Hebribi 9 - Somi He Ɔ

Hiɔwe kɛ Zugba nɔ nɔ jami

¹ Jehanɛ kekle somi ɔ hu ngɛ Mawu jami blɔ nya nihi kɛ He klɔuklɔu nɛ ji je nɛ ɔ mi nɔ́ ɔ.

² A ma bo tsu ko ngɔ ma si, nɛ e kpo nɔ je ɔ, kane tso kɛ okplɔɔ kɛ hɛ mi mami abolohi ngɛ lejɛ ɔ; a tsɛɛ lejɛ ɔ ke He klɔuklɔu.

³ Nɛ tsu mi pomi bo nɛ ji enyɔ ɔ se bo tsu ɔ a tsɛɛ lɛ He klɔuklɔu pe kulaa.

⁴ Lejɛ ɔ tsopa kɛ e he via sami nɔ́ kɛ somi daka nɛ a kɛ sika ha he kulaa a ngɛ, lɔ ɔ mi sika kplu kɛ mana a kɛ Aaron tso nɛ su ba a kɛ somi tɛ tɛtlɛɛ ɔmɛ a nɔ ɔ ngɛ;

⁵ nɛ lɔ ɔ nɔ nyami kerubim nɛ ha kpatami sɛ ɔ nɔ ɔ ngɛ, nihi nɛ amlɔ nɛ ɔ wa be nyɛe a he munyu tumi kakaaka a.

⁶ Bɔ nɛ a dlaa kikɛmɛ a ni nɛ ɔmɛ haa ji nɛ ɔ nɛ: osɔfo ɔmɛ yaa kekle bo tsu ɔ mi daa ligbi ya tsuɔ Mawu jami he ni;

⁷ se bo tsu nɛ ji enyɔ ɔ, osɔfo nɔkɔtɔma a kɛkɛ lɛ yaa mi si kake daa jeha, nɛ e si we muɔ nɛ e ya, nɔ́ nɛ e kɛ ya haa ngɛ lɛ nitsɛ kɛ ma a tɔmihi nɛ a li ɔmɛ a he ɔ.

⁸ Enɛ ɔ Mumi Klɔuklɔu ɔ kɛ tsɔɔ pãa kaa be abɔ nɛ kekle bo tsu ɔ maa si kɛ mwɔ nɛ ɔ ɔ, lɛɛ blɔ nɛ a kɛ yaa he klɔuklɔu ɔ a na we nɛ a bli.

⁹ Enɛ ɔ ji mwɔnɛ mwɔnɛ be nɛ ɔ he abɛ nɛ a bu. Lɔ ɔ tsɔɔ kaa a kɛ nike nihi kɛ bɔ sami nihi be nyɛe ma ha nɔ́ nɛ dɛ́ ɔ nɛ hi kɛ pi si ngɛ he nile blɔfami

¹⁰ nihi nɛ kɔɔ niye ni kɛ numi nihi kɛ he dumi slɔɔtohi nɛ ji he lo blɔ nya nihi a he nɛ a to ke a pee kɛ ya su ehe peemi be ɔ.

¹¹ Se Kristo nɛ ba ba ye ni kpakpahi nɛ maa ba amɛ a he osɔfo nɔkɔtɔma a, gu bo tsu nɛ kle nɛ hi kɛ pi si nɛ pi nine nɛ a kɛ pee, lɔ ɔ ji kaa pi je nɛ ɔ mi bɔ nihi a mi nɛ e je ɔ mi,

¹² nɛ pohu, pi tokuhi loo na bimɛ a muɔ, se mohu lɛ nitsɛ e muɔ ɔ e kɛ sɛ he klɔuklɔu ɔ mi si kake nyɔngloo, nɛ e kɛ na neneene kpɔmi ɔ.

¹³ Ejakaa ke nahi kɛ tokui a muɔ kɛ na bimɛ a lazu nɛ a kɛ fiãa nihi nɛ bleɔ a he ɔ nɔ ɔ fɔɔ a he nɛ a he tsɔɔ ngɛ he lo blɔfami ɔ,

¹⁴ si nyɛmɛ nɔuu nɛ Kristo, nɛ gu neneene mumi ɔ nɔ ngɔ e he nɛ piami ko be he ngɔ ha Mawu ɔ muɔ be wa he ni lemi he fɔe kɛ je ni tsumi gbogboehi a mi, konɛ wa sɔmɔ Mawu hɛ kalɔ ɔ?

