Kpojemi 11 - Somi He Ɔ

Odaseyeli enyɔ ɔ

¹ Nɛ a ha mi gla tso ko nɛ ngɛ kaa kalemi tso ko nɛ a ke: “Tee si nɛ o kale Mawu sɔlemi tsu ɔ kɛ bɔ sami latɛ ɔ kɛ nihi nɛ jaa Mawu ngɛ mi ɔ;

² se kpo nɛ ngɛ sɔlemi tsu ɔ agbo ɔ nya a, si kɔlɔ ɔ, nɛ o ko kale, ejakaa a kɛ ha majemaje li ɔmɛ konɛ a naa ma klɔuklɔu ɔ nɔ hlami nyingmi eywiɛ kɛ enyɔ.

³ Nɛ ma ha ye odaseyeli enyɔ ɔ ma bu kpekpe nɛ a maa gba ligbihi akpe kɛ lafa enyɔ kɛ nyingmi ekpa.”

⁴ Odaseyeli enyɔ nɛ ɔmɛ ji nu tsohi enyɔ ɔ kɛ kane tsohi enyɔ ɔ nɛ daa si ngɛ zugba a nɔ nyɔmtsɛ ɔ hɛ mi ɔ nɛ.

⁵ Nɛ ke nɔ ko ngɛ hlae nɛ e pee mɛ yayami ɔ, la jee a nya mi saa a he nyɛli ɔmɛ; nɛ ke nɔ ko ngɛ hlae nɛ e pee mɛ yayami ɔ, ja nɔuu a maa gbe lɛ.

⁶ Nimli nɛ ɔmɛ ngɛ he blɔ kaa sa ngaa hiɔwe nya konɛ hiɔmi ko nɛ ngɛ a gbami ligbi ɔmɛ a mi; nɛ a ngɛ he blɔ hulɔ ngɛ nyu ɔmɛ a nɔ kaa a haa a plɛɔ peɔ muɔ, nɛ a kɛ haomi haoɔ zugba a si abɔ nɛ a suɔ.

⁷ Nɛ ke a gbe a odaseyemi ɔ nya a, lohwe ɔ nɛ je muɔ voo ɔ mi ɔ kɛ mɛ maa hwu ta, nɛ e maa ye a nɔ, nɛ e maa gbe mɛ;

⁸ nɛ a gbogboe ɔmɛ ma pue si ngɛ ma ngua nɛ a tsɛɛ lɛ ngɛ mumi mi ke Sodoma kɛ Mizraim ɔ, he nɛ a sɛu a Nyɔmtsɛ ɔ ngɛ ɔ magbɛ ɔmɛ a nɔ.

⁹ Nɛ ma amɛ kɛ wɛtso ɔmɛ kɛ gbihi slɔɔto ɔmɛ kɛ majemaje li ɔmɛ a ti ni komɛ maa hyɛ a gbogboe ɔmɛ ligbi etɛ̃ kɛ fa, nɛ a be kplɛe nɛ a pu mɛ.

¹⁰ Nɛ nihi nɛ ngɛ zugba a nɔ ɔ ma nya ngɛ a gbenɔ ɔ he, nɛ a mi mi maa flii mɛ, nɛ a maa ke a he nihi, ejakaa kikɛmɛ a gbali enyɔ nɛ ɔmɛ hao ninɛmɛ nɛ ngɛ zugba a nɔ ɔ.

¹¹ Nɛ ligbi etɛ kɛ fa a se ɔ, wami mumi je Mawu ngɔ ba a mi, nɛ a te si da a nane nɔ, nɛ gbeye nɛ nya wa nu nihi nɛ na mɛ ɔ.

¹² Nɛ gbali enyɔ ɔmɛ nu gbi kpetekpleenyɛ je hiɔwe de mɛ ke: “Nyɛɛ kuɔ kɛ ba hiɛ ɔ nɛ ɔ!” Nɛ a kuɔ kɛ ho hiɔwe ya ngɛ bɔku ɔ mi, nɛ a he nyɛli ɔmɛ na mɛ.

¹³ Nɛ lɛ ngmlɛfia a nɔ nɔuu ɔ, zugba mimiɛ wawɛɛ, nɛ ma a mi dlami nyɔngma mi kake hule, nɛ zugba mimiɛmi ɔ mi ɔ, a gbe nimli akpe kpaago. Ninɛmɛ nɛ piɛ ɔ ye gbeye, nɛ a ngɔ hɛ mi nyami ngɔ ha hiɔwe Mawu ɔ.

¹⁴ Musu nɛ ji enyɔ ɔ be; nɛ oʼɛ musu nɛ ji etɛ ɔ ma oya.

Titimati nɛ ji kpaago ɔ

¹⁵ Kɛkɛ nɛ hiɔwe bɔfo nɛ ji kpaago ɔ kpa e titimati ɔ, nɛ a nu gbi nguahi ngɛ hiɔwe ke: “Je nɛ mi matsɛ yemi ɔ plɛ wa Nyɔmtsɛ ɔ kɛ e Kristo ɔ nɔ, nɛ e maa ye matsɛ kɛ maa ya neneene kɛ neneene!”

¹⁶ Kɛkɛ nɛ nikɔtɔmahi nyingmi enyɔ kɛ eywiɛ nɛ hii si ngɛ a matsɛ sɛ ɔmɛ a nɔ ngɛ Mawu hɛ mi ɔ kɛ a hɛ mi bu si, nɛ a ja Mawu

¹⁷ de ke: “Wa naa mo si, mo Nyɔmtsɛ Mawu Ope, Mo nɔ nɛ o ngɛ nɛ o hi si ɔ, Kaa o ngɔ o he wami kpetekpleenyɛ ɔ Nɛ o bɔni matsɛyemi,

¹⁸ Nɛ majemaje li ɔmɛ a mi mi fu, Ejakaa o mi mi fumi be ɔ su Nɛ a maa kojo ni gbogboe ɔmɛ Nɛ a maa wo o sɔmɔli nɛ ji gbali ɔmɛ Kɛ klɔuklɔu bi ɔmɛ kɛ nihi nɛ yee mo gbeye ɔ hiɔ, nimli wawi kɛ nimli nguahi Nɛ yee o biɛ ɔ gbeye ɔ. Be su nɛ a ma puɛ nihi nɛ puɛɔ zugba a.”

¹⁹ Nɛ a bli Mawu sɔlemi tsu ɔ nya ngɛ hiɔwe, nɛ a na e somi daka a ngɛ sɔlemi tsu ɔ mi, nɛ oslaba, kɛ gbi kɛ hiɔwe simi kɛ zugba mimiɛmi kɛ gbiɛ ngo ngu loo hiɔmi tɛ babauu ba.