Kpojemi 19 - Somi He Ɔ

¹ Ni nɛ ɔmɛ a se ɔ, i nu gbi ngua nɛ ngɛ kaa nimli asafo babauu gbi ngɛ hiɔwe nɛ ngɛ dee ke: “Haleluya! Yi wami hemi kɛ hɛ mi nyami kɛ agboje kɛ he wami ɔ ji Nyɔmtsɛ wa Mawu ɔ nɔ!

² Ejakaa zanɔkuale kɛ dami ji e kojomi ɔmɛ, akɛnɛ e kojo ajuama kpanaaku ɔ nɛ kɛ e juama bɔmi ɔ puɛ zugba a, nɛ Mawu ye e sɔmɔli ɔmɛ a muɔ ɔ he lue.”

³ Nɛ a kpa ngmlaa nɔ́ nɛ ji si enyɔ ke: “Haleluya! E lasuku ɔ tee si kɛ yaa neneene kɛ neneene.”

⁴ Nɛ nikɔtɔmahi nyingmi enyɔ kɛ eywiɛ ɔ kɛ hɛ kali eywiɛ ɔ bu si nɛ a ja Mawu nɛ hii si ngɛ matsɛ sɛ ɔ nɔ ɔ, nɛ a ke: “Amen, Haleluya!”

Tobi ɔ yokpeemi okplɔɔ ɔ

⁵ Nɛ gbi ko je matsɛ sɛ ɔ mi de ke: “Nyɛ je wa Mawu ɔ yi, nyɛ nihi nɛ nyɛ ji e sɔmɔli ɔmɛ tsuo kɛ nyɛ nihi nɛ nyɛ yee lɛ gbeye ɔ, nimli tsɔwi kɛ nimli nguahi kulaa!”

⁶ Nɛ i nu gbi ko kaa nimli asafo babauu gbi kɛ nyu babauu pɛmi kɛ hiɔwe simi nɛ nyɛ wa pɛmi nɛ ngɛ dee ke: “Haleluya! Ejakaa Nyɔmtsɛ, wa Mawu Ope ɔ, ngɛ matsɛ yee.

⁷ Nyɛ ha wa bua nɛ jɔ nɛ wa mi nɛ flii wɔ nɛ waa wo e hɛ mi nyami; ejakaa Tobi ɔ yokpeemi ɔ su, nɛ e yo ɔ dla e he ngɔ to.

⁸ Nɛ a hã lɛ kploba nɛ he tsɔ nɛ ngɛ kpee nylamnylam konɛ e bu.” (Ejakaa kploba ji klɔuklɔu bi ɔmɛ a ni tsumi kpakpa amɛ ɔ nɛ.)

⁹ Kɛkɛ nɛ hiɔwe bɔfo ɔ de mi ke: “Ngmaa: A gbaa nihi nɛ a tsɛ mɛ kɛ ba Tobi ɔ yo kpeemi okplɔɔɔ ɔ he ɔ.” Nɛ e de mi ke: “Mawu anɔkuale munyuhi ji nɛ ɔmɛ ɔ nɛ.”

¹⁰ Kɛkɛ nɛ i bu si ngɛ e nane nya konɛ ma ja lɛ. Nɛ e de mi ke: “Koo pee! O nyɛmi sɔmɔlɔ kɛ o nyɛmimɛ nɛ hɛɛ Yesu odase mi ɔ a ti nɔ ko ji mi. Ja Mawu mohu!” Ejakaa Yesu odase ɔ ji gbami mumi ɔ nɛ.

Nɔ nɛ hii si ngɛ okpɔngɔ hiɔ ɔ nɔ ɔ

¹¹ Kɛkɛ nɛ i na nɛ a bli hiɔwe nya, nɛ oʼɛ, okpɔngɔ hiɔ, nɛ nɔ nɛ hii si ngɛ nɔ ɔ, a tsɛɛ lɛ ke: Anɔkualetsɛ kɛ Dalɔ; dami nya e kojo ɔ nɛ e hwuɔ ta ngɛ.

¹² E hɛngmɛhi ngɛ kaa la lilɛhi, nɛ e bu matsɛ pɛɛhi fuu, nɛ a ngma e biɛ ko nɛ nɔ ko nɔ ko li ja lɛ nitsɛ kɛkɛ;

¹³ nɛ e wo tade ko nɛ a kɛ sɔ muɔ mi, nɛ a tsɛɛ e biɛ ke: “Mawu Munyu ɔ.”

¹⁴ Nɛ tahi nɛ ngɛ hiɔwe ɔ hi okpɔngɔ hiɔhi a nɔ kɛ nyɛɛ e se, nɛ a wo kploba nɛ he tsɔ.

¹⁵ Nɛ klaate nɛ nya ba ngɛ e nya mi jee konɛ e kɛ kɔlɔ ɔ nɛ fia majeli a bimɛ ɔmɛ ni; nɛ e kɛ dade tso nɛ kpaka mɛ. Nɛ lɛ nɔuu e maa naa Mawu Ope ɔ mi mi fumi nɛ nya wa a wai ngami nɔ ɔ nɔ.

¹⁶ Nɛ a ngma biɛ ko ngɛ e tade kɛ e fiɔ he ke: “Matsɛmɛ a Matsɛ kɛ nyɔmtsɛmɛ a Nyɔmtsɛ.”

¹⁷ Kɛkɛ nɛ i na hiɔwe bɔfo ko nɛ daa si ngɛ pu mi, nɛ e kpa ngmlaa wawɛɛ kɛ de lohwe pɛlitsɛmɛ nɛ ngɛ tee ngɛ hiɔwe ɔ tsuo ke: “Nyɛɛ ba nɛ nyɛ ba bua nyɛ he nya ngɛ Mawu okplɔɔ ngua a he,

¹⁸ konɛ nyɛ ba ye matsɛmɛ a lo kɛ asafoatsɛmɛ a lo kɛ he wali a lo kɛ okpɔngɔhi a lo kɛ nihi nɛ hii a nɔ ɔmɛ a lo kɛ odehehi kɛ nyɔguɛhi kɛ nimli tsɔwi kɛ nimli nguahi kulaa a lo.”

¹⁹ Kɛkɛ nɛ i na lohwe ɔ kɛ zugba a nɔ matsɛmɛ ɔmɛ kɛ a ta nɛ a bua nya a, konɛ a kɛ nɔ nɛ hii si ngɛ okpɔngɔ ɔ nɔ ɔ kɛ e ta a ya hwu ta.

²⁰ Nɛ a nu lohwe ɔ kɛ lakpa gbalɔ ɔ nɛ pee nyakpɛ nihi ngɛ e hɛ mi nɛ e kɛ sisi nihi nɛ he lohwe ɔ okadi ɔ kɛ nihi nɛ jaa e maga a. A ngɔ ni enyɔ nɛ ɔmɛ kulaa hɛ ngmengmle ngɔ wo la taku nɛ ngɛ tsoe gligliigli ɔ mi.

²¹ Nɛ ninɛmɛ nɛ piɛ ɔ, a kɛ nɔ nɛ hii si ngɛ okpɔngɔ ɔ nɔ ɔ klaate nɛ jee e nya mi ɔ gbe mɛ, nɛ lohwe pɛlitsɛmɛ tsuo ye a lo ɔ nɛ a tɔ.