Kpojemi 9 - Somi He Ɔ

¹ Kɛkɛ nɛ hiɔwe bɔfo nɛ ji enuɔ ɔ kpa e titimati ɔ, nɛ i na dodoe ko je hiɔwe ba nɔ zugba a nɔ, nɛ a ngɔ muɔ voo ɔ nya safe ɔ ngɔ ha lɛ.

² Nɛ e bli muɔ voo ɔ nya, nɛ lasuku te si kɛ je muɔ ɔ mi kaa abolo tsu ngua mi lasuku, nɛ pu kɛ hiɔwe wo diblii ngɛ muɔ ɔ mi lasuku ɔ he.

³ Nɛ baalɛhi je lasuku ɔ mi kɛ ba zugba a nɔ; nɛ a ha mɛ he wami kaa he wami nɛ nyingmogblakotohi hɛɛ ngɛ zugba a nɔ ɔ.

⁴ Nɛ a de mɛ ke a ko pee zugba a nɔ nga loo ba mumu loo tso ko yayami ko, kaa ja nimli nɛ be Mawu nya sɔumi nɔ́ ɔ okadi ngɛ a hɛ nya a kɛkɛ.

⁵ Nɛ a tsi a nya kaa a ko gbe nimli ɔmɛ, se mohu a pii mɛ hlami enuɔ. Nɛ a nya yeyee ɔ ngɛ kaa nyingmogblakoto nɛ tsɛ̃ɔ nɔ nya yemi.

⁶ Lɛ hlami enuɔ nɛ ɔ mi ɔ, nimli ma hia gbenɔ, se a be nae, nɛ a maa suɔ kaa a ko gbo, se gbenɔ maa tu a nya fo.

⁷ Baalɛ ɔmɛ ngɛ kaa okpɔngɔhi nɛ a dla mɛ kɛ yaa ta, nɛ ni komɛ fi a yi kaa sika jlasi, nɛ a hɛ mi ngɛ kaa nimli a hɛ mi;

⁸ nɛ a yi bwɔmi ngɛ kaa yihi a yi bwɔmi, nɛ a lunguhi ngɛ kaa jatahi a nɔ.

⁹ A wo damihi kaa dade demahi, nɛ a plehi a mi pɛmi ngɛ kaa okpɔngɔhi babauu kɛ zugba lɛhi nɛ hɛɛ fo kɛ yaa ta;

¹⁰ nɛ a ngɛ hlemi kaa nyingmogblakotohi, nɛ kɛ̃ɛ ngɛ a hlemi ɔmɛ a nya, nɛ a ngɛ he wami kaa a pee nimli yayami hlami enuɔ.

¹¹ Nɛ a matsɛ ji muɔ woo ɔ mi bɔfo ɔ, nɛ a tsɛɛ lɛ ngɛ Hebri gbi mi ke Abadon, nɛ ngɛ Hela gbi mi ɔ, a tsɛɛ lɛ Apolion (Hɛmikpatalɔ).

¹² Kekleekle musu ɔ be; oʼɛ, musuhi enyɔ ma ngɛ ni nɛ ɔmɛ a se.

¹³ Kɛkɛ nɛ hiɔwe bɔfo nɛ ji ekpa a kpa e titimati ɔ, nɛ i nu gbi ko kɛ je sika tsu bɔ sami latɛ nɛ maa si ngɛ Mawu hɛ mi ɔ kolohi eywiɛ ɔmɛ a mi

¹⁴ de hiɔwe bɔfo nɛ ji ekpa a nɛ hɛɛ titimati ɔ ke: “Pɛne hiɔwe bɔfohi eywiɛ nɛ a fi mɛ ngɛ Eufrate pa ngua a nya a!”

¹⁵ A pɛne hiɔwe bɔfohi eywiɛ ɔ nɛ a dla to ngmlɛfia a kɛ ligbi ɔ kɛ hlami ɔ kɛ jeha a, konɛ a gbe nimli a mi dlami etɛ mi kake.

¹⁶ Nɛ aslaafohi nɛ hi okpɔngɔhi a nɔ ɔ, i nu kaa a nya ji akpe nyingmi enyɔ totoe akpe nyɔngma.

¹⁷ Nɛ bɔ nɛ i na okpɔngɔ ɔmɛ kɛ a nɔ hili ɔmɛ ngɛ ni nami ɔ mi ji nɛ ɔ nɛ: A damahi nɛ a wo ɔ su ngɛ kaa la kɛ alamua yumu kɛ kungwɔ zɔ; nɛ okpɔngɔ ɔmɛ a yihi ngɛ kaa jatahi a yi, nɛ la kɛ lasuku kɛ suɔɔ ngɛ hiae kɛ ngɛ a nya mi jee.

¹⁸ Kikɛmɛ a haomi etɛ nɛ ji la kɛ lasuku kɛ suɔɔ nɛ ngɛ hiae kɛ ngɛ a nya mi jee nɛ ɔ, a kɛ gbe nimli a mi dlami etɛ mi kake.

¹⁹ Ejakaa okpɔngɔ ɔmɛ a he wami ngɛ a nya mi kɛ a hlemihi a mi, ejakaa a hiemi ɔmɛ ngɛ kaa sinɔhi, nɛ yihi ngɛ a he, nɛ kɔlɔ ɔmɛ a kɛ peɔ yayami.

²⁰ Nɛ nimli nɛ piɛ nɛ a gbi mɛ ngɛ kikɛmɛ a haomi nɛ ɔmɛ a mi ɔ, a tsakee we a tsui kɛ ji a nine nya ni tsumi ɔmɛ a he, konɛ a jɔɔ mumi yayamihi kɛ sika tsu kɛ sika hiɔ kɛ ayawa kɛ tɛ kɛ tso amagahi nɛ hyɛ we nɔ́ nɛ a nui nɔ́ nɛ a nyɛ we nɛ a nyɛɛ ɔ jami.

²¹ Jehanɛ hu, a tsake we a tsui kɛ ji a awi yemi kɛ a nyuami kɛ ajuama bɔmi kɛ a jumi ɔmɛ a mi.