Kpojemi 21 - Somi He Ɔ

Hiɔwe he kɛ zugba he

¹ Kɛkɛ nɛ i na dhiɔwe he kɛ zugba he, ejakaa kekle hiɔwe ɔ kɛ kekle zugba a be kɛ ho, nɛ wo be hu.

² Nɛ imi Yohane i na ma klɔuklɔu ɔ nɛ ji Yerusalem he ɔ je Mawu ngɔ ngɛ hiɔwe kɛ ngɛ si kplee, nɛ a dla lɛ kaa ayɛflo nɛ a wo lɛ ni ha e huno.

³ Nɛ i nu gbi ngua ko je matsɛ sɛ ɔ mi de ke: “Oʼɛ Mawu bo tsu ɔ ngɛ nimli a kpɛti, nɛ e maa hi a kpɛti, nɛ a maa pee e ma, nɛ Mawu nitsɛ kɛ mɛ maa hi si, nɛ e maa pee a Mawu.

⁴ Nɛ Mawu ma tsu a hɛ mi vo nyu kulaa, nɛ gbenɔ be si hie hu, nɛ kɔmɔ yemi ko kɛ ya fomi ko kɛ nɔ nami ko hu be si hie hu, ejakaa kekle ni ɔmɛ be kɛ ho.”

⁵ Kɛkɛ nɛ nɔ nɛ hii si ngɛ matsɛ sɛ ɔ nɔ ɔ de ke: “Oʼɛ, i ngɛ nihi kulaa ehe pee.” Nɛ e de mi ke: “Ngmaa, ejakaa kikɛmɛ a munyuhi nɛ ɔmɛ ji munyuhi nitsɛ nɛ maa si kpɛii.

⁶ Nɛ e de mi ke: “A gbe nya. Ami ji Alfa a kɛ Omega a nɛ, sisije ɔ kɛ nyagbe ɔ. Nɔ nɛ kuma ngɛ lɛ tɔe ɔ, ma ha lɛ wami nyu vu ɔ mi nyu ɔ eko nɛ e nu yaka gu.

⁷ Kunimi yelɔ ɔ maa pee kikɛmɛ a ni nɛ ɔmɛ kulaa yelɔ, nɛ ma pee e Mawu, nɛ lɛ hu e maa pee ye bi.

⁸ Se ninɛmɛ nɛ ji sfɔli kɛ ninɛmɛ nɛ he we yi kɛ nihi nɛ peɔ ninyɛ nihi kɛ awi yeli kɛ ya holi kɛ nyuali kɛ wɔ jali kɛ lakpatsɛmɛ kulaa a, a ma na a blɔ nya ngɛ taku ɔ nɛ ngɛ tsoe kɛ la gligliigli ɔ mi, nɔ́ nɛ ji gbenɔ nɛ ji enyɔ ɔ.”

Yerusalem he ɔ

⁹ Nɛ hiɔwe bɔfohi kpaago nɛ hɛɛ tsinesa kpaago nɛ hyi tɔtɔɔtɔ kɛ nyagbe haomi kpaago ɔ a kpɛti nɔ kake ba ye ngɔ nɛ e kɛ mi ba tu munyu ke: “Ba, nɛ ma tsɔɔ mo ayɛflo ɔ nɛ ji Tobi ɔ yo ɔ.”

¹⁰ Nɛ e ngɔ mi ngɛ mumi mi kɛ ho yoku ngua ko nɛ ya hiɔwe nɔ ya, nɛ e tsɔɔ mi ma ngua a nɛ ji Yerusalem klɔuklɔu ɔ nɛ je Mawu ngɔ ngɛ hiɔwe kɛ ngɛ si kplee,

¹¹ nɛ ye hɛɛ Mawu hɛ mi nyami ɔ; nɛ e ngɛ kpee kaa tɛ nɛ he jua wa pe kulaa, kaa yaspi tɛ nɛ mi tsɔ kaa kristalo ahuhuɛ.

¹² E ngɛ gbogbo ngua ko nɛ ya hiɔwe, kɛ agbohi nyɔngma kɛ enyɔ, nɛ bɔfohi nyɔngma kɛ enyɔ daa si ngɛ agbo ɔmɛ a nya, nɛ a ngma biɛhi ngɛ a nɔ nɛ ji Israel bi ɔmɛ a wɛtsohi nyɔngma kɛ enyɔ ɔ a biɛhi.

