Hebribi 7 - Somi He Ɔ

Osɔfo Melkizedek

¹ Se Melkizedek nɛ ɔ ɔ, lɛ ji Salem matsɛ, Mawu ope ɔ, osɔfo nɛ kɛ Abraham ya kpe benɛ e kpale e se kɛ je matsɛmɛ ɔmɛ a gbemi mi ngɛ ta mi nɛ e gbaa lɛ,

² nɛ Abraham ha lɛ ni ɔmɛ kulaa mi dlami nyɔngma mi kake ɔ nɛ. Melkizedek biɛ ɔ, e kekle sisi tsɔɔmi ji “Dami Matsɛ” nɛ jehanɛ hu e ji “Salem Matsɛ,” nɛ kɔlɔ ɔ sisi hu ji “Hejɔmi Matsɛ.”

³ E be tsɛ, e be nyɛ, e be weku kpa, nɛ e be ligbihi a sisije loo wami nyagbe tete, e ngɛ kaa Mawu Bi ɔ; e hii si kaa osɔfo kɛ yaa neneene.

⁴ Jehanɛ nyɛ susu he, bɔ nɛ nɔ nɛ ɔ agbo jemi ngɛ ha: Blemano Abraham ɔ tete ngɔ ta yi bu ni kpakpa amɛ a mi dlami nyɔngma mi kake ngɔ ha lɛ!

⁵ Wa le kaa Levibi ɔmɛ a kpɛti nihi nɛ tsuɔ osɔfo ni tsumi ɔ hu ngɛ kita ko ngɛ Mlaa a nya, kaa a he mi dlami nyɔngma mi kake ngɛ ma a dɛ, lɔ ɔ ji ngɛ a nyɛmimɛ ɔmɛ a dɛ, pohu mɛ hu a je Abraham mi.

⁶ Se Melkizedek nɛ be weku sisi tsɔɔmi ko ngɛ Levibi ɔmɛ a kpɛti nɛ ɔ ɔ, e he midlami mi nyɔngma a mi kake ngɛ Abraham po dɛ, nɛ e gbaa nɔ nɛ ngɛ si womi ɔmɛ tete.

⁷ Nguane jemi ko be he kulaa kaa nɔ nɛ kle pe e nyɛmi ɔ lɛ e gbaa nɔ nɛ klee we ɔ.

⁸ Jehanɛ ɔ hiɛ ɔ, nimli nɛ gboɔ ɔmɛ ji nihi nɛ heɔ mi dlami nyɔngma mi kake ɔ, se lejɛ ɔ, nɔ ko nɛ ngmami ɔ ye e he odase kaa e hɛ ngɛ ngmengmle ɔ lɛ he.

⁹ Nɛ, ke ma de jã a, kɛ gu Abraham nɔ ɔ, a he mi dlami nyɔngma mi kake ɔ ngɛ Levi nɛ heɔ lɔ ɔ hu dɛ;

¹⁰ ejakaa e ngɛ e tsɛ Abraham ɔ mi mi momo bene Melkizedek kɛ lɛ ba kpe ɔ.

¹¹ Jehanɛ ke himi kɛ si pimi gu Levi osɔfo yemi ɔ nɔ kɛ ba a (ejakaa e yi nɔ a wo ma a mlaa ngɛ), lɛɛ mɛni he je e hia kɛ̃ kaa osɔfo kpa ko nɛ te si nɛ ngɛ kaa Melkizedek, nɛ pi kaa Aaron ɔ mɔ?

¹² Ejakaa ke a tsake osɔfo yemi ɔ, lɛɛ e hia kaa a tsake Mlaa a hulɔ.

¹³ Ejakaa nɔ nɛ he nɛ a de ni nɛ ɔmɛ ngɛ ɔ, je wɛtso kpa ko mi, nɔ mi nɛ nɔ ko ji kɛ ba tsu we bɔ sami latɛ ɔ he ni hyɛ.

¹⁴ Nɔ tsuaa nɔ le kaa Yuda mi nɛ wa Nyɔmtsɛ ɔ je, jamɛ a wetso ɔ Mose de we he nɔ́ ko ngɛ osɔfo yemi he.

Osɔfo kpã ko kaa Melkizedek

¹⁵ Nɔ́ nɛ haa sane ɔ jee kpo paa a ji kaa osɔfo kpã ko te si nɛ ngɛ kaa Melkizedek,

¹⁶ nɔ nɛ pi he lo kita mlaa nya nɛ a wo lɛ osɔfo ngɛ, se mohu wami nɛ puɛ we ɔ he wami nya.

¹⁷ Ejakaa ngmami ɔ yeɔ odase ke: Osɔfo ji mo kɛ yaa neneene kaa Melkizedek.

¹⁸ Ejakaa kita nɛ sɛ hlami ɔ, akɛnɛ e be he wami nɛ e he be se nami ko he ɔ a gu,

¹⁹ ejakaa Mlaa ha we nɔ́ ko nɔ́ ko nɛ hi kɛ pi si, se jehanɛ a kɛ hɛ kɛ nɔ fɔmi nɛ hi pe lɔ ɔ nɛ waa kɛ suu Mawu he ɔ ba je mi.

²⁰ Enɛ ɔ peemi mi ɔ a si we Mawu kita a se. Ni kpa amɛ ɔ, a wo mɛ osɔfohi mohu se a ka we kita ko.

²¹ Se Yesu lɛɛ, kita kami a kɛ wo lɛ, benɛ Mawu de lɛ ke: “Nyɔmtsɛ ɔ ka kita Nɛ e be e he piae: Osɔfo ji mo kɛ yaa neneene” ɔ.

²² Jehanɛ somi nɛ Yesu daa si ngɛ mi ɔ hi pe kulaa.

²³ Slɔɔto kpa ko hu ji, mɛɛ lɛɛ, akɛnɛ gbenɔ ha we nɛ a se nɛ kɛ he je ɔ, mɛ fuu a ye osɔfo;

²⁴ se Yesu lɛɛ, akɛnɛ e hii si kɛ yaa neneene he je ɔ, e sɔfo yemi ɔ se pui.

²⁵ Lɔ ɔ he hu ɔ e nyɛɔ nihi nɛ guu e nɔ kɛ baa Mawu ngɔ ɔmɛ a yi wami heɔ, ejakaa e ngɛ daa konɛ e da mi ha mɛ.

²⁶ Yesu ji Osɔfo nɔkɔtɔma nɛ sa wɔ pɛ: nɔ nɛ he tsɔ, nɛ yayami ko be e he, nɛ e he be piami ko, nɛ e tsɔ e he kɛ je yayami peeli a he, nɛ a wo e nɔ kɛ be hiɔwe, he;

²⁷ nɔ nɛ e hia we lɛ, kaa osɔfo nikɔtɔma kpa amɛ, kaa daa ligbi ɔ e sã lɛ nitsɛ e he yayami ɔmɛ a he bɔ kekle loko e sã ma a hu nɔ; ejakaa e pee enɛ ɔ si kake nyɔngloo, benɛ e ngɔ lɛ nitsɛ e he ngɔ sã bɔ ɔ.

²⁸ Ejakaa Mose Mlaa a, nimli gbɔjɔli e ngɔ woɔ osɔfo nikɔtɔmahi ɔ nɛ, se Mawu kita nɛ ba ngɛ Mlaa a se ɔ he munyu ɔ wo Bi nɛ hi kɛ pi si kɛ yaa neneene ɔ osɔfo nɔkɔtɔma.