Kpojemi 1 - Somi He Ɔ

¹ Yesu Kristo kpo jemi nɛ Mawu ngɔ ha lɛ nɛ e kɛ tsɔɔ e sɔmɔli ɔmɛ nihi nɛ sa kaa e ba mi ngɛ be kpiti mi, nɛ e kɛ tsɔ e bɔfo ɔ nɛ e kɛ ba tsɔɔ e sɔmɔlɔ Yohane,

² nɔ nɛ ye Mawu munyu ɔ kɛ Yesu Kristo odase ɔ he odase ngɛ nihi tsuo nɛ e na a he ɔ.

³ A gbaa nɔ nɛ kaneɔ ɔ kɛ nihi nɛ nuɔ gbami munyu ɔmɛ ɔ, kɛ nihi nɛ ngɔɔ nihi nɛ a ngma ngɛ mi ɔ ngɔ toɔ ɔ, ejakaa be ɔ su ta.

Munyuhi nɛ a kɛ nga Asafohi kpaago ɔ

⁴ Yohane ngma ya ha asafohi kpaago nɛ ngɛ Asia a: Dloomi kɛ he jɔmi ha nyɛ, kɛ je nɔ nɛ ngɛ ɔ, kɛ nɔ nɛ hi si sa a, kɛ nɔ nɛ maa ba a dɛ mi, nɛ kɛ je mumihi kpaago nɛ ngɛ e matsɛ sɛ ɔ hɛ mi ɔ ngɔ,

⁵ nɛ kɛ je Yesu Kristo, nɛ ji odaseyelɔ anɔkualetsɛ ɔ, ni gbogboehi a kpɛti kekleekle bi kɛ zugba a nɔ matsɛmɛ ɔmɛ a nɔyelɔ ɔ dɛ mi. Nɔ nɛ suɔ wɔ, nɛ e kɛ lɛ nitsɛ e muɔ tsukɔ wa he kɛ je wa he yayami ɔmɛ a mi,

⁶ nɛ e ngɔ wɔ pee matsɛmɛ a weku [kɛ] osɔfohi ngɔ ha e Tsɛ Mawu ɔ, lɛ a ngɔ hɛ mi nyami kɛ nɔ yemi ɔ ngɔ ha kɛ ya neneene kɛ neneene! Amen.

⁷ Oʼɛ, e ma kɛ bɔku ɔmɛ, nɛ hɛngmɛ tsuaa hɛngmɛ maa na lɛ kɛ nihi nɛ gbɔɔ lɛ ni ɔ hulɔ, nɛ zugba a nɔ weku ɔmɛ kulaa maa wo ya ngɛ e he. Ee, Amen.

⁸ Nyɔmtsɛ Mawu ɔ nɛ ji nɔ nɛ ngɛ ɔ, kɛ nɔ nɛ hi si sa a, kɛ nɔ nɛ maa ba, nɛ ji ope ɔ, ke: “Ami ji Alfa a kɛ Omega a” (kekleekle nɔ kɛ nyagbe nɔ).

Kristo he ninami

⁹ Imi Yohane nɛ ji nyɛ nyɛmi kɛ nyɛ huɛ ngɛ Yesu Kristo amanehlu ɔ kɛ e matsɛ yemi ɔ kɛ e tsui si tomi ɔ mi ɔ, i ngɛ zugba kpɔ nɛ wo bɔle lɛ nɛ a tsɛɛ lɛ Patmo ɔ nɔ ngɛ Mawu munyu ɔ kɛ Yesu Kristo he odase yemi he.

¹⁰ Mumi ɔ ba ye nɔ ngɛ Nyɔmtsɛ ɔ ligbi ɔ nɔ, nɛ i nu gbi ngua ko ngɛ ye se kaa titimati

¹¹ nɛ de mi ke: “Ngmaa nɔ́ nɛ o ngɛ nae ɔ ngɔ wo womi mi, nɛ o kɛ mane asafohi kpaago nɛ ngɛ Efeso, kɛ Smirna, kɛ Pergami, kɛ Tiatira kɛ Sarde, kɛ kɛ Filadelfia, kɛ Laodikea a.

¹² I plɛ ye he kone ma hyɛ gbi nɛ kɛ mi ngɛ munyu ɔ tue ɔ. Nɛ bene i plɛ ye he ɔ, i na sika kane tsohi kpaago,

¹³ kɛ nɔ ko ngɛ kane tso kpaago ɔmɛ sa kpɛti nɛ ngɛ kaa Nɔmlɔ Bi, nɛ e wo tade klɔii nɛ e kɛ sika kpa fi e gugue;

¹⁴ nɛ e yi kɛ e yi bwɔmi hiɛɛ kaa to he bwɔmi hiɔ, kaa snoo, nɛ e hɛngmɛhi ngɛ kaa la lilɛhi,

¹⁵ nɛ e nanehi ngɛ kaa ayawa klaiklai nɛ tsu ngɛ flɔnɔɔ mi, nɛ e gbi ngɛ kaa nyu babauu pɛmi.

¹⁶ Nɛ e hɛɛ dodoehi kpaago ngɛ e hiɛ ɔ nine mi, nɛ hiɔ kɛ e nya enyɔ nɛ nya mi ba je kpo ngɛ e nya mi, nɛ e hɛ mi ngɛ kaa pu nɛ ngɛ tsoe wawɛɛ.

¹⁷ Nɛ benɛ i na lɛ ɔ, i nɔ si ngɛ e nane nyɛ kaa nɔ gbogboe; nɛ e kɛ e hiɛ ɔ nine fɔ ye nɔ, nɛ e de mi ke: “Koo ye gbeye; ami ji kekleekle nɔ ɔ kɛ nyagbe nɔ ɔ,

¹⁸ kɛ hɛkalɔ. I gbo, nɛ oʼɛ, ye hɛ ngɛ kɛ yaa neneene kɛ neneene, nɛ i hɛɛ gbeje kɛ gbenɔ nya safe ɔmɛ.

¹⁹ Lɔ ɔ he ɔ ngmaa nihi nɛ o na a, kɛ nihi nɛ ngɛ ɔ, kɛ nihi nɛ maa ba ngɛ ni nɛ ɔmɛ a se ɔ:

²⁰ dodoehi kpaago nɛ o na ngɛ ye hiɛ ɔ nɔ ɔ laami sane ɔ, kɛ sika kane tsohi kpaago ɔ. Dodoehi kpaago ɔ ji asafohi kpaago ɔmɛ a bɔfohi, kɛ kane tsohi kpaago nɛ o na a ji asafohi kpaago ɔmɛ ɔ nɛ.”