Kpojemi 2 - Somi He Ɔ

Sɛ kɛ ha Efeso asafo ɔ

¹ “Ngmaa ya ha Efeso asafo ɔ bɔfo ɔ, ke: “Nihi nɛ nɔ nɛ hɛɛ dodoehi kpaago ɔ ngɛ e hiɛ ɔ nine mi nɛ e nyɛɛ sika kane tso kpaago ɔmɛ a kpɛti ɔ de ji nɛ ɔ nɛ:

² I le o ni tsumi ɔmɛ kɛ o dengme gbomi ɔ, kɛ o tsui si tomi ɔ, kɛ bɔ nɛ o kplɛɛ we nimli yayami ɔmɛ a ni peepee ɔmɛ a nɔ, se ɛo ka nihi nɛ deɔ ke bɔfohi ji mɛ se a pi ja a, nɛ o na kaa lakpatsɛmɛ ji mɛ.

³ Nɛ o hɛɛ mi, nɛ o toɔ o tsui si, nɛ ye biɛ ɔ he ɔ, o bɔɔ mɔde, nɛ pɔ tɔɛ mo.

⁴ Se kɛ ɔ, i kɛ mo ngɛ sane ko, lɔ ɔ ji kaa, o sume mi kaa bɔ nɛ o suɔ mi sa a.

⁵ Lɔ ɔ he ɔ kaii he nɛ o je kɛ nɔ si ɔ, nɛ o tsake o tsui, nɛ o tsu kekle ni tsumi ɔmɛ; se ke pi ja a, ma ba o ngɔ oya, nɛ ma je o kane tso ɔ kɛ maa je e ma he ɔ, ja o pia o he.

⁶ Se kɛ ɔ, o ngɛ enɛ, kaa o nyɛɛ Nikolaimɛ a ni tsumi ɔmɛ nɛ imi hu i nyɛɛ ɔ.

⁷ “Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ dee ɔ. “Nɔ nɛ yeɔ kunimi ɔ, ma ha lɛ wami tso ɔ nɛ ngɛ ye Mawu ɔ Paradeiso ɔ mi ɔ nɔ yiblii ɔ eko nɛ e ye.”

Sɛ kɛ ha Smirna asafo ɔ

⁸ “Nɛ Smirna asafo ɔ bɔfo ɔ, ngmaa ya ha lɛ ke: “Nihi nɛ kekleekleno ɔ kɛ nyagbeno ɔ, nɔ nɛ gbo nɛ e hɛ ngɛ ekohu ɔ de ji nɛ ɔ nɛ:

⁹ I le o ni tsumi ɔmɛ kɛ o dengme gbomi ɔmɛ kɛ o hia a, — se kɛ ɔ niatsɛ ji mo — nɛ i le ni yayahi nɛ nihi nɛ deɔ ke Yudafohi ji mɛ se a pi ja se mohu a ji Satan kpe mi bimɛ ɔ deɔ ngɛ o he ɔ.

¹⁰ Koo ye amanehlu nɛ o maa na eko eko gbeye, oʼɛ, abosiami maa ngɔ nyɛ ti ni komɛ ngɔ wo tsu mi, kone a kɛ ka nyɛ, nɛ nyɛ maa na amanehlu ligbi nyɔngma. Pee anɔkualetsɛ kɛ ya su gbenɔ mi, nɛ ma ha mo wami jlasi ɔ.

¹¹ “Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ dee ɔ. “Kunimi yelɔ ɔ, a be lɛ nɔ ko yaya ko pee ngɛ gbenɔ nɛ ji enyɔ ɔ mi.”

Sɛ kɛ ha Pergamo asafo ɔ

¹² “Nɛ Pergamo asafo ɔ bɔfo ɔ, ngmaa yaha lɛ ke: “Nihi nɛ snɔ nɛ hɛɛ hiɔ kɛ e nya mi enyɔ nɛ nya ba a de ji nɛ ɔ nɛ:

¹³ I le he nɛ o hii ɔ, he nɛ Satan matsɛ sɛ ɔ ngɛ ɔ. O hɛɛ ye biɛ ɔ mi, nɛ o kua we o hemi kɛ yemi ɔ ngɛ jamɛ a ligbi ɔmɛ a mi po, bene a gbe Antipa, ye o daseyelɔ anɔkualetsɛ ɔ ngɛ nyɛ kpɛti, he nɛ Satan hii ɔ.

