Kpojemi 4 - Somi He Ɔ

Hiɔwe Ma wu jami

¹ Ni nɛ ɔmɛ a se ɔ i hyɛ, nɛ oʼɛ, sinya ko nɛ a bli ngɛ hiɔwe. Kekleekle gbi nɛ i nu nɛ ngɛ kaa titimati nɛ kɛ mi tu munyu ɔ ke: “Kuɔ kɛ ba hiɛ ɔ nɛ ɔ nɛ ma tsɔɔ mo nihi nɛ maa ba mi ngɛ ni nɛ ɔmɛ a se.”

² Nɛ amlɔ ɔ Mumi ɔ ba ye nɔ, nɛ oʼɛ, matsɛ sɛ ko maa si ngɛ hiɔwe, nɛ nɔ ko hii si ngɛ matsɛ sɛ ɔ nɔ.

³ Nɛ nɔ nɛ hii si ngɛ nɔ ɔ, ke o hyɛ lɛ ɔ, e ngɛ kaa tɛ nɛ he jua wa kaa yaspi kɛ sardi, nɛ alale bɔle matsɛ sɛ ɔ he, nɛ ke o hyɛ ɔ, e ngɛ kaa smaragde tɛ.

⁴ Nɛ matsɛ sɛ ɔ he ɔ, matsɛ sɛhi nyingmi enyɔ kɛ eywiɛ bɔle lɛ kɛ kpe, nɛ nikɔtɔmahi nyingmi enyɔ kɛ eywiɛ hii si ngɛ sɛ ɔmɛ a nɔ; sa wo tade hiɔhi, nɛ sika jlasi fi a yi.

⁵ Nɛ oslaba gbami kɛ gbi kɛ hiɔwe simi je matsɛ sɛ ɔ mi, nɛ la hahi kpaago nɛ ngɛ tsoe nɛ ji Mawu mumihi kpaago ɔ ngɛ matsɛ sɛ ɔ hɛ mi.

⁶ Nɛ nɔ́ ko kaa ahuhuɛ wo nɛ hɛ mi tsɔ kaa kristolo ngɛ matsɛ sɛ ɔ hɛ mi, nɛ hɛ kali eywiɛ nɛ hɛngmɛhi hyi a hɛ mi kɛ a se tɔtɔɔtɔ ngɛ matsɛ sɛ ɔ kpɛti kɛ e he kulaa.

⁷ Kekleekle hɛ kalɔ ɔ ngɛ kaa jata, nɛ hɛ kalɔ nɛ ji enyɔ ɔ ngɛ kaa na, ne hɛ kalɔ nɛ ji etɛ ɔ ngɛ kaa nɔmlɔ, nɛ hɛ kalɔ nɛ ji eywiɛ ɔ ngɛ kaa kɔle nɛ e ngɛ tee.

⁸ Nɛ hɛkali eywiɛ ɔmɛ a ti nɔ tsuaa nɔ ngɛ ple ekpa ekpa, nɛ a he kɛ a mi tsuo hyi tɔtɔɔtɔ kɛ hɛngmɛ sɔuu, nɛ a jɔɔ we lami nyɔ kɛ pia ke: “Klɔuklɔu, klɔuklɔu, klɔuklɔu ji Nyɔmtsɛ Mawu Ope, Nɔ nɛ ngɛ sa a, kɛ nɔ nɛ ngɛ ɔ, kɛ nɔ nɛ maa ba a.”

⁹ Nɛ benɛ hɛ kali ɔmɛ ngɔ nyami kɛ agboje kɛ sina kɛ ngɛ nɔ nɛ hii si ngɛ matsɛ ɔ nɔ nɛ hɛ ngɛ kɛ je neneene kɛ yaa neneene ɔ hae ɔ,

¹⁰ nikɔtɔmahi nyingmi enyɔ kɛ eywiɛ ɔ buɔ si ngɛ nɔ nɛ hii si ngɛ matsɛ sɛ ɔ nɔ ɔ hɛ mi, nɛ a ngɛ nɔ nɛ hɛ ngɛ kɛ je neneene kɛ yaa neneene ɔ jae, nɛ a sakee a jlasi ɔmɛ ngɔ pueɔ matsɛ sɛ ɔ hɛ mi nɛ a deɔ ke:

¹¹ “Wa Nyɔmtsɛ kɛ wa Mawu, mo ji nɔ nɛ sa kaa O ngɔ hɛ mi nyami kɛ agboje kɛ he wami ɔ Ejakaa mo lɛ ɔ bɔ nihi kulaa, Nɛ o suɔmi nya a ngɛ nɛ a bɔ mɛ ngɛ.”