Hebribi 8 - Somi He Ɔ

Yesu wa sɔfo nɔkɔtɔma

¹ Se nihi nɛ wa ngɛ dee ɔ kulaa yi ji nɛ ɔ nɛ: Wa ngɛ kikɛmɛ a osɔfo nɔkɔtɔma, nɔ nɛ hii si ngɛ he walɔ ngua a matsɛ sɛ ɔ hiɛ ɔ nɔ ngɛ hiɔwe,

² kaa he klɔuklɔu ɔ kɛ anɔkuale bo tsu nɛ Nyɔmtsɛ ɔ nitsɛ lɛ ma nɛ pi nɔmlɔ ko nɛ ma a mi sɔmɔlɔ.

³ Ejakaa osɔfo nɔkɔtɔma tsuaa osɔfo nɔkɔtɔma a, a wo lɛ konɛ e ngɔ nike nihi kɛ bɔ sami nihi kɛ ba ha, lɔ ɔ he je ɔ e hia kaa nɔ nɛ ɔ hu e na nɔ́ ko nɛ e kɛ ba ha.

⁴ Se kaa zugba a nɔ e ngɛ jinɛ, e be osɔfo tete pee, ejakaa osɔfohi nɛ kɛ nike nihi ya haa ngɛ Mlaa nya a ngɛ;

⁵ nihi nɛ hiɔwe ni ɔmɛ a henɔ kɛ a nini kɛkɛ a sɔmɔɔ, kaa bɔ nɛ a tu munyu tsɔɔ Mose, benɛ e maa ma bo tsu ɔ ke: “Hyɛ nɛ hi, konɛ o pee ni ɔmɛ kulaa ngɛ henɔ nɛ a tsɔɔ mo ngɛ yoku ɔ nɔ ɔ nya.”

⁶ Se jehanɛ ɔ, Yesu na osɔfo yemi nɛ hi pe kekle nɔ ɔ, ejakaa somi nɛ hi pe kekle nɔ ɔ nɛ a da si womihi nɛ hi pe kekle ni ɔmɛ a nɔ kɛ kã kita a mi dalɔ ji lɛ.

⁷ Ejakaa kaa kekle somi ɔ hi kɛ pi si jinɛ a be blɔ hlae ngɔ ha nɔ́ nɛ ji enyɔ ɔ.

⁸ Ejakaa Mawu piaa mɛ: E ke: “Oʼɛ, ligbihi ma, Nɛ i kɛ Israel we ɔ kɛ Yuda we ɔ Maa so somi he ko,

⁹ Pi kaa somi nɛ i kɛ a tsɛmɛ ɔmɛ so Benɛ i pɛtɛ a nine mi nɛ i kɛ mɛ je Mizraim zugba a nɔ ɔ; Ejakaa a yi ye somi ɔ nɔ Nɛ imi hu i bui a he akɔtaa, Nyɔmtsɛ ɔ lɛ de.

¹⁰ Ejakaa enɛ ɔ ji somi nɛ i kɛ Israel we ɔ maa so Ngɛ jamɛ a ligbi ɔmɛ a se ɔ nɛ, Nyɔmtsɛ ɔ de ke: I kɛ ye mlaahi maa wo a juɛmi mi, Nɛ ma ngma ngɔ wo a tsui mi, Nɛ ma pee a Mawu Nɛ mɛ hu a maa pee ye ma.

¹¹ Nɛ a ti nɔ ko be e huɛ loo e nyɛmi tsɔɔe ke: ‘Le Nyɔmtsɛ ɔ.’ Ejakaa mɛ kulaa a maa le mi, Kɛ maa je a kpɛti nɔ nyafii nɔ Kɛ yaa su nɔ ngua nɔ.

¹² Ejakaa ma na mɛ mɔbɔ ngɛ a nɔ tɔmi ɔmɛ a he, Nɛ a he yayami ɔmɛ hu i be kaie ligbi ko ligbi ko.”

¹³ Somi he nɛ ɔ he munyu ɔ, ha kekle nɔ ɔ pee momo. Se nɔ́ tsuaa nɔ́ nɛ pee momo kɛ nɔ́ nɛ bwɔ ɔ, e be kɛe nɛ e maa laa.