Kolosebi 4 - Somi He Ɔ

¹ Nyɔmtsɛmɛ, nyɛɛ ngɔ nɔ́ nɛ da kɛ nɔ́ nɛ sa pɛ ngɔ ha nyɛ sɔmɔli ɔmɛ, nɛ nyɛɛ le kaa nyɛ hu nyɛ ngɛ nyɔmtsɛ ngɛ hiɔwe.

Nyagbe gawomi

² Nyɛɛ sɔle daa, nyɛɛ fɔ nyɔ ngɛ mi kɛ sina;

³ nɛ jehanɛ snyɛɛ sɔle ha wɔ hulɔ, konɛ Mawu nɛ bli munyu ɔ sinya a ha wɔ nɛ wa kɛ fiɛ Kristo laami sane ɔ, nɔ́ he nɛ i fɔɔ si ngɛ kpa mi nɛ ɔ,

⁴ konɛ ma je kɔlɔ ɔ si paa bɔ nɛ da kaa ma de ɔ.

⁵ Nyɛɛ nyɛɛ ngɛ ni lemi nya, ngɛ nihi nɛ ngɛ se ɔmɛ a hɛ mi, nɛ nyɛ tsu nyɛ deka a he ni.

⁶ Nyɛ ha nyɛ munyu he nɛ tsɔ daa, nɛ ngo nɛ hi mi, nɛ nyɛɛ le bɔ nɛ sa kaa nyɛ ha nɔ tsuaa nɔ heto.

Nyagbe sɛyemi

⁷ Tihiko, nɛ ji suɔmi nyɛmi kɛ anɔkuale sɔmɔlɔ kɛ huɛ tsɔlɔ ngɛ Nyɔmtsɛ ɔ mi ɔ, maa bɔ nyɛ ye he sane ɔmɛ tsuo.

⁸ Enɛ ɔ he nɔuu nɛ i tsɔ lɛ nyɛ ngɔ, konɛ ma nu nyɛ he, nɛ e wo nyɛ bua,

⁹ nɛ i ngɔ Onesimo nɛ ji anɔkualetsɛ kɛ nyɛmi nɛ a suɔ nɛ je nyɛ kpɛti ɔ ngɔ piɛ e he; a ma ba bɔ nyɛ hiɛ ɔ sanehi kulaa.

¹⁰ Aristarko, ye huɛ pa mi no ɔ, kɛ Marko nɛ ji Barnaba nyɛmi bi ɔ, (nɔ nɛ he nɛ nyɛ na womi ɔmɛ ɔ, ke e ba nyɛ ngɔ ɔ, nyɛ he lɛ hɛmuɔ),

¹¹ kɛ Yesu nɛ a tsɛɛ lɛ Yusto ɔ, nihi nɛ je ninɛmɛ nɛ a po mɛ ɔmɛ a kpɛti ɔ, ke a biɔ nyɛ. Ni nɛ ɔmɛ pɛ ji ye huɛmɛ ni tsuli ngɛ Mawu matsɛ yemi ɔ he; a ji bua womi kɛ ha mi.

¹² Epafra nɛ je nyɛ kpɛti nɛ ji Kristo sɔmɔlɔ nɛ daa nɛ ɔ e kaii nyɛ ngɛ e sɔlemihi a mi, konɛ nyɛɛ da si nɛ nyɛɛ hi kɛ pi si nɛ nyɛ hyi tɔtɔɔtɔ ngɛ Mawu suɔmi nya nihi kulaa mi ɔ, ke e biɔ nyɛ.

¹³ I ngɛ e he odase yee kaa e gboɔ dengme wawɛɛ ngɛ nyɛɛ kɛ nihi nɛ ngɛ Laodikea kɛ nihi nɛ ngɛ Hierapoli ɔmɛ a he.

¹⁴ Luka, tsopatsɛ nɛ a suɔ ɔ, kɛ Dema ke a biɔ nyɛ.

¹⁵ Wa biɔ nyɛmimɛ nɛ ngɛ Laodikea a, kɛ Nimfa kɛ asafo nɛ ngɛ e we ɔ.

¹⁶ Nɛ ke a kane womi nɛ ɔ ngɛ nyɛ ngɔ ɔ, nyɛ ha a kane ngɛ Laodikea asafo ɔ mi hulɔ, nɛ a ha nyɛ hu nyɛɛ kane Laodikea nɔ ɔ.

¹⁷ Nɛ nyɛ de Arkipo ke: “Hyɛ nɛ o tsu sɔmɔmi ni tsumi nɛ a tu ngɔ wo o dɛ ngɛ Nyɔmtsɛ ɔ mi ɔ, nɛ o gbe nya kɛ pi si!”

¹⁸ Imi Paulo nitsɛ ye nine nya womi nɛ i ngma ji nɛ ɔ nɛ. Nyɛ kai ye kɔsɔkɔsɔ ɔmɛ! Dloomi ɔ kɛ nyɛ nɛ hi si! Amen.