Kpojemi 13 - Somi He Ɔ

Lohwe enyɔ ɔmɛ

¹ Kɛkɛ nɛ i na lohwe ko nɛ e ngɛ kpo jee kɛ ngɛ wo ɔ mi jee kɛ ma, nɛ e ngɛ koli nyɔngma kɛ e yi kpaago, nɛ matsɛ pɛɛhi nyɔngma bu e koli ɔmɛ a nɔ, nɛ musubɔmi biɛhi ngɛ e yi ɔmɛ a nɔ.

² Nɛ lohwe ɔ nɛ i na a ngɛ kaa ogbetee, nɛ e nanehi ngɛ kaa osisibliisii nanehi, nɛ e nya ngɛ kaa jata nya. Nɛ sinɔ ngua a ngɔ lɛ nitsɛ e he wami ɔ kɛ e matsɛ sɛ ɔ kɛ he blɔ ngua a ngɔ ha lɛ.

³ Nɛ i na e yi ɔmɛ a kpɛti kake nɛ ngɛ kaa nɔ nɛ a plaa lɛ gbenɔ plaami, se a tsa e gbenɔ plaami ɔ, nɛ je mluku ɔ kulaa nya kpɛ a he ngɛ lohwe ɔ he.

⁴ Nɛ ni ɔmɛ tsuo ja sinɔ ngua a nɛ ngɔ he blɔ ɔ ngɔ ha lohwe ɔ, nɛ a ke: “Mɛnɔ ngɛ kaa lohwe, ɔ nɛ mɛnɔ ma nyɛ nɛ e kɛ lɛ maa hwu ta?”

⁵ A ha lohwe ɔ nya nɛ e kɛ tu munyu nguahi kɛ musu bɔmi munyuhi, nɛ a ha lɛ he blɔ nɛ e pee enɛ hlami nyingmi eywiɛ kɛ enyɔ.

⁶ Nɛ e pã e nya mi nɛ e tu musu bɔmi munyui kɛ si Mawu, nɛ etu e biɛ ɔ kɛ he nɛ e hii ɔ kɛ nihi nɛ hii hiɔwe ɔ a he musu bɔmi munyuhi.

⁷ Nɛ a ha lɛ he blɔ nɛ e kɛ klɔuklɔu bi ɔmɛ nɛ hwu ta nɛ e ye a nɔ, nɛ a ha lɛ he blɔ ngɛ wɛtso tsuaa wɛtso kɛ ma tsuaa ma kɛ mahi a nɔ gbihi tsuo kɛ je ma tsuaa je ma nɔ.

⁸ Nɛ nihi kulaa nɛ ngɛ zugba a nɔ ɔ ma ja lɛ, nihi nɛ a ngmɛ́ a biɛ ngɛ Tobi nɛ a gbe ɔ wami womi ɔ mi kɛ je je mi sisije ɔ.

⁹ “Ke nɔ ko ngɛ tue ɔ, e nu!

¹⁰ Ke a to nɔ ko kɛ ha nyɔguɛ yemi ɔ, nyɔguɛ yemi mi e maa ya; ke nɔ ko kɛ klaate gbe nɔ ɔ, ja a kɛ klaate gbe lɛ. Hiɛ ɔ klɔuklɔu bi ɔmɛ a tsuisitomi kɛ hemi kɛ yemi ɔ ngɛ.”

¹¹ Kɛkɛ nɛ i na lohwe kpa ko nɛ e ngɛ kpo jee kɛ ngɛ zugba a mi jee, nɛ e ngɛ koli enyɔ kaa to bi, nɛ e tuɔ munyu kaa sinɔ ngua.

¹² Nɛ e tsuɔ kekle lohwe ɔ he blɔ ɔmɛ kulaa he ni ngɛ e hɛ mi, nɛ e haa zugba a kɛ nihi nɛ ngɛ nɔ ɔ jaa kekle lohwe ɔ nɛ a tsa e gbenɔ plaami ɔ.

¹³ Nɛ e peɔ okadi nguahi, nɛ e haa la po jee hiɔwe baa zugba a nɔ ngɛ nimli a hɛ mi.

¹⁴ Nɛ e kɛ nyakpɛ nihi nɛ e na he blɔ kaa e pee ngɛ lohwe ɔ hɛ mi ɔ sisiɔ ninɛmɛ nɛ ngɛ zugba a nɔ ɔ, nɛ e deɔ nihi nɛ ngɛ zugba a nɔ ɔ ke, a pee amaga ngɔ ha lohwe ɔ nɛ a kɛ klaate plaa lɛ nɛ e hɛ ngɛ ɔ.

¹⁵ Nɛ a ha lɛ he wami nɛ e kɛ mumi nɛ ha lohwe ɔ amaga a, konɛ lohwe ɔ amaga a nɛ tu munyu nɛ e ha a gbe nimli kulaa nɛ ja we lohwe ɔ amaga a.

¹⁶ Nɛ e haa nimli tsuo, nimli tsɔwi kɛ nimli nguahi, niatsɛmɛ kɛ ohiafohi, odehehi kɛ nyɔguɛhi kplɛɔ nɛ a kadi mɛ ngɛ a hiɛ ɔ nine loo a hɛ̃ nya.

¹⁷ Nɔ ko nɔ ko nyɛ we nɔ́ ko nɛ e he loo e jua, ja nɔ nɛ ngɛ okadi ɔ loo lohwe ɔ biɛ loo e biɛ ɔ yibɔ ɔ kɛkɛ.

¹⁸ Hiɛ ɔ nilemi ɔ ngɛ. Nɔ nɛ ngɛ juɛmi ɔ, e bu lohwe ɔ yibɔ ɔ he akaɔtaa, ejakaa yibɔ ɔ daa si ha nɔmlɔ biɛ; nɛ yibɔ ɔ ji lafa ekpa kɛ nyingmi ekpa kɛ ekpa.