Kolosebi 2 - Somi He Ɔ

¹ I suɔ kaa ma ha nyɛɛ le nyɛ he dengme babauu nɛ i ngɛ gboe ngɛ nyɛɛ kɛ ninɛmɛ nɛ ngɛ Laodikea kɛ nihi abɔ nɛ nɛ́ ye hɛ mi ngɛ he lo mi ɔmɛ a he,

² konɛ a na tsui, nɛ a pee kake ngɛ suɔmi mi kɛ pɛtɛ sisi numi nɛ mi kuɔ nɛ a ngɛ he wami ngɛ nɔ ɔ kulaa mi, nɛ a le Mawu kɛ Kristo laami sane ɔ,

³ nɔ́ mi nɛ a ngɔ ga kɛ ni lemi juetli ɔ kulaa ngɔ laa ngɛ ɔ.

⁴ I ngɛ enɛ ɔ dee konɛ nɔ ko kɛ nya mi ngɔngɔɛ munyu ko ko sisi nyɛ.

⁵ Ejakaa ke i kɛ nyɛ be ngɛ he lo blɔfami hu, mumi blɔfami ɔ, i kɛ nyɛ ngɛ, nɛ ye bua jɔɔ, nɛ i naa nyɛ blɔ nya tomi kɛ si fimi nɛ nyɛɛ kɛ daa si ngɛ Kristo nɔ hemi kɛ yemi mi ɔ.

Kristo mi wami hiɛmi

⁶ Akɛnɛ nyɛ he Kristo Yesu, Nyɔmtsɛ ɔ, atuu nɛ ɔ, nyɛɛ nyɛɛ ngɛ e mi, nɛ nyɛ sipoku nɛ pi si,

⁷ nɛ a ma nyɛ ngɛ e nɔ, nɛ nyɛɛ du si ngɛ hemi kɛ yemi ɔ mi, kaa bɔ nɔuu nɛ a tsɔɔ nyɛ ɔ, nɛ nyɛ tsui nɛ hyi tɔ kɛ sina.

⁸ Nyɛɛ hyɛ nɛ hi, konɛ nɔ ko kɛ je mi ni lemi kɛ yaka sisimi ko ngɔ nyɛ nyɔgue, ngɛ nimli a blema sanehi kɛ je nɛ ɔ mi mumihi nɛ ji Kristo mi ɔ nya.

⁹ Ejakaa e mi Mawu fuu hyimi ɔ kulaa hii ngɛ nɔmlɔ tso su mi;

¹⁰ nɛ nyɛ hyi tɔtɔɔtɔ ngɛ e mi, lɛ nɔ nɛ ji nɔkɔtɔma yemi kɛ he blɔ tsuo yi ɔ,

¹¹ nɔ mi nɛ a po nyɛ hu ngɛ, kɛ nɔ pomi nɛ pi he lo mi pomi, se mohu Kristo pomi nɛ jeɔ wɔ kɛ jee he lo nɔmlɔ tso yayami mi ɔ;

¹² ejakaa a pu nyɛ ngɔ piɛ e he ngɛ baptisimi ɔ mi, nɔ mi hu nɛ a tle nyɛ si ngɛ, ngɛ Mawu nɛ tle lɛ si kɛ je gbeje ɔ he wami ni tsumi ɔ nɔ hemi kɛ yemi nya a.

¹³ Nɛ nyɛ nɛ nyɛ ji ni gbogboehi ngɛ nyɛ nɔ tɔmi ɔmɛ kɛ nyɛ he lo mɔmlɔtɔ ɔ mi ɔ, e ha nyɛɛ kɛ lɛ tsuo wami, nɛ e kɛ nyɛ nɔ tɔmi ɔmɛ kulaa pa nyɛ;

¹⁴ nɛ e gba wa he womi nɛ a ngma, nɛ ngɛ Mlaa amɛ a mi nɛ da si si wɔ ɔ, nɛ kɔlɔ ɔ nɔuu e je ngɛ kpɛti kɛ ho, nɛ e ka ngɔ mɛtɛ sɛumi tso ɔ he.

¹⁵ E kplɔ nɔkɔtɔma yemihi kɛ he blɔ ɔmɛ a he nihi, nɛ e bɔ mɛ ahlua pãa, nɛ e sã mɛ kɛ nyɛɛ e se ngɛ e kunimi yemi ɔ mi.

¹⁶ Lɔ ɔ he ɔ nyɛ ko ha nɛ nɔ ko nɛ kojo nyɛ ngɛ ni yeni, loo ni numi, loo nyami ligbi, loo hluami he, loo Hejɔɔmi Ligbihi a blɔfami,

¹⁷ ejakaa nihi nɛ maa ba amɛ a he nini kɛkɛ ʼi, se nɔmlɔ tso ɔ ji Kristo nɔ ɔ nɛ.

¹⁸ Nyɛ ko ha nɛ nɔ ko nɛ buu e he kaa e pe nihi kulaa ngɛ ni nami ko he ɔ nɛ bu nyɛ fɔ nɛ e fi nɔ ngɛ lɛ nitsɛ e hlami nya kaa a kɛ he si bami juɛmi nɛ ja hiɔwe bɔfohi; e he lo juɛmi ɔ hãa e woɔ e he nɔ yakatsuaa;

¹⁹ kikɛmɛ a nɔmlɔ ɔ, e hɛɛ we Kristo nɛ ji yi ɔ mi, nɔ mi nɛ nɔmlɔ tso ɔ kulaa naa nihi nɛ hiaa lɛ, kɛ guu kpɔjihi kɛ panihi a nɔ kɛ waa bɔ nɛ Mawu to ɔ.

Gbomi kɛ wami ngɛ Kristo mi

²⁰ Lɔ ɔ he ɔ ke nyɛɛ kɛ Kristo gbo kɛ ha je nɛ ɔ mi sisije ni ɔmɛ ɔ, mɛni he je mɔ nɛ nyɛ ngɛ kaa nihi nɛ a hɛ ngɛ ngɛ je ɔ mi, nɛ nyɛ haa a woɔ nyɛ mlaa kɛ mwɔɔ ke:

²¹ “Koo pɛtɛ he, nɛ koo sa o nya, nɛ koo ta he tete” ɔ?

²² Jamɛ a ni ɔmɛ kulaa a, a he ni tsumi mi nɔuu a hɛ mi kpataa ngɛ, ni nɛ ɔmɛ ji nimli a kitahi kɛ tsɔɔmihi,

²³ nɛ a ji nihi nɛ hɛɛ ni lemi munyu ngɛ mɛ nitsɛmɛ a suɔmi nya jami kɛ he si bami juɛmi kɛ nɔmlɔ tso yi mi wami mi mohu, se a pi nihi nɛ he ngɛ se nami nɛ kuɔ he lo ɔ he numi nihi a nya.