Kpojemi 17 - Somi He Ɔ

Ajuama kpanaaku ɔ

¹ Kɛkɛ nɛ hiɔwe bɔfohi kpaago ɔ nɛ a hɛɛ tsinesa kpaago ɔmɛ a ti nɔ kake ba nɛ e kɛ mi ba tu munyu ke: “Ba nɛ ma tsɔɔ mo ajuama kpanaaku ɔ nɛ hii si ngɛ nyu babauu ɔ nɔ ɔ kojomi ɔ,

² nɔ nɛ zugba a nɔ matsɛmɛ ɔmɛ kɛ bɔ ajuama, nɛ nihi nɛ ngɛ zugba a nɔ ɔ de da kɛ e ajuama bɔmi da a.”

³ Nɛ e kpaka mi kɛ ho nga nɔ ya ngɛ mumi mi; nɛ i na yo ko nɛ hii si ngɛ lohwe nɛ tsuɔ kaa muɔ ko nɔ nɛ musu bɔmi biɛhi kpe e he, nɛ e ngɛ yi kpaago kɛ koli nyɔngma.

⁴ Nɛ yo ɔ wo tade nɛ hɛɛ alamua yumu su kɛ tade nɛ tsuɔ kaa muɔ, nɛ a kɛ sika kɛ tɛ nɛ he jua wa kɛ adiagba wo lɛ, nɛ e hɛɛ sika kplu nɛ hyi tɔ kɛ e ajuama bɔmi ɔ mi ninye nihi kɛ mu ni ɔmɛ ngɛ e dɛ mi;

⁵ nɛ a ngma biɛ ko ngɛ e hɛ nya nɛ ji laami sane ke: “Babilon ngua a, zugba a nɔ ajuama a kɛ ninye ni ɔmɛ a nyɛ.”

⁶ Nɛ i na yo ɔ kaa klɔuklɔu bi ɔmɛ a muɔ ɔ kɛ Yesu he odase yeli ɔmɛ a muɔ ɔ de lɛ da. Benɛ i na lɛ ɔ ye nya kpɛ ye he wawɛɛ nitsɛ.

⁷ Nɛ hiɔwe bɔfo ɔ de mi ke: “Mɛni he je o nya ngɛ o he kpɛe? Ma sɛɛ mo yo ɔ kɛ lohwe nɛ e hii si ngɛ nɔ nɛ ngɛ yi kpaago kɛ koli nyɔngma a he laami sane ɔ.

⁸ Lohwe ɔ nɛ o na a hi si hyɛ, se e be hu. E maa je muɔ voo ɔ mi kɛ je kpo kɛ ba be kɛ ho hɛ mi kpatami mi ya; nɛ nihi nɛ a ngɛ zugba a nɔ nɛ a ngmɛ́ a biɛ ngɛ wami womi ɔ mi kɛ je je mi sisije ɔ nya maa kpɛ a he, ke a na lohwe ɔ nɛ hi si hyɛ nɛ e be hu nɛ e maa ba a.

⁹ “Hiɛ ɔ juɛmi nɛ ni lemi ngɛ mi ɔ ngɛ. Yi kpaago ɔ ji yoku kpaago nɛ yo ɔ hii si ngɛ nɔ ɔ nɛ, nɛ matsɛmɛ kpaago hu ji mɛ:

¹⁰ nihi enuɔ ɔ gbee si, nɛ nɔ kake ngɛ, nɛ nɔ kpa a na we nɛ e ba, nɛ ke e ba a, ja e hi si bɔɔ.

¹¹ Nɛ lohwe ɔ nɛ hi si sa nɛ e be ɔ ji matsɛ nɛ ji kpaanyɔ, nɛ e je kpaago ɔmɛ a mi, nɛ e yaa shɛ mi kpatami mi.

¹² “Koli nyɔngma nɛ o na a, matsɛmɛ nyɔngma ʼi, nihi nɛ matsɛ yemi ko sui a dɛ, se kɛ ɔ, a kɛ lohwe ɔ na he blɔ kaa matsɛmɛ ngmlɛfia kake.

¹³ Nimli nɛ ɔmɛ hɛɛ juɛmi kake, nɛ a kɛ a he wami kɛ a blɔ nya a ha lohwe ɔ kulaa.

¹⁴ Ni nɛ ɔmɛ kɛ Tobi ɔ maa huw ta, nɛ Tobi ɔ maa ye a nɔ, ejakaa lɛ ji nyɔmtsɛmɛ a Nyɔmtsɛ kɛ matsɛmɛ a Matsɛ, nɛ nihi nɛ a kɛ lɛ ngɛ ɔ ji ninɛmɛ nɛ a tsɛ kɛ ninɛmɛ nɛ a hia kɛ ninɛmɛ nɛ heɔ yeɔ ɔ.”

¹⁵ Nɛ hiɔwe bɔfo ɔ de mi ke: “Nyu ɔ nɛ o na nɛ yo ajuama a hii si ngɛ nɔ ɔ ji mahi kɛ asafohi kɛ je mahi kɛ mahi a nɔ gbihi.

¹⁶ Nɛ koli nyɔngma nɛ o na a, kɛ lohwe ɔ, maa nyɛ ajuama a, nɛ a ma kpɔ e nihi kulaa nɛ e ngɛ ɔ, nɛ a ma kpa e he bo, nɛ a maa ye e he lo, nɛ a kɛ la maa sa lɛ.

¹⁷ Ejakaa Mawu kɛ wo a tsui mi konɛ a pee e yi mi tomi ni ɔmɛ, nɛ a hɛɛ juɛmi kake, nɛ a kɛ a matsɛ yemi ɔ nɛ ha lohwe ɔ kɛ ya su be nɛ a maa gbe nihi nɛ Mawu de ɔmɛ a nya.

¹⁸ “Nɛ yo ɔ nɛ o na a ji ma ngua nɛ yeɔ je ɔ mi matsɛmɛ ɔmɛ a nɔ ɔ nɛ.”