¹³ Agbohi etɛ ngɛ beleku je (pu je he), nɛ agbohi etɛ ngɛ omlɛyi (hue mi je), nɛ agbohi etɛ ngɛ leneyi (wo si je), nɛ agbohi etɛ ngɛ bonyoku (pu sinɔ he).

¹⁴ Nɛ ma a he gli ɔ ngɛ sisi tomihi (aloo fanesihi) ɔnyɔngma kɛ enyɔ, nɛ Tobi ɔ bɔfohi nyɔngma kɛ enyɔ ɔmɛ a biɛhi ngɛ a mi.

¹⁵ Nɛ nɔ nɛ kɛ mi tu munyu ɔ hɛɛ sika tsu glã kalemi tso konɛ e kɛ kale ma a kɛ e gbo ɔmɛ kɛ e he gli ɔ.

¹⁶ Ma a fɔɔ si kɔ nya eywiɛ nɛ e kami ngɛ kaa e blimi nɔuu. Nɛ e kɛ glã a kale ma a, nɛ e pee si tomi nya akpe kake kɛ lafa enuɔ. E kami kɛ e blimi kɛ e hiɔwe yami sɔ.

¹⁷ Nɛ e kale e gli ɔ nɛ e pee nane kami lafa enyɔ kɛ nyɔngma kɛ ekpa ngɛ nɔmlɔ kalemi nɔ́ nɛ bɔfo ɔ hɛɛ ɔ nya.

¹⁸ Nɛ nɔ́ nɛ a kɛ fia e gli ɔ ji yaspi tɛ, nɛ ma a sika tsu nɛ ngɛ kaa ahuhuɛ nɛ hɛ mi tsɔ ʼi.

¹⁹ Nɛ ma a gli ɔ sisi tomi ɔ, a dla lɛ kɛ tɛ nɛ he jua wa slɔɔtohi kulaa: Kekleekle sisi tomi ɔ yaspi, nɔ́ nɛ ji enyɔ ɔ safiro, nɔ́ nɛ ji etɛ ɔ kalkedon, nɛ nɔ́ nɛ ji eywiɛ ɔ smaragdo,

²⁰ nɔ́ nɛ ji enuɔ ɔ sardoniki, nɔ́ nɛ ji ekpa a sadio, nɔ́ nɛ ji kpaago ɔ krisolito, nɔ́ nɛ ji kpaanyɔ ɔ berilo, nɔ́ nɛ ji nɛɛ ɔ topasion, nɔ́ nɛ ji nyɔngma a krisopraso, nɔ́ nɛ ji nyɔngma kɛ kake ɔ hiakinto, nɔ́ nɛ ji nyɔngma kɛ enyɔ ɔ ametisto.

²¹ Nɛ agbohi nyɔngma kɛ enyɔ ɔ, adiagba nyɔngma kɛ enyɔ ʼi, nɛ agbo kake ɔ adiagba kake a kɛ pee. Nɛ ma a mi blɔ ɔ sika tsu nitsɛ ʼi, nɛ e mi tsɔ kaa ahuhuɛ.

²² I nɛ sɔlemi tsu ko ngɛ ma a mi, ejakaa Nyɔmtsɛ Mawu Ope ɔ kɛ Tobi ɔ ji e sɔlemi tsu.

²³ Nɛ pu loo nyɔhiɔ kpemi hia we ngɛ ma a mi, ejakaa Mawu hɛ mi nyami ɔ tsoo ngɛ mi, nɛ Tobi ɔ ji la nɛ kpɛɛ ngɛ mi.

²⁴ Nɛ maje li ɔmɛ maa nyɛɛ ngɛ e la a mi, nɛ zugba a nɔ matsɛmɛ ɔmɛ maa ngɔ a hɛ mi nyami kɛ ba mi.

²⁵ Nɛ e gbo ɔmɛ ɔ, a be ngae ligbi ko ligbi ko; ejakaa nyɔ be lejɛ ɔ;

²⁶ nɛ a kɛ je mi ma amɛ a hɛ mi nyami ɔ kɛ a bu ɔ maa ba mi.

²⁷ Nɛ nɔ́ ko nɛ he tsɔ we kɛ nɔ nɛ peɔ ninyɛ nihi kɛ nɔ nɛ yeɔ lakpa be mi sɛe kulaa, kaa ja ninɛmɛ nɛ a ngma a biɛ ngɛ Tobi ɔ wami womi ɔ mi ɔ?