Luka 1 - Somi He Ɔ

Sisijemi

¹ Akɛnɛ nihi fuu kɔ fɔ a nɔ kaa a maa ngma sanehi nɛ ba mi ngɛ wa kpɛti ɔ,

² kaa bɔ nɛ nihi nɛ na kɛ a hɛngmɛ kɛ je sisije nɛ a ji munyu ɔ he sɔmɔli ɔmɛ fie tsɔɔ wɔ ɔ,

³ e sa ye hɛ mi kaa imi hu, nɛ i hla lɛ tsuo mi fitsofitso kɛ je sisije ɔ, ma ngma pɛpeepɛ ha mo, Teofilo kpakpa;

⁴ kone o na munyuhi nɛ a tsɔɔ mo ɔ mi anɔkuale.

Yohane Baptisilɔ ɔ fɔmi he siwomi

⁵ Yuda matsɛ Herode yinɔ ɔ, osɔfo ko hi si nɛ a tsɛɛ lɛ Zakaria nɛ je Abia osɔfohi a weku ɔ mi; nɛ e yo ɔ je Aaron bimɛ yi ɔmɛ a kpɛti, nɛ e biɛ ji Elisabet.

⁶ Nɛ mɛ ni enyɔ ɔ tsuo ɔ dali ji mɛ ngɛ Mawu hɛ mi, nɛ a yeɔ Nyɔmtsɛ ɔ kitahi kɛ e mlaa amɛ kulaa nɔ, nɛ piami ko be a he.

⁷ Se a be bi, ejakaa Elisabet ɔ yosa ʼi, nɛ mɛ ni enyɔ ɔ tsuo a bwɔ.

⁸ Bene Zakaria ngɛ ni tsue kaa osɔfo ngɛ Mawu hɛ mi

⁹ kaa bɔ nɛ osɔfo yemi blɔnya tomi ɔ ngɛ ɔ, e ba mi kaa a hla lɛ kaa e ya Nyɔmtsɛ ɔ sɔlemi tsu ɔ mi nɛ e ya sa tsopa kɛ e he via,

¹⁰ nɛ tsopa kɛ e he via sami be ɔ mi ɔ, ma asafo ɔ tsuo ngɛ sɔlee ngɛ agbo ɔ nya.

¹¹ Nɛ Nyɔmtsɛ ɔ bɔfo ko ba je e he kpo tsɔɔ lɛ, nɛ e daa si ngɛ tsopa kɛ e he via sami latɛ ɔ hiɛ ɔ nɔ.

¹² Nɛ benɛ Zakaria na lɛ ɔ, e tsui po nɛ e ye gbeye.

¹³ Se bɔfo ɔ de lɛ ke: “Koo ye gbeye, Zakaria, ejakaa a bu o pɛɛ kpami ɔ tue, nɛ o yo Elisabet ma fɔ bi nyumu ha mo, nɛ o wo lɛ biɛ Yohane.

¹⁴ E maa pee mo buajɔmi kɛ nyami, nɛ nihi fuu ma nya e fɔmi ɔ he.

¹⁵ Ejakaa e maa pee nɔ ngua ngɛ Nyɔmtsɛ ɔ hɛ mi; nɛ e be wai loo da nɛ nya wa ko nue, nɛ Mumi Klɔuklɔu ɔ ma hyi lɛ tɔ kɛ maa je e nyɛ muklii mi lokoo.

¹⁶ Nɛ e maa kpale Israelbi ɔmɛ a ti nihi fuu kɛ maa ba Nyɔmtsɛ, a Mawu ɔ ngɔ.

¹⁷ Nɛ e maa sɛ e hlami ngɛ Elia mumi kɛ e hewami mi, nɛ e ya dɔ tsɛmɛ a tsui kɛ ba a bimɛ a he, kɛ tue gboli kɛ ba dali a ni lemi mi, nɛ e dla ma a ngɔ to Nyɔmtsɛ ɔ.”

¹⁸ Zakaria de bɔfo ɔ ke: “Mɛni i kɛ maa le enɛ ɔ? Ejakaa imi lɛɛ nɔmoyo ji mi, nɛ ye yo hu bwɔ.”

