Kpojemi 12 - Somi He Ɔ

Yo ɔ kɛ sinɔ ngua a

¹ Kɛkɛ nɛ a na okadi ngua ko ngɛ hiɔwe: yo ko nɛ e kɛ pu ha e he, nɛ nyɔhiɔ ngɛ e nane si, nɛ dodoe nyɔngma kɛ enyɔ jlasi fi e yi;

² nɛ e mi wa, nɛ e ngɛ ngmlaa kpae, nɛ e ngɛ kɔɔe, nɛ e ngɛ nɔ nae nɛ e ma fɔ.

³ Nɛ a na okadi kpa ngɛ hiɔwe, nɛ oʼɛ, sinɔ ngua tsutsuutsu kpetekpleenyɛ nɛ ngɛ yi kpaago kɛ koli nyɔngma, nɛ matsɛ pɛɛ kpaago bu e yi ɔmɛ a nɔ.

⁴ Nɛ ehlemi ngɛ hiɔwe dodoehi a midlami etɛ mi kake gblae, nɛ e tsɔ mɛ ngɔ pue zugba a nɔ. Nɛ sinɔ ngua a ba da yo nɛ ma fɔ ɔ hɛ mi, konɛ, ke e fɔ ɔ nɛ e mi e bi ɔ.

⁵ Nɛ yo ɔ fɔ bi nyumu nɔ nɛ kɛ dade tso ma kpaka maje li ɔmɛ kulaa a; nɛ a sa e bi ɔ kɛ ho Mawu ngɔ ya ngɛ e matsɛ sɛ ɔ kasa nya.

⁶ Nɛ yo ɔ tu fo kɛ ho nga nɔ he ko ya, he nɛ Mawu dla to ngɔ ha lɛ ɔ, konɛ a ya lɛ lɛ ngɛ lejɛ ɔ ligbihi akpe kɛ lafa enyɔ kɛ nyingmi ekpa.

⁷ Nɛ ta te si ngɛ hiɔwe: Mikael kɛ e bɔfo ɔmɛ hia sinɔ ngua a yi nɔ ta. Nɛ sinɔ ngua a bɔfo ɔmɛ piɛ e he kɛ hwu,

⁸ se a ye a nɔ, nɛ a nɛ blɔ ngɛ hiɔwe ha mɛ hu.

⁹ Nɛ a sake sinɔ ngua kpetekpleenyɛ ɔ, nɔ nɛ ji blema sinɔ ɔ nɛ a tsɛɛ lɛ Nyapolɔ loo Abosiami nɛ sisiɔ je mluku ɔ tsuo ɔ, ngɔ fɔ zugba a nɔ, nɛ a sake e bɔfo ɔmɛ hu ngɔ fɔ zugba a nɔ ngɔ piɛ e he.

¹⁰ Nɛ i nu gbi ngua ko ngɛ hiɔwe ke: “Jehanɛ yi wami hemi ɔ kɛ he wami ɔ kɛ matsɛ yemi ɔ plɛ wa Mawu ɔ nɔ, nɛ a kɛ he blɔ ɔ ha e Kristo (nɔ nɛ a pɔ lɛ nu) ɔ, ejakaa a sake wa nyɛmimɛ ɔmɛ a nya polɔ ɔ nɛ poo a nya ngɛ wa Mawu ɔ hɛ mi nyɔ kɛ pia a ngɔ fɔ he.

¹¹ Nɛ mɛɛ lɛɛ, Tobi ɔ muɔ ɔ kɛ mɛ nitsɛmɛ a odase yemi munyu ɔ, a kɛ ye e nɔ, nɛ a klɔɛ mɛ nitsɛmɛ a wami he kɛ ya su gbenɔ mi tete.

¹² Lɔ ɔ he ɔ, nyɛ hiɔwe kɛ nyɛ nihi nɛ ngɛ lejɛ ɔ, nyɛ na bua jɔmi! Musu tloo je ɔ kɛ wo! Ejakaa Abosiami kple si kɛ ba nyɛ ngɔ, e gli wawɛɛ, ejakaa e le kaa be bɔɔ kɛkɛ e piɛ ha lɛ.”

¹³ Nɛ benɛ sinɔ ngua a na kaa a sake lɛ ngɔ fɔ zugba a nɔ ɔ, e tiu yo ɔ nɛ fɔ bi nyumu ɔ.

¹⁴ Se a ngɔ kɔle ngua a ple enyɔ ɔmɛ ngɔ ha yo ɔ, konɛ e te kɛ ya nga a nɔ ngɛ e blɔ he ɔ, he nɛ a maa lɛ lɛ ngɛ jeha etɛ kɛ fa nɛ sinɔ ɔ be lɛ nae hu ɔ.

¹⁵ Nɛ sinɔ ɔ su nyu nɛ ngɛ kaa pa kɛ je e nya mi kɛ pue yo ɔ se, konɛ nyu ɔ nɛ sa lɛ kɛ ho.

¹⁶ Se zugba a ye bua yo ɔ; nɛ zugba a bli e nya mi nɛ e mii nyu ɔ nɛ sinɔ ngua a su kɛ je e nya mi ngɔ pue he ɔ.

¹⁷ Kɛkɛ nɛ sinɔ ngua a mi mi fu yo ɔ, nɛ e pue nɔ kɛ ho konɛ e kɛ yo ɔ nina nɛ piɛ nɛ yeɔ Mawu kita amɛ a nɔ nɛ a hɛɛ Yesu Kristo he odase yemi ɔ mi ɔ ya hwu ta.

¹⁸ Nɛ e ya da wo nya zia a nɔ.