Kpojemi 16 - Somi He Ɔ

Mawu mi mi fumi tsinesa amɛ

¹ Kɛkɛ nɛ i nu gbi ngua ko nɛ je sɔlemi tsu ɔ mi nɛ e ngɛ hiɔwe bɔfohi kpaago ɔ dee ke: “Nyɛɛ ya nɛ nyɛ ya plɛ Mawu mi mi fumi tsinesa kpaago ɔmɛ ngɔ pue zugba a nɔ!”

² Nɛ kekleekle nɔ ɔ pue nɔ kɛ ho, nɛ e ya plɛ e tsinesa a mi ni ɔmɛ ngɔ pue zugba a nɔ; nɛ ninɛmɛ nɛ lohwe ɔ okadi ɔ ngɛ a he ɔ kɛ ninɛmɛ nɛ jaa e maga a hia pa yayahi nɛ yee nɔ.

³ Nɛ hiɔwe bɔfo nɛ ji enyɔ ɔ plɛ e tsinesa a mi ni ɔmɛ ngɔ wo wo mi, nɛ e plɛ muɔ kaa nɔ gbogboe nɔ́, nɛ nɔ́ tsuaa nɔ́ nɛ hɛ ngɛ ngɛ wo ɔ mi ɔ gbo.

⁴ Nɛ hiɔwe bɔfo nɛ ji etɛ ɔ plɛ e tsinesa a mi ni ɔmɛ ngɔ wo pahi kɛ nyu hɛngmɛ ɔmɛ a mi, nɛ nyu ɔ plɛ muɔ.

⁵ Nɛ i nu nɛ nyu ɔmɛ a nɔ bɔfo ɔ ngɛ dee ke: “Dalɔ ji mo, Nyɔmtsɛ, nɔ nɛ ngɛ kɛ nɔ nɛ hi si sa kɛ nɔ nɛ ji nɔ klɔuklɔu ɔ, ejakaa o nɔ da ngɛ o kojomi nɛ ɔmɛ a mi.

⁶ A pue klɔuklɔu bi ɔmɛ kɛ gbali ɔmɛ a muɔ si, nɛ lɔ ɔ he ɔ muɔ nɔuu o ha mɛ nɛ a nu, ejakaa e sa mɛ ja.”

⁷ Kɛkɛ nɛ i nu nɛ bɔ sami latɛ ɔ ngɛ dee ke: “Ee, Nyɔmtsɛ Mawu Ope, anɔkuale kɛ dami ji o kojomi ɔmɛ ɔ nɛ.”

⁸ Nɛ hiɔwe bɔfo nɛ ji eywiɛ ɔ plɛ e tsinesa a mi ni ɔmɛ ngɔ pue pu ɔ nɔ; nɛ a ha lɛ he wami nɛ e kɛ la nɛ sa nimli.

⁹ Nɛ e la dɔmi babauu ɔ sa nimli nɛ tu musu bɔmi munyuhi kɛ si Mawu nɛ ngɛ he wami ngɛ kikɛmɛ a haomi nɛ ɔmɛ a nɔ ɔ biɛ ɔ, se a tsakee we a tsui nɛ a wo e hɛ mi nyami.

¹⁰ Nɛ hiɔwe bɔfo nɛ ji enuɔ ɔ plɛ e tsinesa a mi ni ɔmɛ ngɔ pue lohwe ɔ matsɛ sɛ ɔ nɔ; nɛ e matsɛ yemi he ɔ wo diblii, nɛ nimli ta a lilɛ ngɛ nɔ nami he,

¹¹ nɛ a tu musu bɔmi munyuhi kɛ si Mawu ngɛ hiɔwe ɔ ngɛ a nɔ nami kɛ a pa amɛ a he, se a tsakee we a tsui kɛ ji a ni tsumi ɔmɛ a mi.

¹² Kɛkɛ nɛ hiɔwe bɔfo nɛ ji ekpa a plɛ e tsinesa a mi ni ɔmɛ ngɔ wo Eufrate pa ngua a mi, nɛ e mi nyu ɔ mii, konɛ a kɛ dla blɔ ngɔ ha matsɛmɛ nɛ je puje he ɔ.

¹³ Kɛkɛ nɛ i na mumi yayami etɛ nɛ ngɛ kaa ovɔnɔhi loo kuɔwihi ngɛ kpo jee kɛ ngɛ sinɔ ngua a nya mi kɛ lohwe ɔ nya mi kɛ lakpa gbalɔ ɔ nya mi jee;

¹⁴ ejakaa mumi yayamihi a mumi ji mɛ, nɛ a peɔ nyakpɛ nihi, nɛ a yaa matsɛmɛ nɛ ngɛ je mluku ɔ kulaa mi ɔ ngɔ, konɛ a ya bua a nya kɛ ya Mawu Ope ɔ ligbi ngua a nɔ ta a.

¹⁵ “Oʼɛ i ma kaa juɔ. A gbaa nɔ nɛ huɔɔ nɛ e hyɛɛ e tade ɔmɛ a nɔ saminya a, konɛ e ko nyɛɛ he gu nɛ e zo ba je kpo.”

¹⁶ Kɛkɛ nɛ mumi yayami ɔmɛ bua matsɛmɛ ɔmɛ a nya kɛ ho he ko nɛ a tsɛɛ lejɛ ɔ ngɛ Hebri gbi mi ke Harmagedon ɔ ya.

¹⁷ Nɛ hiɔwe bɔfo nɛ ji kpaago ɔ plɛ e tsinesa a mi ni ɔmɛ ngɔ wo kɔɔhiɔ mi; nɛ gbi ngua ko je hiɔwe sɔlemi tsu ɔ mi kɛ je matɛ sɛ ɔ mi de ke: “A gbe nya!”

¹⁸ Nɛ oslaba kɛ pɛmi kɛ hiɔwe simi ba, nɛ zugba mimiɛ wawɛɛ, bɔ nɛ kɛ je be nɛ nimli ba zugba a nɔ nɛ ɔ, a nɛ́ jamɛ a zugba mimiɛmi ngua nɛ ngɛ kaa enɛ hyɛ.

¹⁹ Nɛ ma ngua a mi gba etɛ, nɛ maje li ɔmɛ a ma amɛ hule, nɛ a kai Babilon kpetekpleenyɛ ɔ ngɛ Mawu hɛ mi, konɛ a ngɔ e mi mi fumi nɛ nya wa a kplu ɔ mi da a ngɔ ha lɛ.

²⁰ Nɛ zugba kpɔ tsuaa zugba kpɔ nɛ wo bɔle lɛ ɔ tu fo, nɛ yoku ɔmɛ ɔ a nɛ́ mɛ hu.

²¹ Nɛ gbiɛ ngo ngu loo hiɔmi tɛ babauu nɛ kake jiɔmi maa pee sɛni mi tɛ jiɔmi pau lafa nɛ kɛ je hiɔwe ba pue nimli a nɔ; nɛ nimli ɔmɛ tu musu bɔmi munyuhi kɛ si Mawu ngɛ gbiɛ ngo ngu ɔmɛ a haomi ɔ he, ejakaaa a haomi ɔ nya wa tsɔ.