Kpojemi 14 - Somi He Ɔ

Nihi nɛ a kpɔ ɔmɛ a la

¹ Kɛkɛ nɛ i hyɛ, nɛ oʼɛ, Tobi ɔ daa si ngɛ Zion yoku ɔ nɔ, nɛ nimli akpe lafa nyingmi eywiɛ kɛ eywiɛ nɛ a ngma e biɛ kɛ e Tsɛ biɛ ngɛ a hɛ nya a piɛ e he.

² Nɛ i nu gbi ko kɛ je hiɔwe kaa nyu babauu pɛmi, nɛ jehanɛ hu kaa hiɔwe simi wawɛɛ pɛmi. Gbi nɛ i nu ɔ ngɛ kaa sakufiali nɛ hɛɛ a sakuhi nɛ a ngɛ fiae ɔ a gbi.

³ Nɛ a ngɛ Ta he ko lae ngɛ matsɛ sɛ ɔ hɛ mi kɛ hɛ kali eywiɛ kɛ nikɔtɔma amɛ a hɛ mi; nɛ nɔ ko nyɛ we la a nɛ e kase, ja nimli akpe lafa nyingmi eywiɛ kɛ eywiɛ ɔ nɛ a kpɔ kɛ je zugba a nɔ ɔ kɛkɛ.

⁴ Nimli nɛ ɔmɛ ji nihi nɛ kɛ yihi ble we a he, ejakaa nihewi nɛ ngɔɛ yihi ji mɛ, nɛ a nyɛɛ Tobi ɔ se kɛ yaa he tsuaa he nɛ e yaa a. Nimli nɛ ɔmɛ ji nihi nɛ a kpɔ kɛ je nimli a kpɛti nɛ a plɛ kekleekle yiblii ha Nyɔmtsɛ ɔ kɛ Tobi ɔ.

⁵ A nɛ́ lakpa ko ngɛ a nya mi, ejakaa piami ko be a he.

Hiɔwe bɔfohi etɛ ɔ

⁶ Kɛkɛ nɛ i na hiɔwe bɔfo kpa ko nɛ e ngɛ tee ngɛ kɔɔhiɔ mi, nɛ e hɛɛ neneene Sane Kpakpa nɛ e yaa jaje ngɔ tsɔɔ nihi nɛ ngɛ zugba a nɔ kɛ je ma tsuaa je ma kɛ wɛtso tsuaa wɛtso kɛ mahi a nɔ gbi slɔɔtohi kɛ ma tsuaa ma a, nɛ e kɛ gbi ngua de ke:

⁷ “Nyɛɛ ye Mawu gbeye nɛ nyɛɛ kɛ hɛ mi nyami nɛ ha lɛ, ejakaa e kojomi ngmlɛfia a su. Nyɛ ja nɔ nɛ pee hiɔwe kɛ zugba kɛ wo kɛ nyu hɛngmɛhi nɛ baa a.”

⁸ Nɛ hiɔwe bɔfo kpa nɛ ji enyɔ nyɛɛ se nɛ e ke: “E ywia, Babilon ma ngua a ywia, ejakaa e ha majemaje ɔ kulaa nu e ajuama bɔmi ɔ he mi mi fumi da a eko.”

⁹ Nɛ hiɔwe bɔfo kpa nɛ ji etɛ nyɛɛ a se, nɛ e kɛ gbi ngua de ke: “Ke nɔ ko ja lohwe ɔ kɛ e maga a, nɛ e heɔ e kadi ɔ ngɛ e hɛ nya loo e nine nɔ ɔ,

¹⁰ lɛ hu e maa nu Mawu cmi mi fumi da nɛ a tsa we mi nɛ ngɛ e mi mi fumi kplu ɔ mi ɔ eko, nɛ a ma pii lɛ ngɛ la gligliigli ɔ mi ngɛ hiɔwe bɔfo klɔuklɔu ɔmɛ a hɛ mi kɛ Tobi ɔ hɛ mi.

¹¹ Nɛ a plaami ɔ lasuku ɔ tee si kɛ yaa neneene kɛ neneene; nɛ nihi nɛ ja lohwe ɔ kɛ e maga, a kɛ nɔ tsuaa nɔ nɛ he e biɛ ɔ okadi ɔ na we he jɔmi nyɔ kɛ pia.

¹² Hiɛ ɔ klɔuklɔu bi ɔmɛ nɛ yeɔ Mawu kita amɛ kɛ Yesu nɔ hemi kɛ yemi ɔ nɔ ɔ a tsui si tomi ɔ ngɛ.

¹³ Nɛ i nu gbi kɛ je hiɔwe ngɛ dee ke: “Ngmaa: A gbaa ni gbogboehi nɛ gboɔ ngɛ Nyɔmtsɛ ɔ mi ɔ, kɛ je mwɔnɛ kɛ yaa nɛ ɔ. Ee, Mumi ɔ ke, konɛ a jɔɔ a he kɛ je a haomi ɔmɛ a mi; se a ni tsumi ɔmɛ nyɛɛ a se.”

Ngma kpami ngɛ je ɔ mi

¹⁴ Kɛkɛ nɛ i hyɛ, nɛ oʼɛ, bɔku hiɔ, nɛ nɔ ko hii si ngɛ bɔku ɔ nɔ kaa Nɔmlɔbi ɔ, nɛ e kle e yi si kɛ sika jlasi, nɛ e hɛɛ ngma kpami ha nɛ nya ba ngɛ e dɛ mi.

¹⁵ Nɛ bɔfo kpa ko je kpo kɛ je sɔlemi tsu ɔ mi nɛ e kɛ gbi ngua kpa ngmlaa kɛ de nɔ nɛ hii si ngɛ bɔku ɔ nɔ ke: “O kɛ o ngma kpami ha a nɛ wo mi nɛ o kpa ni, ejakaa ngma kpami ngmlɛfia a su, nɛ zugba a nɔ ngma a gbli.”

¹⁶ Nɛ nɔ nɛ hii si ngɛ bɔku ɔ nɔ ɔ sake e ngma kpami ha a ngɔ fɔ zugba a nɔ, nɛ a kpa zugba a nɔ ngma a.

¹⁷ Nɛ bɔfo kpa ko je kpo kɛ je sɔlemi tsu nɛ ngɛ hiɔwe ɔ mi, nɛ lɛ hu e hɛɛ ha nɛ nya ba.

¹⁸ Nɛ bɔfo kpa ko je kpo kɛ je bɔ sami latɛ ɔ mi, nɔ nɛ ngɛ la nɔ he wami, nɛ e kpa ngmlaa kɛ tsɛ nɔ nɛ hɛɛ ha nɛ nya ba a ke: “O kɛ o ha nɛ nya ba a nɛ wo mi nɛ o poo nɛ o bua zugba a nɔ wai yiblii sawe ɔmɛ a nya, ejakaa wai yiblii ɔ fu.”

¹⁹ Nɛ bɔfo ɔ sake e ha a ngɔ fɔ zugba a nɔ, nɛ e bua zugba a nɔ wai yiblii ɔmɛ a nya, nɛ e kɛ wo Mawu mi mi la wai ngami nɔ kpetekpleenyɛ ɔ mi.

²⁰ Nɛ a naa wai ngami nɔ ɔ nɔ ngɛ ma a se, nɛ muɔ je wai ngami nɔ ɔ mi kɛ kuɔ kɛ ya su okpɔngɔhi a nya mi dade ɔmɛ a he maa pee si tomi lafa enyɔ.