeha nɛ ɔ ke hu nɛ mwɔnɛ ɔ e ngɛ nga nɔ nɛ hwɔɔ nɛ a kɛ woɔ abolo tsu mi ɔ nɛ Mawu miaa lɛ kikɛ ɔ, anɛ e be nyɛ miae hluu pe mɛ, nyɛ nɛ nyɛ hemi kɛ yemi pi ɔ!

²⁹ Se nyɛɛ lɛɛ nyɛ ko bi nɔ́ nɛ nyɛ maa ye aloo nɔ́ nɛ nyɛ maa nu, nɛ jeha nɛ ɔ hu nyɛ yi mi nɛ ko pee nyɛ kɔsikɔsi.

³⁰ Ejakaa kikɛmɛ a ni nɛ ɔmɛ tsuo se je nɛ ɔ mi majeli a bimɛ ɔmɛ dii; se nyɛ tsɛ ɔ le kaa ni nɛ ɔmɛ a he ngɛ nyɛ hiae.

³¹ Nyɛ hla Mawu matsɛ yemi ɔ se blɔ mohu nɛ a maa ngɔ ni nɛ ɔmɛ tsuo ngɔ piɛ he ha nyɛ.”

Hiɔwe juetli

³² “Koo ye gbeye, asafo kuu nyafii, ejakaa nyɛ tsɛ ɔ ngɛ he tsui kaa e maa ngɔ matsɛ yemi ɔ ngɔ ha nyɛ.

³³ Nyɛɛ jua nihi nɛ nyɛ ngɛ ɔ nɛ nyɛ kɛ pee kpakpa. Nyɛ hla sika kpɛɛhi nɛ be momo pee; nyɛɛ to juetli nɛ be tae ngɛ hiɔwe, he nɛ juɔ ko be he sue nɛ wɔyewɔye kpe we ni ngɛ ɔ.

³⁴ Ejakaa he nɛ nyɛ juetli ɔ ngɛ ɔ, lejɛ ɔ nyɛ tsui hu maa hi.”

Sɔmɔli nɛ buu

³⁵ “Nyɛɛ fi nyɛ Tnlɛ mi nɛ nyɛ ha nyɛ kane ɔmɛ nɛ tso;

³⁶ nɛ nyɛɛ pee kaa nihi nɛ ngɛ a nyɔmtsɛ blɔ hyɛe be mi nɛ e maa je yokpeemi ɔ kɛ ba a, konɛ ke e ba nɛ e ba si ɔ, kɛkɛ nɛ a bli lɛ amlɔ.

³⁷ A gbaa jamɛ a tsɔli ɔmɛ nɛ benɛ a nyɔmtsɛ ɔ maa ba a nɛ e ma ba na mɛ kaa a ngɛ nyɔ fɔe ɔ! Niinɛ, i ngɛ nyɛ dee ke e maa mia nɛ e ma ha a hi si ngɛ niyeni he, nɛ e maa ba ba sɔmɔ mɛ.

³⁸ Nɛ ke e ba nyɔ mi kpɛti loo makɛ nɛ e ba na mɛ jã a, a gbaa jamɛ a tsɔli ɔmɛ!

³⁹ Se nyɛ na le enɛ ɔ kaa, ke wetsɛ ɔ le ngmlɛfia nɔ nɛ juɔ ɔ baa a jinɛ e maa bu nɛ e be blɔ ngmɛe nɛ a ywia e tsu ɔ ngɔ wo mi.

⁴⁰ Lɔɔ he ɔ nyɛ hu nyɛ dla nyɛ he ngɔ to, ejakaa, ngmlɛfia nɛ nyɛ hɛ be nɔ ɔ nɔ Nɔmlɔ Bi ɔ maa ba.”

Sɔmɔlɔ anɔkualetsɛ kɛ sɔmɔlɔ lakpatsɛ

⁴¹ Petro de Yesu ke: “Mawetsɛ, wɔ o ngɛ kikɛmɛ a abɛ nɛ ɔ bue ɔ, aloo ni ɔmɛ tsuo hu ngɛ mi?”

⁴² Nyɔmtsɛ ɔ ha heto ke: “Se mɛnɔ mɔ ji tsɔlɔ nɔkɔtɔma anɔkualetsɛ kɛ ni lelɔ, nɛ e nyɔmtsɛ ɔ maa wo lɛ nɔkɔtɔma ngɛ e webihi a nɔ, konɛ e ha mɛ a niyeni ngɛ be nɛ sa mi ɔ?

⁴³ A gbaa jamɛ a tsɔlɔ ɔ, nɔ nɛ ke e nyɔmtsɛ ɔ ba nɛ e ma ba na lɛ kaa e ngɛ jã pee ɔ.