¹⁴ Se kɛ ɔ, i kɛ mo ngɛ sane bɔɔ ko: ejakaa o ngɛ nihi ngɛ lejɛ ɔ nɛ hɛɛ Bileam nɔ nɛ tsɔɔ Balak kaa e tsɔ Israelbi ɔmɛ klama nɛ a ye nihi nɛ a kɛ sa bɔ ha wɔhi nɛ a bɔ ajuama a tsɔɔmi ɔ mi.

¹⁵ Ja nɔuu hu o ngɛ nihi nɛ hɛɛ Nikolaibihi a tsɔɔmi ɔ mi.

¹⁶ Lɔ ɔ he ɔ tsakee o tsui; se ke pi ja a, ma ba o ngɔ mla, nɛ i kɛ ye nya mi hiɔ́ ɔ kɛ mɛ ma ba hwu ta.

¹⁷ “Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ dee ɔ. “Nɔ nɛ yeɔ kunimi ɔ, ma ha lɛ mana nɛ a kɛ laa a eko nɛ e ye, nɛ ma ha lɛ tɛ hiɔ, nɛ tɛ ɔ nɔ ɔ, a ngma biɛ he nɛ nɔ ko li ja nɔ nɛ naa a.”

Sɛ kɛ ha Tiatira asafo ɔ

¹⁸ “Nɛ Tiatira asafo ɔ bɔfo ɔ, ngmaa ya ha lɛ ke: “Nihi nɛ Mawu Bi ɔ nɛ e hɛngmɛ ngɛ kaa la lilɛ nɛ e nanehi ngɛ kaa ayawa nɛ kpɛɔ nylamnylam ɔ de ji nɛ ɔ nɛ.

¹⁹ I le o ni tsumi ɔmɛ kɛ o suɔmi ɔ kɛ o sɔmɔmi ɔ kɛ o hemi kɛ yemi ɔ kɛ o tsui si tomi ɔ, nɛ i le o ni tsumi ɔmɛ kaa sekpɛ ni ɔmɛ pe kekle ni ɔmɛ tete.

²⁰ Se kɛ ɔ, i kɛ mo ngɛ sane ko, kaa o ngmɛ yo Yesabel nɛ tsɛɛ e he gbalɔ ɔ blɔ, nɛ e tsɔɔ ye sɔmɔli ɔmɛ ni, nɛ e mlɔɔ mɛ, nɛ a bɔ ajuama, nɛ a ye ni nɛ a kɛ sa bɔ ha wɔhi.

²¹ I ha lɛ be konɛ e kɛ tsake e tsui, se e sume nɛ e tsake kɛ je ajuama bɔmi ɔ mi.

²² Oʼɛ, i kɛ lɛ maa fɔ sa nɔ, nɛ i kɛ nihi nɛ kɛ lɛ puɛ gba a hu maa wo nɔ nami kpatekpleenyɛ mi, ja a tsake a tsui kɛ je e ni tsumi ɔmɛ a mi.

²³ Ma gbe e bimɛ ɔmɛ, nɛ asafo ɔmɛ kulaa ma na maa le kaa imi ji nɔ nɛ leɔ juɛmi kɛ tsui mi susumihi, nɛ ma wo nyɛ ti nɔ tsuaa nɔ hiɔ bɔ nɛ e ni tsumi ɔmɛ ngɛ ɔ.

²⁴ “Se i ngɛ nyɛ dee, nyɛ nihi nɛ piɛ ngɛ Tiatira a, nihi abɔ nɛ hɛɛ we tsɔɔmi nɛ ɔ mi, nɛ li ‘Satan muɔhi nɛ a mi kuɔ ɔ’ (kaa bɔ nɛ a deɔ ɔ) I kɛ tlomi kpã ko be nyɛ nɔ fɔe.

²⁵ Se nɔ́ nɛ nyɛ ngɛ ɔ nyɛɛ hɛɛ mi ka ya su be nɛ ma ba.

²⁶ Nɛ kunimi yelɔ ɔ kɛ nɔ nɛ hɛɔ ye ni tsumi ɔmɛ a mi kɛ ya suu nyagbe ɔ, ma ha lɛ he wami ngɛ je ma amɛ a nɔ,

²⁷ nɛ e kɛ dade tso ma kpaka mɛ, nɛ e maa ywia mɛ kaa a ywiaa zu buɛhi, kaa bɔ nɛ imi hu i na kɛ je Tsaatsɛ ngɔ ɔ;

²⁸ nɛ ma ngɔ nɔkɔ ɔ ngɔ ha lɛ.

²⁹ “Nɔ nɛ ngɛ tue ɔ e nu nɔ́ nɛ Mumi ɔ ngɛ asafo ɔmɛ dee ɔ.”