Hebribi 6 - Somi He Ɔ

¹ Lɔ ɔ he ɔ nyɛ ha wa si Kristo he sisije ni tsɔɔmi ɔmɛ, nɛ waa po mi kɛ ya tsɔɔmihi nɛ sa kɛ ha nikɔtɔmahi a he; nɛ wa ko kpale to nitsumihi nɛ gbo a he tsui tsakemi kɛ Mawu nɔ hemi kɛ yemi,

² kɛ baptisimihi a he ni tsɔɔmi kɛ ninehi kɛ nɔ nɔ puemi, kɛ gbogboehi a si temi kɛ neneene kojomi he sane ɔmɛ a sisi ekohu.

³ Enɛ ɔ wa maa pee ke Mawu ngmɛ blɔ.

⁴ Ejakaa nihi nɛ la tso ngɛ a nɔ hyɛ nɛ a sa a nya hiɔwe nɔ́ke nɔ́ ɔ nɛ a na Mumi Klɔuklɔu ɔ eko

⁵ nɛ a sa a nya Mawu munyu kpakpa a kɛ je nɛ maa ba a mi hewami ɔmɛ,

⁶ nɛ lɔ ɔ se nɛ a gbee si ɔ, a be nyɛe ma tsake mɛ ngɔ pee ni hehi ekohu ha tsui tsakemi, akɛnɛ a ngɛ Mawu bi ɔ sɛue ekohu kɛ ngɛ a he hae nɛ a ngɛ lɛ ahlua bɔe he ɔ.

⁷ Zugba nɛ mii nyu nɛ nɛɛ pueɔ e nɔ kpitikpiti nɛ baa ni nɛ hi ha ninɛmɛ nɛ huɔ nɔ ɔ naa Mawu gbaami ɔ eko;

⁸ se ke mio kɛ hu e puɛɛ ɔ, a kuaa lɛ, nɛ Mawu gbiɛmi baa e nɔ, nɛ e nyagbe ji a kɛ la maa sa.

⁹ Se mamimɛ, wa ngɛ kikɛ dee mohu, se kɛ̃ ɔ wa hɛ ngɛ nyɛ nɔ kaa nyɛ sane hi pe ja, nɛ yi wami hemi maa nyɛɛ nyɛ se.

¹⁰ Ejakaa Mawu pi nɔ nɛ yeɔ sane nɛ dɛ́ nɛ e hɛ maa je nyɛ ni tsumi ɔ nɔ kɛ suɔmi he dengme nɛ nyɛ gbo ngɛ e biɛ ɔ he, nɛ nyɛɛ kɛ sɔmɔ ni klɔuklɔu ɔmɛ, nɛ nyɛ pa kɛ ngɛ mɛ sɔmɔe kɛ mwɔ ɔ.

¹¹ Wa ngɛ hlae kaa nyɛ ti nɔ tsuaa nɔ nɛ tsɔɔ kikɛmɛ a mɔde bɔmi nɛ ɔ nɔuu, konɛ a ma hɛ kɛ nɔ fɔmi ɔ nɔ mi kɛ ya su nyagbe,

¹² konɛ nyɛ ko pee hejɔ se mohu nyɛɛ kase ninɛmɛ nɛ guu hemi kɛ yemi kɛ tsui si tomi nɔ naa si womi ɔ.

Mawu siwomi nɛ tsakee we

¹³ Benɛ Mawu wo Abraham si ɔ, akɛnɛ e be nɔ ko nɛ pe lɛ nitsɛ nɛ e ma kã lɛ kita he je ɔ, e ka lɛ nitsɛ e he kita,

¹⁴ nɛ e ke: Niinɛ, ma gbaa mo, nɛ ma ha o nina maa hiɛ.

¹⁵ Nɛ akɛnɛ Abraham to e tsui si he je ɔ, e nine su si womi ɔ nɔ.

¹⁶ Ejakaa nimli ngɛ nɛ ɔ, nɔ nɛ pe mɛ ɔ kita a kaa, nɛ a nya sami nyagbe tsuo ji kita kami nɛ a kɛ maa sane tsuaa sane nɔ mi.

¹⁷ Lɔ ɔ he hulɔ nɛ benɛ Mawu hia kaa e tsɔɔ si womi ɔ yeli ɔmɛ kaa e yi mi tomi ɔ tsakee we kulaa a, e kɛ kita ma nɔ mi,

¹⁸ konɛ waa gu sanehi enyɔ nɛ tsakee we nɛ Mawu be nyɛe maa ngɔ nya ngɛ mi ɔ nɔ kɛ na bua womi nɛ wa, konɛ wɔ nihi nɛ wa ya sawe ɔ, wa kɛ hɛɛ hɛ kɛ nɔ fɔmi nɛ ngɛ wa hɛ mi ɔ mi;

¹⁹ wa hɛɛ hɛ kɛ nɔ fɔmi nɔ kaa wa klaa sɛkɛ nɛ tsɔ we nɛ pi si kpɛii kɛ sɛ mi kɛ ho tsu mi pomi bo ɔ se ya tɔɔ,

²⁰ he nɛ hɛ mi nyɛɛlɔ ɔ ji Yesu, nɔ nɛ plɛ neneene osɔfo nɔkɔtɔma kaa Melkizedek ɔ sɛ ha wɔ ɔ.