⁴⁴ I ngɛ nyɛ dee anɔkuale mi ke e maa wo lɛ nɔkɔtɔma ngɛ e ni ɔmɛ kulaa nɔ.

⁴⁵ Se ke jamɛ a tsɔlɔ ɔ de ngɛ e tsui mi ke: ‘Ye nyɔmtsɛ ɔ ngɛ e bami be ɔ tsɛe kɛ ngɛ toe,’ nɛ e ma bɔni wenyumuhi kɛ weyi ɔmɛ gbemi kɛ da numi kɛ da demi ɔ;

⁴⁶ jamɛ a tsɔlɔ ɔ nyɔmtsɛ ɔ maa ba ngɛ ligbi nɛ e hyɛ we lɛ blɔ kɛ ngmlɛfia nɛ e li nɔ, nɛ e ma ba poo e mi, nɛ e ma ha lɛ e blɔfami nɔ kɛ ablaatsɛmɛ ɔmɛ.

⁴⁷ “Se jamɛ a tsɔlɔ ɔ nɛ le e nyɔmtsɛ suɔmi nya ni nɛ e dla we e he ngɔ tui nɛ e pa pee we e suɔmi nyɛ ni ɔ, a maa fia lɛ kpa fuu;

⁴⁸ se nɔ nɛ li nɛ e ya pee kpa fiami ni ɔ, a maa fia lɛ kpa bɔɔ ko. Se nɔ tsuaa nɔ nɛ a ngɔ fuu ngɔ ha lɛ ɔ, a ma hla fuu ngɛ e dɛ; nɛ nɔ nɛ a tu fuu ngɔ wo e dɛ ɔ, a ma bi nɔ́ nɛ be nɔ si ngɛ e dɛ.”

Migbami nɛ baa ngɛ Yesu he

⁴⁹ “I ba nɛ ma ba wo la ngɛ je ɔ mi, nɛ ke e hle momo ɔ, mɛni i ngɛ hlae ekohu!

⁵⁰ I ngɛ baptisimi ko nɛ a kɛ maa baptisi mi, nɛ hyɛ bɔ nɛ ye he ngɛ mi hiae kɛ maa su be nɛ a maa gbe nya!

⁵¹ Anɛ nyɛ susu kaa hejɔmi hami i ba ngɛ je ɔ mi lo? I ngɛ nyɛ dee ke: Dɛbi, se mi gbami mohu.

⁵² Ejakaa kɛ je be nɛ ɔ mi kɛ yaa nɛ ɔ ɔ, ni enuɔ maa gba ngɛ we kake mi, ni etɛ maa te si ngɔ wɔ ni enyɔ, nɛ ni enyɔ hu maa te si ngɔ wo ni etɛ;

⁵³ mi gbami maa ba tsɛ kɛ e bi nyumu, kɛ binyumu hu kɛ e tsɛ a kpɛti; kɛ nyɛ kɛ biyo kpɛti, kɛ biyo hu kɛ nyɛ kpɛti; nganyɛ kɛ e nganyɛ, e bi ɔ yo ɔ, kpɛti kɛ lɛ hu e kɛ e nganyɛ, e huno nyɛ ɔ, kpɛti.”

Be ɔ lemi

⁵⁴ Nɛ e de asafo ɔmɛ hu ke: “Ke nyɛ na bɔku nɛ ngɛ e he nya buae ngɛ bonyoku (pu sinɔ he) ɔ, amlɔ ɔ nyɛ deɔ ke: ‘Hiɔmi maa nɛ,’ nɛ e baa mi ja;

⁵⁵ nɛ ke leneyi (wo si) kɔɔhiɔ ngɛ fiae ɔ, nyɛ deɔ ke: ‘Latsa maa ba,’ nɛ e baa mi.

⁵⁶ Osatotsɛmɛ, nyɛ le hiɔwe kɛ je mi nihi a sisi tsɔɔmi; se kɛ pee kɛɛ nɛ nyɛ li yi nɔ nɛ ɔ sisitsɔɔmi ɔ?”

O kɛ o pɛbilɔ ɔ nɛ dla

⁵⁷ “Nɛ mɛ he je nɛ nyɛ nitsɛmɛ nyɛ kojo we nɔ́ nɛ da blɔ ha we nyɛ he ɔ?

⁵⁸ Se ke o kɛ o pɛbilɔ yaa kojolɔ hɛ mi ɔ, bɔɔ mɔde nɛ o kɛ lɛ nɛ dla ngɛ blɔ ɔ nɔ, konɛ e ko sã mo ya ha kojolɔ ɔ, nɛ kojolɔ ɔ hu ngɔ mo ngo ha polisi ɔ, nɛ polisi ɔ wo mo tsu mi.

⁵⁹ I ngɛ mo dee ke: O be lejɛ ɔ jee gblegbleegblee ja o wo nyagbe pesewa a lolo.”