¹⁹ Nɛ bɔfo ɔ ha lɛ heto ke: “Imi ji Gabriel nɛ daa Mawu hɛ mi ɔ nɛ, nɛ a tsɔ mi ke ma ba de mo nɛ ma sɛɛ Sane Kpakpa nɛ ɔ ha mo.

²⁰ Nɛ oʼɛ, o nya ma ma nɛ o be nyɛe munyu tumi kɛ maa su ligbi nɛ ni nɛ ɔmɛ maa ba mi, ejakaa o he we munyu ɔmɛ nɛ maa ba mi ngɛ a be mi ɔ yi.”

²¹ Nɛ ma a ngɛ Zakaria mlɛe, nɛ a hɛ mi pee mɛ yaa akɛnɛ e se ya kɛ ngɛ sɔlemi tsu ɔ mi ɔ.

²² Se bene e je kpo e nyɛ we nɛ e kɛ mɛ nɛ tu munyu, nɛ a kɔ se kaa e ya na nɔ́ ko ngɛ sɔlemi tsu ɔ mi. E fɔ mɛ nine se e nyɛ we munyu nɛ e tu.

²³ Nɛ benɛ e sɔmɔmi ligbi ɔmɛ a nya ta a, e je kɛ ho lɛ nitse e we ɔ mi ya.

²⁴ Nɛ jamɛ a ligbi ɔmɛ a se ɔ, e yo Elisabet ngɔ hɔ, nɛ e laa e he hlami enuɔ nɛ e ke:

²⁵ “Nyɔmtsɛ ɔ pee enɛ ɔ kɛ je ye zo ɔ ngɛ nimli a kpɛti.”

Yesu fɔmi he gbami

²⁶ Hlami nɛ ji ekpa a nɔ ɔ, Mawu tsɔ bɔfo Gabriel kɛ ya Galilea ma ko nɛ a tsɛɛ Nazaret ɔ mi,

²⁷ ngɛ zangmayo ko nɛ a bi e si ha nyumu ko nɛ a tsɛɛ lɛ Yosef nɛ je David weku ɔ mi ɔ ngɔ. Zangmayo ɔ biɛ ji Maria.

²⁸ Nɛ bɔfo ɔ ba e ngɔ nɛ e ke: “Mo he manye, mo nɔ nɛ a dloo mo, Nyɔmtsɛ ɔ kɛ mo ngɛ!”

²⁹ Se benɛ e nu ɔ, e tsui po, nɛ e susu ke mɛni ngami ji nɛ ɔ?

³⁰ Se bɔfo ɔ de lɛ ke: “Koo ye gbeye, Maria, ejakaa o hɛ mi ba nyami ngɛ Mawu hɛ mi.

³¹ Bu tue, lo ma na muklii nɛ o ma fɔ bi nyumu, nɛ o wo lɛ biɛ Yesu.

³² E maa pee nɔmlɔ ngua, nɛ a ma tsɛ lɛ Hiɔweno ɔ bi, nɛ Nyɔmtsɛ Mawu maa ngɔ e tsɛ David matsɛ sɛ ɔ ngɔ ha lɛ.

³³ Nɛ e maa ye Yakob we ɔ nɔ matsɛ kɛ maa ya neneene, nɛ e matsɛ yemi ɔ se be poe.”

³⁴ Maria bi bɔfo ɔ ke: “Kɛ maa pee kɛɛ nɛ enɛ ɔ maa ba mi? I li nyumu.”

³⁵ Nɛ bɔfo ɔ ha lɛ heto ke: “Mumi Klɔuklɔu maa ba o nɔ, nɛ lɔ ɔ he ɔ jamɛ a bi klɔuklɔu ɔ hu nɛ o ma fɔ ɔ, a ma tsɛ lɛ Mawu bi.

³⁶ Nɛ oʼɛ, o wekuno Elisabet ɔ hu ngɔ bi nyumu hɔ ngɛ e bwɔmi si, nɛ nɔ nɛ a tsɛɛ lɛ yosa a na hlami ekpa.

³⁷ Ejakaa nɔ́ ko nɔ́ ko wɛ́ hi Mawu.”

