Kpojemi 5 - Somi He Ɔ

Womi ɔ kɛ Tobi ɔ

¹ I na womi kpo ko ngɛ nɔ nɛ hii si ngɛ matsɛ sɛ ɔ nɔ ɔ hiɛ ɔ nɔ, nɛ a ngma ni ngɛ e mi kɛ e se tsuo, nɛ a sɔu nya kɛ nya sɔumi ni kpaago.

² Nɛ i na bɔfo ngua ko nɛ e ngɛ fiɛe kɛ gbi ngua ke: “Mɛnɔ ji nɔ nɛ sa kaa e bli womi ɔ nya nɛ e tsɔ e nya sɔumi ni ɔmɛ?”

³ Se nɔ ko nɔ ko be hiɔwe loo zugba a nɔ loo zugba a sisi nɛ ma nyɛ womi ɔ nya nɛ e bli loo nɛ e hyɛ mi.

⁴ Nɛ i fo ya hluu, ejakaa a nɛ́ nɔ ko nɔ ko nɛ sa kaa e bli womi ɔ nya nɛ e kane loo nɛ e hyɛ mi.

⁵ Kɛkɛ nɛ nikɔtɔma amɛ a ti nɔ kake de mi ke: “Ko fo ya! oʼɛ jata a nɛ je Yuda wɛtso ɔ mi ɔ, nɔ nɛ ji David nina a, ye kunimi, nɛ e bli womi ɔ nya, nɛ e tsɔ e nya sɔumi ni kpaago ɔ.”

⁶ Nɛ i hyɛ nɛ oʼɛ, matsɛ sɛ ɔ kɛ hɛ kali eywiɛ ɔmɛ a kpɛti, kɛ nikɔtɔmahi nyingmi enyɔ kɛ eywiɛ ɔmɛ a kpɛti ɔ, Tobi ko daa si kaa nɔ nɛ a gbe lɛ, nɛ e ngɛ koli kpaago kɛ hɛngmɛ kpaago nɛ ji Mawu mumi kpaago ɔ nɛ a tsɔ kɛ ya zugba a tsuo nɔ ɔ.

⁷ Nɛ Tobi ɔ ba, nɛ e ba he womi kpo ɔ kɛ je nɔ nɛ hii si ngɛ matsɛ sɛ ɔ nɔ ɔ hiɛ ɔ nine mi.

⁸ Nɛ benɛ e ngɛ womi ɔ hee ɔ, hɛ kali eywiɛ ɔ kɛ nikɔtɔmahi nyingmi enyɔ kɛ eywiɛ ɔ bu si ngɛ Tobi ɔ hɛ mi, nɛ a ti nɔ tsuaa nɔ hɛɛ kpã saku kɛ sika tɔhi kɛ a mi tsopa kɛ e he via tɔtɔɔtɔ nɛ ji klɔuklɔu bi ɔmɛ a sɔlemi ɔmɛ.

⁹ Nɛ a la la he ko de ke: “Mo lɛ sa kaa o heɔ womi ɔ Nɛ o tsɔɔ e nya sɔumi ɔmɛ, Ejakaa a gbe mo, Nɛ o kɛ o muɔ ɔ kpɔ wɔ ha Mawu Kɛ je wetso tsuaa wetso kɛ munyu tsuaa munyu Kɛ ma tsuaa ma kɛ je ma tsuaa je ma mi.

¹⁰ Nɛ ɔ ngɔ wɔ ngɔ pee matsɛmɛ kɛ osɔfohi Ha wa Mawu ɔ, Nɛ wa maa ye matsɛ ngɛ zugba a nɔ.”

¹¹ Nɛ i hyɛ, nɛ i nu bɔfohi fuu nɛ bɔle matsɛ sɛ ɔ kɛ hɛ kali ɔmɛ kɛ nikɔtɔma amɛ a he kɛ kpe ɔmɛ a gbi, nɛ a nya ji akpe nyɔngma totoe akpe nyɔngma kɛ akpe totoe akpe,

¹² nɛ a kɛ gbi ngua de ke: “Tobi nɛ a gbe ɔ, Sa nɛ e ngɔ he wami kɛ ni nami Kɛ ni lemi kɛ nyɛmi kɛ agboje kɛ hɛ mi nyami kɛ gbaami.”

¹³ Nɛ i nu kaa bɔ ni ɔmɛ kulaa nɛ ngɛ hiɔwe kɛ zugba a nɔ kɛ zugba a sisi kɛ wo hɛ mi kɛ nihi kulaa nɛ ngɛ a mi ɔ ke: “A ngɔ gbaami kɛ agboje kɛ hɛ mi nyami Kɛ nɔ yemi ngɔ ha nɔ nɛ hii si ngɛ matsɛ sɛ ɔ nɔ Kɛ Tobi ɔ kɛ je neneene kɛ ya neneene!”

¹⁴ Nɛ hɛ kali eywiɛ ɔ ke: “Amen.” Nɛ nikɔtɔma amɛ bu si, nɛ a ja nɔ nɛ hɛ ngɛ kɛ je neneene kɛ yaa neneene ɔ.