Kolosebi 3 - Somi He Ɔ

¹ Lɔ ɔ he ɔ, ke a tle nyɛɛ kɛ Kristo tsuo si ɔ, nyɛ hla nihi nɛ ngɛ hiɔwe, he nɛ Kristo ngɛ nɛ e hii si ngɛ Mawu hiɛ ɔ nɔ ɔ.

² Nihi nɛ ngɛ hiɔwe ɔmɛ a he nyɛ susu, pi nihi nɛ ngɛ zugba a nɔ ɔ.

³ Ejakaa nyɛ gbo nɛ a ngɔ nyɛ wami ɔ kɛ Kristo tsuo ngɔ laa ngɛ Mawu mi.

⁴ Benɛ Kristo, nɔ nɛ ji wa wami ɔ ma pue ɔ, lɔ ɔ lɛɛ nyɛ hu nyɛɛ kɛ lɛ ma pue ngɛ anuminyami mi.

Wami momo kɛ ehe ɔ

⁵ Lɔ ɔ he ɔ nyɛɛ gbe nyɛ he nihi nɛ ngɛ zugba a nɔ ɔ: ajuama bɔmi, mu ni tsumi, mi mi la, akɔnɔ yaya, kɛ hɛ tsumi nɛ ji wɔ jami ɔ,

⁶ nihi a he nɛ Mawu muklii mi fumi baa tuegbenɔ bi ɔmɛ a nɔ ɔ,

⁷ nihi a mi nɛ nyɛ hu nyɛ nyɛɛ sa, benɛ nyɛ ngɛ nihi nɛ peɔ ja amɛ a kpɛti ɔ.

⁸ Se jehanɛ ɔ nyɛ hu nyɛ sake kikɛmɛ a ni nɛ ɔmɛ kulaa ngɔ pue he, nihi nɛ ji muklii mi fumi, mi mi la, hetsɛ, musu bɔmi munyu, zo munyu ɔmɛ kɛ je nyɛ nya mi.

⁹ Nyɛ ko ye nyɛ sibi lakpa, ejakaa nyɛ je nɔmlɔ momo ɔ kɛ e ni tsumi ɔmɛ ngɔ pue he;

¹⁰ nyɛɛ wo nɔmlɔ he nɛ plɛɔ ehe ekohu kɛ yaa ni lemi mi ngɛ nɔ nɛ bɔ lɛ ɔ subai ɔ nya;

¹¹ he nɛ Hela no kɛ Yuda no, nɔ nɛ a po lɛ kɛ mɔmlɔtɔtsɛ, jekɔno kɛ Skite no, nyɔguɛ kɛ odehe ko be hu, se mohu Kristo ji nihi kulaa ngɛ nihi kulaa mi ɔ.

¹² Lɔ ɔ he ɔ, akɛnɛ bimɛ nɛ Mawu hia, ni klɔuklɔuhi kɛ suɔli ji nyɛ he je ɔ, nyɛɛ wo mi mi jɔmi, mɔbɔ nami, he si bami, kpoo peemi, tsui si tomi kaa tade,

¹³ nɛ ke nɔ ko kɛ nɔ ko na sane ko ɔ, nyɛɛ na ha nyɛ sibi nɛ nyɛ kɛ pa nyɛ he, kaa bɔ nɛ Kristo hu kɛ pa nyɛ ɔ, ja nyɛ hu nyɛɛ pee.

¹⁴ Se enɛ ɔmɛ tsuo se ɔ, nyɛɛ wo suɔmi nɛ ji kpa nɛ fiɔ nihi kulaa peɔ kake ɔ kaa tade.

¹⁵ Nɛ nyɛ ha Mawu he jɔmi ɔ nɛ ye tsɛ ngɛ nyɛ tsui mi, nɔ́ nɛ he nɛ a tsɛ nyɛ kɛ ba ngɛ nɔmlɔ tso kake mi ɔ, nɛ nyɛɛ le si nami.

¹⁶ Nyɛ ha Kristo munyu ɔ nɛ hi nyɛ mi babauu ngɛ ni lemi tsuaa ni lemi mi; nɛ nyɛɛ tsɔɔ nyɛ he ni nɛ nyɛɛ tu munyu ngɔ tsɔɔ nyɛ he ngɛ saku fiamihi kɛ yi jemi lahi kɛ mumi mi lahi a mi, nɛ nyɛɛ kɛ sina nɛ la ngɛ nyɛ tsui mi ha Mawu.

¹⁷ Nɛ nɔ́ tsuaa nɔ́ nɛ nyɛ ngɛ pee ngɛ munyu tumi loo ni tsumi blɔfami ɔ, nyɛɛ pee kulaa ngɛ Yesu Kristo biɛ mi, nɛ nyɛɛ gu e nɔ kɛ na Mawu kɛ Tsɛ ɔ si.

Wami he ɔ mi sihimi

¹⁸ Yigbayi, nyɛɛ ba nyɛ he si ngɔ ha nyɛ hunomɛ, kaa bɔ nɛ sa ngɛ Nyɔmtsɛ ɔ mi.

¹⁹ Hunomɛ, nyɛɛ suɔ nyɛ yihi, nɛ nyɛ yi mi ko wa ngɛ a nɔ.

²⁰ Bimɛ, nyɛɛ bu nyɛ fɔli a tue ngɛ nɔ tsuaa nɔ blɔfami, ejakaa kɔlɔ ɔ lɛ sa Nyɔmtsɛ ɔ hɛ mi saminya.

²¹ Tsɛmɛ, nyɛ ko wo nyɛ bihi a muklii mi la, konɛ a nine mi nɛ ko wo nyu.

²² Sɔmɔli, nyɛɛ bu nyɛ he lo blɔfami nyɔmtsɛmɛ ɔmɛ a tue ngɛ nihi kulaa mi, pi kɛ hɛ mi sɔmɔmi, kaa nihi nɛ hlaa nimli a hɛ mi nyami, se mohu ngɛ tsui kpakpa mi kaa nihi nɛ yee Mawu gbeye.

²³ Nɛ nɔ́ tsuaa nɔ́ nɛ nyɛ ngɛ pee ɔ, nyɛɛ je nyɛ tsui mi kɛ pee, kaa Nyɔmtsɛ ɔ nyɛ ngɛ pee kɛ ngɛ hae se pi nimli,

²⁴ nɛ nyɛɛ le kaa Nyɔmtsɛ ɔ dɛ mi nyɛ nine maa su gbo si ni ɔmɛ a nɔ ngɛ kaa nyɛ hiɔwo, ejakaa Nyɔmtsɛ Kristo nyɛ ngɛ sɔmɔe.

²⁵ Nɔ nɛ peɔ nihi nɛ dɛ́ blɔ ɔ ma na nihi nɛ dɛ́ blɔ ɔ he hiɔwo, nɛ hɛ mi hyemi ko be mi.