³⁸ Nɛ Maria ke: “Oʼɛ Nyɔmtsɛ ɔ weyo ji mi, e ba mi ngɛ o munyu ɔ nya!” Nɛ bɔfo ɔ si lɛ.

Maria ya slaa Elisabet

³⁹ Nɛ Maria te si ngɛ lɛ jamɛ a be ɔ mi nɛ e pue nɔ oya kɛ ho Yudea ma ko ngɛ yoku ɔmɛ a nɔ ɔ mi ya,

⁴⁰ nɛ e ya sɛ Zakaria we ɔ mi nɛ e nga Elisabet.

⁴¹ Nɛ e ba mi kaa benɛ Elisabet nu Maria ngami ɔ, bimwɔyo ɔ hua ngɛ e mi mi; nɛ Mumi Klɔuklɔu hyi Elisabet tɔ.

⁴² Nɛ e kpa ngmlaa wawɛɛ ke: “A gbaa mo ngɛ yihi a ti, nɛ a gbaa o mi mi bi ɔ!

⁴³ Nɛ jije enɛ ɔ je kɛ ba ha mi nɛ ye Nyɔmtsɛ nyɛ ma ye ngɔ nɛ ɔ?

⁴⁴ Se oʼɛ, amlɔ pɛ nɛ o ngami ɔ pɛ ngɛ ye tue mi ɔ, bimwɔyo ɔ kɛ nyami hua ngɛ ye muklii mi.

⁴⁵ Nɛ sa gbaa mo, mo nɔ nɛ o he ye kaa munyuhi nɛ a je Nyɔmtsɛ ɔ ngɔ ba de ɔ maa ba mi ɔ.”

Maria yijemi la

⁴⁶ Nɛ Maria ke: “Ye klaa ngɛ Nyɔmtsɛ ɔ agboje ɔ fiɛe,

⁴⁷ Nɛ ye mumi ngɛ Mawu ye yiwami-helɔ ɔ yi jee,

⁴⁸ Kaa e kai e weyo humi nɛ e ji ɔ, Ejakaa oʼɛ, kɛ je mwɔ nɛ ɔ ligbi nɛ ɔ nɔ ɔ, yi nɔhi kulaa maa gbaa mi.

⁴⁹ Ejakaa Ope ɔ pee ni nguahi ha mi; Nɛ klɔuklɔu ji e biɛ ɔ,

⁵⁰ Nɛ e mɔbɔ nami ngɛ nihi nɛ yee lɛ gbeye ɔmɛ a nɔ kɛ yaa su yi nɔhi a yinɔ.

⁵¹ E kɛ e nine tsu hewami ni tsumi; Nihi nɛ woɔ a he ngɛ a tsui mi susumi mi ɔ, e gbɛ mɛ fia.

⁵² E kpa hewali kɛ je a sɛ ɔmɛ a nɔ, Nɛ e wo nihi nɛ ji humi ɔmɛ a nɔ.

⁵³ E ha hwɔ hwɔli tɔ kɛ ni kpakpahi, Nɛ he nali ɔmɛ ɔ, e fie mɛ kɛ ho dɛ gu.

⁵⁴ E ye bua e wenyumu Israel, Konɛ e kai e mɔbɔ nami ɔmɛ,

⁵⁵ Kaa bɔ nɛ e de wa tsɛmɛ ɔmɛ, Kɛ ha Abraham kɛ e nina kɛ yaa neneene ɔ.”

⁵⁶ Nɛ Maria kɛ Elisabet hi si maa pee hlami ete, nɛ e kpale kɛ ho e ma a mi ya.

Yohane Baptisilɔ ɔ fɔmi

⁵⁷ Jeha nɛ ɔ Elisabet fɔmi be su, nɛ e fɔ bi nyumu.

⁵⁸ Nɛ benɛ e pakabi kɛ e wekuli nu kaa Nyɔmtsɛ ɔ na lɛ mɔbɔ babauu ɔ, a kɛ lɛ nya.

⁵⁹ Nɛ ligbi nɛ ji ligbi kpaanyɔ ɔ, a ba bimwɔyɔ ɔ pomi, nɛ jinɛ a kɛ e tsɛ biɛ Zakaria a yaa wo lɛ.

