Kpojemi 3 - Somi He Ɔ

Sɛ kɛ ha Sarde asafo ɔ

¹ “Nɛ Sarde asafo ɔ bɔfo ɔ, ngmaa ya ha lɛ ke: “Nihi nɛ nɔ nɛ ngɛ Mawu mumihi kpaago ɔ kɛ dodoehi kpaago ɔ de ji nɛ ɔ nɛ: I le o ni tsumi ɔmɛ kaa o hɛɛ biɛ kaa o hɛ ngɛ, se o gbo.

² Lɔ ɔ he ɔ, fo hɛ nɛ tsɛ, nɛ o waje nihi nɛ piɛ nɛ ngɛ hlae nɛ a gbo ɔ. Ejakaa i nɛ o ni tsumi ɔmɛ eko nɛ hi kɛ pi si ngɛ ye Mawu ɔ hɛ mi.

³ Lɔɔ he ɔ kaii nɔ́ nɛ a tsɔɔ mo kɛ bɔ nɛ o nu ɔ nɛ o kɛ to, nɛ o tsake o tsui. Se jehanɛ ke o hɛ tsɛ́ ɔ, ma tua mo kaa juɔ, nɛ o be lee ngmlɛfia nɔ nɛ ma ba a kulaa.

⁴ Se kɛ ɔ, o ngɛ nihi bɔɔ ko ngɛ Sarde, nihi nɛ wui a tade ɔmɛ mu; a kɛ mi maa nyɛɛ ngɛ tade hiɔhi a mi, ejakaa a sa ja.

⁵ Kunimi yelɔ ɔ, a maa wo lɛ tade hiɔ, nɛ i be e biɛ gbee ngɛ wami womi ɔ mi gblegbleegblee, nɛ ma wo e biɛ ta ngɛ Tsaatsɛ hɛ mi kɛ e bɔfo ɔmɛ a hɛ mi.

⁶ “Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ deɔ ɔ.

Sɛ kɛ ha Filadelfia asafo ɔ

⁷ “Nɛ Filadelfia asafo ɔ bɔfo ɔ, ngmaa ya ha lɛ ke: “Nihi nɛ nɔ klɔuklɔu ɔ kɛ anɔkualetsɛ ɔ, nɔ nɛ hɛɛ David safe ɔ, nɔ nɛ bliɔ nɛ nɔ ko nga we, nɛ e ngaa hulɔ nɛ nɔ ko bli we ɔ de ji nɛ ɔ nɛ:

⁸ I le o ni tsumi ɔmɛ; nɛ oʼɛ, i bi sinya ngɔ fɔ si ngɛ o hɛ kpɛ, nɛ nɔ ko be nyɛe ma nga, ejakaa he wami bɔɔ ngɛ, se o ye ye munyu ɔ nɔ, nɛ o kua we ye biɛ ɔ.

⁹ Oʼɛ, i kɛ ni komɛ nɛ je Satan kpe he ɔ nɛ deɔ ke Yudafohi ji mɛ se e be mi ja, se mohu lakpa mohu a ngɛ yee ɔ maa ba o hɛ mi; oʼɛ, ma ha nɛ a ba nɛ a ba nu o nane nɛ a ja mo, konɛ a le kaa imi lɛɛ i suɔ mo.

¹⁰ Ejakaa o ye ye munyu nɛ deɔ ke o to o tsui si ɔ nɔ he je ɔ, ma baa o yi ngɛ ka ngmlɛfia nɛ maa ba je mluku ɔ kulaa nɔ nɛ a kɛ maa ka nihi nɛ ngɛ zugba a nɔ ɔ mi.

¹¹ Oʼɛ, i ma oya; pɛtɛ nɔ nɛ o ngɛ ɔ he nɛ wa, konɛ nɔ ko ko kpɔ o jlasi ɔ!

¹² Kunim yelɔ ɔ, ma ngɔ lɛ ngɔ pee Titima ngɛ ye Mawu ɔ sɔlemi tsu ɔ mi, nɛ e be kpo jee hu, nɛ ma ngma ye Mawu ɔ biɛ, kɛ ye Mawu ɔ ma nɛ ji Yerusalem he nɛ jee ye Mawu ngɔ ɔ biɛ, kɛ mi nitsɛ ye biɛ he ɔ ngɛ e nɔ.

¹³ “Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ dee ɔ!”

Sɛ kɛ ha Laodikea asafo ɔ

¹⁴ “Nɛ Laodikea asafo ɔ bɔfo ɔ, ngmaa ya ha lɛ ke: “Nihi nɛ Amen ɔ nɛ ji odase yelɔ anɔkualetsɛ ɔ kɛ anɔkua leyelɔ ɔ kɛ Mawu adebɔ ɔ sisije ɔ de ji nɛɔ nɛ:

¹⁵ I le oni tsumi ɔmɛ kaa o be yluduu nɛ o be kɛlakɛla hulɔ. Oo, jinɛ o ko pee yluduu loo o ko pee kɛlakɛla!

¹⁶ Se kikɛ nɛ ɔ, akɛnɛ o ngɛ kulɔkulɔ nɛ o be yluduu nɛ o be kɛlakɛla hulɔ he je ɔ, ma la mo ngɛ ye nya mi ngɔ pue he.

¹⁷ Ejakaa o deɔ ke: ‘Niatsɛ ji mi nɛ i ngɛ ni, nɛ nɔ́ ko nɔ́ ko hia we mi,’ nɛ o li kaa o ngɛ dengme mi nɛ o ni hu ngɛ mɔbɔ, nɛ ohiafo kɛ hɛ yuyuilɔ kɛ hegutsɛ ji mo,

¹⁸ i ngɛ mo ga woe ke o he sika nɛ a tsu he ngɛ la mi kɛ je ye ngɔ, kone o na ni, kɛ tade hiɔ, kone o wo nɛ o he gu nɛ ngɛ zo ɔ nɛ ko fɔ si, kɛ hɛngmɛ tsopa nɛ o kɛ nga o hɛngmɛ nɔ, kone o hyɛ nɔ.

¹⁹ Imi lɛɛ, nihi abɔ nɛ i suɔ ɔ, i kãa mɛ nɛ i gblaa a tue; lɔ ɔ he ɔ, o hɛ nɛ dɔ nɛ o tsake o tsui!

²⁰ Oʼɛ i daa si ngɛ sinya a se nɛ i ngɛ sie; ke nɔ ko nu ye gbi nɛ e bli sinya a, ma ba e ngɔ nɛ i kɛ lɛ ma ba ye ni nɛ lɛ hu e kɛ mi maa ye.

²¹ Kunimi yelɔ ɔ, ma ha lɛ blɔ nɛ e kɛ mi nɛ hi ye matsɛ sɛ ɔ nɔ, kaa bɔ nɛ imi hu i ye kunimi nɛ i kɛ Tsaatsɛ hii si ngɛ e matsɛ sɛ ɔ nɔ ɔ.

²² “Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ dee o.”