Kpojemi 22 - Somi He Ɔ

¹ Nɛ hiɔwe bɔfo ɔ tsɔɔ mi wami nyu pa klɔuu nɛ mi tsɔ kaa kristalo ahuhuɛ nɛ ngɛ Mawu kɛ Tobi ɔ matsɛ sɛ ɔ mi jee kɛ ngɛ ma a gbejegbɛ ɔ mi gue,

² nɛ ma a kpɛti kɛ pa a tue hiɛ ɔ kɛ hiɛ ɔ kulaa a wami tso ɔ maa si, nɛ e woɔ yiblii si nyɔngma kɛ enyɔ, hlami tsuaa hlami ɔ, e woɔ yiblii si kake, nɛ tso ɔ yi ba amɛ ɔ, a kɛ tsaa je ma amɛ.

³ Nɛ musu ko musu ko be lejɛ ɔ hu. Mawu kɛ Tobi ɔ matsɛ sɛ ɔ maa ma si ngɛ e mi, nɛ e sɔmɔli ɔmɛ ma sɔmɔ lɛ,

⁴ nɛ a maa na e hɛ mi, nɛ e biɛ ɔ maa hi a hɛ nya.

⁵ Nɛ nyɔ be lejɛ ɔ hie, nɛ kane loo pu kpemi he be mɛ hiae, ejakaa Nyɔmtsɛ Mawu ɔ ma kpɛ ha mɛ, nɛ a maa ye matsɛ kɛ maa ya neneene kɛ neneene.

Yesu bami

⁶ Kɛkɛ nɛ hiɔwe bɔfo ɔ de mi ke: “Anɔkuale munyu nɛ maa si pim ji nɛ ɔ nɛ. Nyɔmtsɛ ɔ nɛ ji gbali ɔmɛ a mumi ɔmɛ a Mawu ɔ tsɔ e bɔfo ɔ konɛ e ba tsɔɔ e sɔmɔli nihi nɛ sa kaa a ba nɔuu ɔ.”

⁷ “Oʼɛ i ma nɔuu. A gbaa nɔ nɛ kɛ kikɛmɛ a womi nɛ mi gbami munyu ɔmɛ toɔ ɔ.”

⁸ Nɛ imi, Yohane, ji nɔ nɛ na nɛ e nu ni nɛ ɔmɛ ɔ nɛ. Nɛ benɛ i nu nɛ i na a, i bu si nɛ ma ja ngɛ hiɔwe bɔfo ɔ nɛ tsɔɔ mi ni nɛ ɔmɛ ɔ nane nya.

⁹ Nɛ e de mi ke: “Koo pee! ejakaa o nyɛmi sɔmɔlɔ kɛ gbali kɛ nihi nɛ toɔ kikɛmɛ a womi nɛ mi munyu ɔmɛ a kpɛti nɔ ko ji mi; ja Mawu mohu!”

¹⁰ Nɛ e de mi ke: “Koo sɔu kikɛmɛ a womi nɛ mi gbami munyu ɔmɛ a nya, ejakaa be ɔ su.

¹¹ Nɔ nɛ dɛ ɔ, ha e ya nɔ nɛ e pee nihi nɛ dɛ ɔ; nɛ nɔ nɛ ji mutsɛ ɔ, ha e ya nɔ nɛ e wo e he mu; nɛ nɔ nɛ ji dalɔ ɔ, ha e ya nɔ nɛ e tsu dami ni ɔmɛ; nɛ nɔ nɛ ji nɔ klɔuklɔu ɔ, ha e ya nɔ nɛ e hi klɔuklɔu.”

¹² “Oʼɛ, i ma nɔuu, nɛ i hɛɛ ye hiɔwo ɔ kɛ ma, nɛ ma wo nɔ tsuaa nɔ hiɔ ngɛ e ni tsumi ɔ nya.

¹³ Ami ji Alfa a kɛ omega a nɛ, sisije ɔ kɛ nyagbe ɔ, kekleekle nɔ ɔ kɛ nyagbe nɔ ɔ.”

¹⁴ A gbaa nihi nɛ fɔɔ a tade ɔmɛ a he ɔ, konɛ a na wami tso ɔ nɔ yiblii ɔ yemi he blɔ, nɛ a gu a gbo ɔmɛ a mi kɛ sɛ ma a mi.

¹⁵ Se ma a se ɔ, gbe ɔmɛ kɛ nyuali ɔmɛ kɛ ya holi ɔmɛ kɛ awi yeli ɔmɛ kɛ amaga jali ɔmɛ kɛ nɔ tsuaa nɔ nɛ suɔ lakpa nɛ ngɔɔ nya a ngɛ lejɛ ɔ.

¹⁶ “Imi Yesu, i tsɔ ye bɔfo ɔ konɛ e ba ye ni nɛ ɔmɛ a he odase ngɔ tsɔɔ ngɛ asafo ɔmɛ a mi. Ami ji David sipoku ɔ kɛ e nina a, nɔkɔ nɛ ngɛ kpee ɔ.”

¹⁷ Mumi ɔ kɛ Ayɛflo ɔ ke: “Ba!” Nɛ nɔ nɛ nuɔ ɔ, e de ke: “Ba!” Nɔ nɛ kuma ngɛ lɛ tɔe ɔ, e ba, nɛ nɔ nɛ suɔ ɔ, e ba nɛ e ba yɛ wami nyu ɔ yaka gu.

Nyagbe

¹⁸ Imi Yohane i ngɛ nɔ tsuaa nɔ nɛ nuɔ kikɛmɛ a womi nɛ mi gbami munyu ɔmɛ kɔkɔ bɔe ke: Ke nɔ ko kɛ nɔ́ ko piɛ ni nɛ ɔmɛ a he ɔ, Mawu maa ngɔ haomihi nɛ a ngma ngɛ womi nɛ mi ɔ ngɔ piɛ he ngɔ ha lɛ.

¹⁹ Nɛ ke nɔ ko je nɔ́ ko kɛ je kikɛmɛ a gbami womi nɛ mi munyu ɔmɛ a mi ɔ, Mawu ma je e blɔ nya kɛ maa je wami tso ɔ yiblii ɔ yemi kɛ ma klɔuklɔu ɔ kɛ nihi nɛ a ngma ngɛ womi nɛ mi ɔ mi.

²⁰ Nɔ nɛ yeɔ kikɛmɛ a ni nɛ ɔmɛ a he odase ɔ ngɛ dee ke: “Ee, i ma nɔuu.” Amen. Ee, ba, Mawetsɛ Yesu!

²¹ Wa Nyɔmtsɛ Yesu Kristo dloomi ɔ kɛ nyɛ tsuo nɛ hi si! Amen.