⁶⁰ Se e nyɛ he nɔ nɛ e de ke: “Dɛbi, se a wo lɛ Yohane mohu!”

⁶¹ Nɛ a de lɛ ke: “Nɔ ko be o weku ɔ mi nɛ a tsɛɛ lɛ ja!”

⁶² Nɛ a kɛ a nine pee okadi kɛ bi e tsɛ bɔ nɛ e suɔ nɛ a tsɛ lɛ.

⁶³ Nɛ e bi tso sleeti ko, nɛ e ngma ngɛ nɔ ke: “Yohane ji e biɛ.” Nɛ e pee mɛ tsuo nyakpɛ.

⁶⁴ Nɛ amlɔ ɔ nɔuu ɔ Zakaria nya bli nɛ e lilɛ kpa pɛne, nɛ e tu munyu kɛ je Mawu yi.

⁶⁵ Nɛ gbeye nu e pakabi ɔmɛ tsuo, nɛ a tu ni nɛ ɔmɛ tsuo he munyu ngɛ Yudea yoku ɔmɛ kulaa nɔ.

⁶⁶ Nɛ nihi tsuo nɛ nu ɔ ngɔ to a yi mi nɛ a ke: “Mɛni po jokuɛ nɛ ɔ maa pee? Ejakaa Nyɔmtsɛ ɔ nine ngɛ e nɔ.

Zakaria gbami

⁶⁷ Nɛ e tsɛ Zakaria hyi gbagbaagba kɛ Mumi Klɔuklɔu, nɛ e gba de ke:

⁶⁸ “A gbaa Nyɔmtsɛ, Israel Mawu ɔ, Kaa de ba slaa e ma a, nɛ e tsu Kpɔmi nihi ha mɛ,

⁶⁹ Nɛ e tle yi wami hemi koli si Ngɔ ha wɔ ngɛ e wenyumu David we ɔ,

⁷⁰ Kaa bɔ nɛ e de kɛ je blema lokoo ngɛ e gbali klɔuklɔu ɔmɛ a nya a;

⁷¹ Ke e ma he wa yi wami kɛ maa je Wa henyɛli kɛ nihi nɛ wa he tsɛɛ mɛ ɔ a dɛ mi;

⁷² Nɛ e na wa tsɛmɛ ɔmɛ mɔbɔ. Nɛ e kai e somi klɔuklɔu ɔ,

⁷³ Kita nɛ e ka wa tsɛ Abraham ɔ,

⁷⁴ Ke e ma ha a je wɔ kɛ je wa henyɛli a dɛ mi, Nɛ wa sɔmɔ lɛ nɛ gbeye yemi ko ko hi mi,

⁷⁵ Ngɛ he tsɔmi kɛ dami mi Ngɛ e hɛ mi wa ligbihi abɔ tsuo

⁷⁶ Nɛ mo, jokuɛ nɛ ɔ, A ma tsɛ mo hiɔwe lokoono ɔ gbalɔ; Ejakaa o maa sɛ Nyɔmtsɛ ɔ hlami Nɛ o ya dla e blɔ ɔmɛ ngɔ to lɛ,

⁷⁷ Konɛ o ngɔ yi wami hemi he ni lemi Ngɔ ha e ma a ngɛ a he yayami mi,

⁷⁸ Ngɛ wa Mawu ɔ mɔbɔ nami Nɛ haa e mi mi saa lɛ ɔ nya, Nɔ́ nɛ ha je nami nɛ je hiɔwe ɔ ba slaa wɔ nɛ ɔ,

⁷⁹ Konɛ je mi nɛ tsɔ ha nihi Nɛ hii si ngɛ diblii gbenɔ hɔ mi ɔ, Nɛ e plɛ wa nane kɛ ya he jɔmi blɔ ɔ nɔ.”

⁸⁰ Nɛ jokuɛ ɔ ba wa, nɛ e he wa ngɛ mumi mi, nɛ e hi nga a nɔ kɛ ya su ligbi nɛ e je e he kpo ngɔ tsɔɔ Israel.