Kpojemi 7 - Somi He Ɔ

Israelbi akpe lafa nyingmi eywiɛ kɛ eywiɛ ɔ

¹ Enɛ ɔ se ɔ, i na hiɔwe bɔfohi eywiɛ nɛ a daa si ngɛ zugba kɔ nya eywiɛ ɔmɛ a nɔ, nɛ a hɛɛ zugba a nɔ kɔɔhiɔ eywiɛ ɔ mi, konɛ kɔɔhiɔ ɔ ko fia ngɛ zugba a nɔ loo wo nɔ loo tso ko nɔ.

² Nɛ i na bɔfo kpa ko nɛ e ngɛ kuɔe kɛ ngɛ pu site he jee kɛ ma, nɛ e hɛɛ Mawu hɛ kalɔ ɔ nya sɔumi nɔ. E kpa ngmlaa wawɛɛ kɛ de bɔfohi eywiɛ nɛ a ha mɛ he wami kaa a pee zugba a kɛ wo ɔ yayami ɔ

³ ke: “Nyɛ ko pee zugba a loo wo ɔ loo tso ɔmɛ yayami ko kɛ maa su be nɛ waa kɛ nya sɔumi nɔ ma kadi wa Mawu ɔ sɔmɔli ɔmɛ a hɛ nya lolo.”

⁴ Nɛ a demi nihi nɛ a kɛ nya sɔumi nɔ́ ɔ kadi mɛ ɔ a yibɔ; nimli akpe lafa nyingmi eywiɛ kɛ eywiɛ nɛ a kɛ nya sɔumi nɔ́ ɔ kadi mɛ kɛ je Israelbi ɔmɛ a wetso tsuaa wetso mi.

⁵ Yuda wɛtso ɔ mi ɔ, a kɛ nya sɔumi nɔ́ ɔ kadi nimli akpe nyɔngma kɛ enyɔ; Ruben wɛtso ɔ mi ɔ, nimli akpe nyɔngma kɛ enyɔ; Gad wɛtso ɔ mi ɔ, nimli akpe nyɔngma kɛ enyɔ,

⁶ Aser wɛtso ɔ mi ɔ, nimli akpe nyɔngma kɛ enyɔ, Nafatali wɛtso ɔ mi ɔ, nimli akpe nyɔngma kɛ enyɔ, Manase wɛtso ɔ mi ɔ, nimli akpe nyɔngma kɛ enyɔ,

⁷ Simeon wɛtso ɔ mi ɔ, nimli akpe nyɔngma kɛ enyɔ, Levi wɛtso ɔ mi ɔ, nimli akpe nyɔngma lɛ enyɔ, Isakar wɛtso ɔ mi ɔ, nimli akpe nyɔngma kɛ enyɔ,

⁸ Zebulon wɛtso ɔ mi ɔ, nimli akpe nyɔngma kɛ enyɔ, Yosef wɛtso ɔ mi ɔ, nimli akpe nyɔngma kɛ enyɔ, Benyamin wɛtso ɔ mi ɔ, nimli akpe nyɔngma kɛ enyɔ.

Asafo kuu ngua a

⁹ Enɛ ɔ se ɔ i hyɛ, nɛ oʼɛ, nimli asafo nɛ nɔ ko nɔ ko be nyɛe maa kane nɛ je je mi ma tsuaa je mi ma kɛ wɛtsohi kɛ mahi kɛ mahi a nɔ gbihi a mi nɛ a daa si ngɛ matsɛ sɛ ɔ hɛ mi kɛ Tobi ɔ hɛ mi, nɛ a wo tade hiɔ, nɛ a hɛɛ tã kuɔmihi ngɛ a dɛ,

¹⁰ nɛ a kpa ngmlaa wawɛɛ ke: “Yi wami hemi ɔ ji wa Mawu nɛ hii si ngɛ matsɛ sɛ ɔ nɔ ɔ kɛ Tobi ɔ nɔ́!”

¹¹ Nɛ bɔfo ɔmɛ tsuo daa si ngɛ matsɛ sɛ ɔ kɛ nikɔtɔmahi hɛ kali eywiɛ ɔmɛ a he kɛ kpe, nɛ a kɛ a hɛ mi bu si ngɛ matsɛ sɛ ɔ hɛ mi, nɛ a ja Mawu

¹² ke: “Amen! Gbaami kɛ hɛ mi nyami kɛ ni lemi kɛ sina kɛ agboje kɛ he wami kɛ nyami ha wa Mawu ɔ kɛ je neneene kɛ ya neneene! Amen!”

¹³ Nɛ nikɔtɔma amɛ a ti nɔ kake he nɔ nɛ e bi mi ke: “Ninɛmɛ nɛ a wo tade hiɔ nɛ ɔ, mɛnɔmɛ ʼi, nɛ jije a je?”

¹⁴ Nɛ i de lɛ ke: “Ye Nyɔmtsɛ, mo lɛ o le.” Nɛ e de mi ke: “Nimli nɛ ɔmɛ ji nihi nɛ a je nɔ nami kpetekpleenyɛ ɔ mi ɔ nɛ; nɛ a fɔ a tade ɔmɛ a he, nɛ a ha a hiɛ futaa ngɛ Tobi ɔ muɔ ɔ mi.

¹⁵ Lɔ ɔ he nɛ a ngɛ Mawu matsɛ sɛ ɔ hɛ mi, nɛ a jaa lɛ nyɔ kɛ pia ngɛ se sɔlemi tsu ɔ mi ɔ nɛ; nɛ nɔ nɛ hii si ngɛ matsɛ sɛ ɔ nɔ ɔ maa ma e bo tsu ɔ ngɔ to anɔ.

¹⁶ Hwɔ be mɛ yee hu, nɛ kuma hu be mɛ tɔe hu, nɛ jeha nɛ hu, pu loo latsa ko be a he sae hu;

¹⁷ ejakaa Tobi ɔ nɛ ngɛ matsɛ sɛ ɔ kpɛti ɔ maa lɛ mɛ, nɛ e maa tsɔɔ mɛ blɔ kɛ maa ya wami nyu vuhi a he, nɛ Mawu ma tsu a hɛ mi vo nyu kulaa.