Kpojemi 18 - Somi He Ɔ

Babilon butumi

¹ Ni nɛ ɔmɛ a se ɔ, i na hiɔwe bɔfo kpa ko nɛ e ngɛ si kplee kɛ ngɛ hiɔwe jee, nɛ e ngɛ he blɔ ngua, nɛ e hɛ mi nyami ɔ hã je ɔ mi kulaa tsɔ.

² E kɛ̃ e he nɛ e kpa ngmlaa kɛ gbi ngua ke: “E ywia, Babilon ngua a ywia, nɛ e plɛ mumi yayamihi a si himi he, kɛ mumi yayamihi kulaa a tsu, kɛ lohwe pɛlitsɛ tsuaa lohwe pɛlitsɛ nɛ he tsɔ we nɛ he ngɛ tai ɔ hu tsu.

³ Ejakaa e ha je ma amɛ kulaa nu e ajuama bɔmi he mi mi fumi da a eko, nɛ zugba a nɔ matsɛmɛ ɔmɛ kɛ lɛ bɔ ajuama, nɛ zugba a nɔ jua yeli ɔmɛ plɛ niatsɛmɛ ngɛ e ya homi ɔ he wami ɔ mi.”

⁴ Kɛkɛ nɛ i nu gbi kpa ko kɛ je hiɔwe nɛ ngɛ dee ke: “Nyɛɛ je e mi, ye ma, Konɛ nyɛɛ kɛ lɛ ko pee kake ngɛ e he yayami ɔmɛ a mi, Nɛ nyɛ ko na e haomi ɔ eko.

⁵ Ejakaa e he yayami ɔmɛ su hiɔwe lokoo, Nɛ Mawu kai e ni yayami ɔmɛ

⁶ Nyɛɛ wo lɛ hiɔ kaa bɔ nɛ lɛ hu e wo nyɛ hiɔ ɔ, Nɛ nyɛɛ ku ngɔ bɔ he totoe enyɔ ha lɛ. Kaa bɔ nɛ sa e ni tsumi ɔmɛ; Kplu ɔ nɛ e futu ha nyɛ ɔ, Nyɛ futu lɛ totoe enyɔ ngɔ ha lɛ.

⁷ Nyɛ pii lɛ nɛ nyɛɛ wo lɛ aywlɛho Kaa bɔ nɛ e wo lɛ nitsɛ e hɛ mi nyami kɛ ya homi ɔ Ja nɔuu nyɛ ha e piimi kɛ e ywlɛho ɔ nɛ pee. Ejakaa e deɔ ngɛ e tsui mi ke: ‘I hii si kaa manye! I pi yalɔyo, Nɛ i be aywlɛho ko nae!’

⁸ Lɔ ɔ he ɔ, ligbi kake nɔ e haomi ɔmɛ maa ba, Gbenɔ kɛ aywlɛho kɛ hwɔ, Nɛ a kɛ la maa sa lɛ, Ejakaa Nyɔmtsɛ Mawu nɛ kojoɔ ɔ he wa.”

⁹ Nɛ zugba a nɔ matsɛmɛ ɔmɛ nɛ a kɛ lɛ bɔ ajuama nɛ a kɛ lɛ ho ya a ma fo lɛ, nɛ a maa wo ya ngɛ e he, benɛ a maa na e sami ɔ lasuku ɔ.

¹⁰ A maa da se lokoo ngɛ e piimi ɔ he gbeye yemi ɔ he, nɛ a ma de ke: “Musu tloo, musu tloo, ma kpetekpleenyɛ ɔ, Babilon, ma nɛ he wa a! ejakaa ngmlɛfia kake mi nɛ o kojomi ɔ ba nɛ ɔ nɛ.

¹¹ Zugba a nɔ jua yeli ɔmɛ ma fo lɛ nɛ a maa ye lɛ kɔmɔ, ejakaa nɔ ko nɔ ko he we a jua yemi ni ɔmɛ hu:

¹² Sika tsu kɛ sika hiɔ, kɛ tɛhi nɛ a he jua wa, kɛ adiagba, kɛ kploba nɛ ngɛ fɛu kɛ bo nɛ ngɛ kaa alamua yumu, kɛ seda kɛ bo nɛ tsuɔ tsutsuutsu, kɛ tso tsuaa tso nɛ jee via, kɛ suɔ wu nihi tsuo, kɛ tso nɛ he jua wa nitsɛnitsɛ, kɛ akɔblee kɛ dade marmara tɛ nihi tsuo,

¹³ kɛ sinamon kɛ amomon kɛ tsopahi kɛ a he viahi kɛ mimɛ kɛ ohɛ nɛ jee via, kɛ da kɛ nu, kɛ sikisiai kɛ ngma, kɛ nahi kɛ tohi, kɛ okpɔngɔhi kɛ zugba lɛhi, kɛ nyɔguɛhi kɛ nimli a klaahi.

