Kpojemi 20 - Somi He Ɔ

Jeha akpe ɔ

¹ Kɛkɛ nɛ i na bɔfo ko nɛ e ngɛ si kplee kɛ ngɛ hiɔwe jee, nɛ e hɛɛ muɔ voo ɔ nya safe ɔ kɛ kɔsɔkɔsɔ ngua ko ngɛ e dɛ mi.

² Nɛ e nu sinɔ ngua a, blema sinɔ nɛ ji Abosiami loo Satan ɔ, nɛ e fi lɛ jeha akpe,

³ nɛ e ngɔ lɛ ngɔ wo muɔ voo ɔ mi, nɛ e nga e yi nɛ e sɔu nya, konɛ e ko sisi je mi ma amɛ hu kɛ yaa su be nɛ a maa gbe jeha akpe ɔ nya. Lɔ ɔ se ɔ ja a pɛne lɛ be bɔɔ ko.

⁴ Kɛkɛ nɛ i na matsɛ sɛhi kɛ nihi nɛ hii si ngɛ a nɔ ɔ; a ngɔ kojomi ngɔ ha mɛ. Nɛ i na nihi nɛ a po a yi ngɛ Yesu he odase yemi ɔ kɛ Mawu munyu ɔ he ɔ a klaa amɛ, kɛ ninɛmɛ nɛ ja we lohwe ɔ loo e maga a nɛ a he we e kadi ɔ ngɛ a hɛ nya loo a dɛ mi ɔ. A hɛ ngɛ, nɛ a kɛ Kristo ye matsɛ jeha akpe.

⁵ Se ni gbogboehi nɛ piɛ ɔ, a hɛ na we nɛ e tsɛ kɛ maa su be nɛ a maa gbe jeha akpe ɔ nya. E nɛ ji kekleekle si temi ɔ nɛ.

⁶ Nɔ nɛ a gbaa kɛ nɔ klɔuklɔu ji nɔ nɛ ma na blɔ nya ngɛ kekleekle si temi ɔ mi; gbenɔ nɛ ji enyɔ ɔ be he wami ko ngɛ jamɛ a nimli ɔmɛ a nɔ; se mohu a ma plɛ Mawu kɛ Kristo osɔfohi, nɛ a kɛ lɛ maa ye matsɛ jeha akpe.

A ye Satan nɔ

⁷ Jeha akpe ɔ se ɔ, a maa pɛne Satan kɛ maa je e tsu ɔ mi,

⁸ nɛ e maa je kpo konɛ e ya sisi je mahi nɛ ngɛ zugba kɔ nya eywiɛ ɔmɛ a mi ɔ, Gog kɛ Magog, konɛ e bua a nya kɛ kpe nɛ a ya ta, nihi a hiemi nɛ ngɛ kaa wo nya zia a.

⁹ Nɛ a gbɛ fia zugba a nɔ, nɛ a ya bɔle ni klɔuklɔu ɔmɛ a ta a kɛ ma nɛ a suɔ ɔ kɛ kpe. Nɛ la je Mawu ngɔ ngɛ hiɔwe, nɛ e ba sa mɛ butuu.

¹⁰ Nɛ Abosiami ɔ nɛ sisi mɛ ɔ, a ngɔ lɛ ngɔ wo la gligliigli taku ɔ mi, he nɛ lohwe ɔ kɛ lakpa gbalɔ ɔ hu ngɛ ɔ, nɛ a ma pii mɛ nyɔ kɛ pia kɛ maa ya neneene kɛ neneene.

Nyagbe kojomi ɔ

¹¹ Kɛkɛ nɛ i na matsɛ sɛ hiɔ ngua ko, kɛ nɔ nɛ hii si ngɛ nɔ ɔ, nɛ zugba kɛ hiɔwe tu fo ngɛ e hɛ mi, nɛ a nɛ blɔ ha mɛ.

¹² Nɛ i na ni gbogboe ɔmɛ, ni tsɔwi kɛ ni nguahi nɛ a daa si ngɛ matsɛ sɛ ɔ hɛ mi. A bli womihi a nya, nɛ a bli womi kpa ko nɛ ji wami womi ɔ hu nya. Nɛ akojo ni gbogboe ɔmɛ, ni tsɔwi kɛ ni nguahi, ngɛ nihi nɛ a ngma ngɛ womi ɔmɛ a mi ɔ nya, bɔ nɛ sa a ni tsumi ɔmɛ.

¹³ Nɛ wo je ni gbogboehi nɛ ngɛ e mi ɔ ngɔ ha, nɛ gbenɔ kɛ gbeje je ni gbogboehi nɛ ngɛ a mi ɔ ngɔ ha; nɛ a kojo mɛ, nɔ tsuaa nɔ bɔ nɛ sa e ni tsumi ɔmɛ.

¹⁴ Nɛ gbenɔ kɛ gbeje lɛɛ, a sake mɛ ngɔ pue la taku ɔ mi. Enɛ ɔ ji gbenɔ nɛ ji enyɔ ɔ nɛ.

¹⁵ Nɛ ke nɔ ko ngɛ nɛ a nɛ́ kaa a ngma e biɛ ngɛ wami womi ɔ mi ɔ, a sakee lɛ ngɔ fɔɔ la taku ɔ mi.