Kpojemi 10 - Somi He Ɔ

Hiɔwe Bɔfo ɔ kɛ womi kpo wayo ɔ

¹ Kɛkɛ nɛ i na hiɔwe bɔfo kpa ko nɛ he wa nɛ e je hiɔwe kɛ ngɛ si kplee, nɛ e ha bɔku, nɛ alale ngɛ e yi kpɛti, nɛ e hɛ mi ngɛ kaa pu, nɛ e nanehi ngɛ kaa la titimahi.

² Nɛ e hɛɛ womi kpo wayo ko nɛ a bli nya ngɛ e dɛ mi; nɛ e kɛ e hiɛ ɔ nane ma wo nɔ, nɛ e kɛ e muɔ nane hu ma zugba nɔ.

³ Nɛ e kpa ngmlaa wawɛɛ kaa jata huaa; nɛ benɛ e ngɛ huae ɔ, hiɔwe simi kpaago ɔ wo a gbi mi.

⁴ Benɛ hiɔwe simi kpaago ɔ wo a gbi mi ɔ, jinɛ i miɔ nɛ ma ngma; nɛ i nu gbi ko nɛ je hiɔwe de mi ke: “Sɔuu nihi nɛ hiɔwe simi kpaago ɔ de ɔ nya, nɛ o ko ngma.”

⁵ Nɛ hiɔwe bɔfo ɔ nɛ i na kaa e daa si ngɛ wo ɔ nɔ kɛ zugba a nɔ ɔ wo e hiɛ ɔ nine nɔ kɛ ya hiɔwe,

⁶ nɛ e tsɛ nɔ nɛ hɛ ngɛ kɛ je neneene kɛ yaa neneene nɛ bɔ hiɔwe kɛ nihi nɛ ngɛ mi ɔ kɛ zugba kɛ nihi nɛ ngɛ mi ɔ kɛ wo kɛ nihi nɛ ngɛ mi ɔ nɛ e kɛ ka kita ke: “Be ko be ko be hu!

⁷ Se mohu ke hiɔwe bɔfo nɛ ji kpaago ɔ kpa e titimati ɔ, kɛkɛ lɛɛ a gbe Mawu laami sane ɔ hu nya, bɔ nɛ e jaje Sane Kpakpa a tsɔɔ lɛ nitsɛ e tsɔli nɛ ji gbali ɔmɛ ɔ.”

⁸ Nɛ gbi nɛ i nu kɛ je hiɔwe ɔ kɛ mi tu munyu ekohu, nɛ e ke: “Yaa nɛ o ya he womi ɔ nɛ a bli nya a ngɛ bɔfo nɛ daa si ngɛ wo ɔ nɔ kɛ zugba a nɔ ɔ dɛ.”

⁹ I ya bɔfo ɔ ngɔ, nɛ i ya de lɛ ke: “Ngɔɔ womi kpo wayo ɔ ngɔ ha mi.” Nɛ e de mi ke: “He nɛ o ye; e maa duɔ ngɛ o mi mi, se e maa ngɔɔ dɔkɔdɔkɔ ngɛ o nya mi kaa hwo.”

¹⁰ Kɛkɛ nɛ i he womi kpo wayo ɔ ngɛ bɔfo ɔ dɛ nɛ i ye, nɛ e ngɔɔ dɔkɔdɔkɔ ngɛ ye nya mi kaa hwo, nɛ benɛ i ye ɔ, e duɔ ngɛ ye mi mi.

¹¹ Nɛ e de mi ke: “E sa kaa o gba ekohu ngɛ nimli kɛ majamaje kɛ mahi a nɔ gbihi kɛ matsɛmɛ fuu a he.”