¹⁵ Enɛ ɔ nɔuu he je nɛ e ji somi he ɔ mi dalɔ ɔ nɛ, benɛ pee nɛ e gu gbenɔ nɔ kɛ kpata kekle somi ɔ nɔ tɔmi ɔmɛ, konɛ nihi nɛ a tsɛ ɔmɛ a nine nɛ su neneene gbo si ni ɔmɛ a he si womi ɔ nɔ.

¹⁶ Ejakaa he nɛ si womi nɛ haa a yeɔ gbo si ni ngɛ ɔ, e hia kaa nɔ nɛ wo si ɔ e gbo lolo,

¹⁷ ejakaa si womi nɛ haa a yeɔ gbo si ni ɔ, ja si wolɔ ɔ gbo loko e naa he wami, se ke e hɛ ngɛ kɛ mwɔ ɔ, e be he wami.

¹⁸ Enɛ ɔ he nɛ kekle nɔ́ ɔ hu a si we muɔ se kɛ wui ɔ nɛ.

¹⁹ Ejakaa benɛ Mose fiɛ kita amɛ tsuo ngɔ tsɔɔ ma mluku ɔ kulaa ngɛ mlaa a nya a, e ngɔ na bimɛ kɛ tokuhi a muɔ kɛ nyu kɛ jijɔ he bwɔmi tsutsu kɛ hisopo, nɛ e kɛ fia womi ɔ nitsɛ kɛ ma mluku ɔ kulaa nɔ,

²⁰ e ke: “Oʼɛ, somi ɔ nɛ Mawu kã nyɛ he kita a muɔ ɔ ji nɛ ɔ nɛ.”

²¹ Nɛ bo tsu ɔ hu kɛ Mawu jami he ni ɔmɛ kulaa, e kɛ muɔ ɔ fia nɔ ja nɔuu.

²² Nɛ anɔkuale mi ɔ, e piɛ bɔɔ nɛ a kɛ muɔ tsukɔɔ nihi kulaa he ngɛ mlaa a nya; nɛ ke a pue we muɔ si ɔ, a kɛ pɛ́.

Kristo bɔsami ɔ jeɔ yayami

²³ Lɛɛ e hia kaa nihi nɛ ji hiɔwe ni ɔmɛ a henɔ nɛ ɔmɛ ɔ, a ngɔ enɛ ɔmɛ kɛ tsukɔ he; se hiɔwe ni ɔmɛ nitsɛmɛ ɔ, bɔhi nɛ hi pe kɔlɔ ɔmɛ a kɛ tsukɔɔ he.

²⁴ Ejakaa pi he klɔuklɔu nɛ a kɛ ninehi pee nɛ ji nɔ́ ɔ nitsɛ henɔ kɛkɛ mi nɛ Kristo ya sɛ ɔ, se mohu hiɔwe nitsɛ e ya sɛ, konɛ jehanɛ ya je e he kpo ngɛ Mawu hɛ mi ha wɔ.

²⁵ Pohu e ya sɛ we lejɛ ɔ konɛ e ngɔ e he ngɔ ha daa daa, kaa bɔ nɛ osɔfo nɔkɔtɔma a ya sɛɛ he klɔuklɔu ɔ daa jeha kɛ muɔ nɛ pi lɛ nitsɛ e nɔ ɔ;

²⁶ ejakaa ke ja a, jinɛ sa kaa e na amanehlu kpiti kpiti kɛ je je mi siiije lokoo; se jehanɛ ɔ, si kake kɛkɛ a je lɛ kpo ngɛ je mi be ɔmɛ a nyagbe mi, konɛ e ngɔ lɛ nitsɛ e he nɛ e kɛ sa bɔ ɔ kɛ je yayami ɔ.

²⁷ Nɛ be abɔ nɛ e fɔɔ si ha nimli kaa si kake a gboɔ nɛ lɔ ɔ se ɔ a maa kojo mɛ ɔ,

²⁸ ja nɔuu Kristo hu, a ngɔ lɛ ngɔ ha si kake, konɛ e tloo nihi fuu a he yayami kɛ ho. E ma je e he kpo nɔ́ nɛ ji si enyɔ, pi ngɛ yayami he, se mohu konɛ e ba he ninɛmɛ nɛ ngɛ lɛ blɔ hyɛe ɔ a yi wami.