¹⁴ Nɛ yiblii nɛ jloɔ mo ɔ je o nya mi, nɛ nihi nɛ ngɔɔ dɔkɔdɔkɔ kɛ nihi nɛ kpɛɔ nylamnylam ɔ bɔ mo, nɛ o be mɛ nae kulaa hu.

¹⁵ Jua yeli nɛ plɛ niatsɛmɛ ngɛ mi ɔ maa da se lokoo ngɛ e nɔ nami ɔ gbeye yemi ɔ he, nɛ a ma fo ya nɛ a maa ye kɔmɔ;

¹⁶ nɛ a ma de ke: “Musu tloo, musu tloo ma kpetekpleenyɛ ɔ nɛ buɔ kploba nɛ ngɛ fɛu kɛ bo nɛ ngɛ kaa alamua yumu kɛ bo nɛ tsuɔ tsutsuutsu, nɛ dlaa e he kɛ sika tsu kɛ tɛhi nɛ a he jua wa kɛ adiagba a; ejakaa ngmlɛfia kake pɛ mi ɔ kikɛmɛ a ni babauu nɛ ɔ kulaa plɛ ma doku.”

¹⁷ Nɛ lɛ kudɔlɔ tsuaa lɛ kudɔlɔ kɛ nɔ tsuaa nɔ nɛ hii lɛ mi kɛ yaa he ko, kɛ lɛ mi bi kɛ nihi abɔ nɛ tsuɔ wo nɔ ni ɔ da si ngɛ se lokoo,

¹⁸ nɛ benɛ a na e sami ɔ lasuku ɔ, a kpa ngmlaa ke: “Te ma nɛ ngɛ kaa ma kpetekpleenyɛ nɛ ɔ nɛɛ?”

¹⁹ Nɛ a kɛ bunyuku wo a yi mi, nɛ a kɛ ya kɛ kɔmɔyemi kpa ngmlaa ke: “Musu tloo, musu tloo ma kpetekpleenyɛ ɔ, nɛ nihi kulaa nɛ a ngɛ lɛhi ngɛ wo hɛ mi ɔ plɛ niatsɛmɛ ngɛ e mi jua yemi nihi nɛ a he jua wa a he; ejakaa ngmlɛfia kake pɛ mi nɛ e plɛ ma doku nɛ ɔ nɛ.”

²⁰ Mo hiɔwe, kɛ nyɛ klɔuklɔu bihi kɛ bɔfohi kɛ gbali, nyɛ nya ngɛ e butumi ɔ he, ejakaa Mawu kojo lɛ ha nyɛ.

²¹ Kɛkɛ nɛ hiɔwe bɔfo ko nɛ he wa wo tɛ ko nɛ ngɛ kaa wɛ ngua, nɛ e sake ngɔ fɔ wo mi nɛ e ke: “Kikɛ nɛ ɔ a ma sake Babilon ma ngua a ngɔ fɔ he tlukaa, nɛ a be lɛ nae kulaa hu.

²² Nɛ a be saku fiali kɛ latsɛmɛ kɛ bɛ kpali kɛ titimati kpali ɔmɛ a gbi nue kulaa hu ngɛ o mi, nɛ a be galɔ ko galɔ ko nɛ le ga nae kulaa hu ngɛ o mi, nɛ a be wɛɛmi nya nue kulaa hu ngɛ o mi,

²³ nɛ kane la be tsoe kulaa hu ngɛ o mi, nɛ a be ayɛflo huno kɛ ayɛflo gbi nue kulaa hu ngɛ o mi, ejakaa o jua yeli ɔmɛ ji zugba a nɔ nimli nguahi, ejakaa o kunya yemi ɔ, a kɛ sisi ma jeli ɔmɛ kulaa.

²⁴ Babilon mi a na gbali kɛ klɔuklɔu bihi kɛ nihi tsuo nɛ a gbe ngɛ zugba a nɔ ɔ a muɔ ɔ ngɛ.”