Hebribi 5 - Somi He Ɔ

¹ Ejakaa osɔfo nɔkɔtɔma tsuaa osɔfo nɔkɔtɔma nɛ a hia ngɛ nimli a kpɛti ɔ, a wo lɛ osɔfo konɛ e da nimli a nane mi ngɛ Mawu nihi a blɔfami, konɛ e kɛ nike nihi kɛ bɔhi ba ha ngɛ yayamihi a he,

² kaa nɔ ko nɛ nyɛɔ e nuɔ nɔ́ he haa nihi nɛ li ni kɛ nihi nɛ tla blɔ ɔ, akɛ nɛ lɛ nitsɛ hu ɔ gbedemi bɔle e he kɛ kpe ɔ.

³ Nɛ enɛ ɔ he ɔ, e hia kaa, kaa bɔ nɛ e peɔ haa ma a, e pee ja nɔuu ngɔ ha lɛ nitsɛ e he, nɛ e sa yayamihi a he bɔ.

⁴ Nɛ nɔ ko ngɔɛ hɛ mi nyami nɔ ha we lɛ nitsɛ e he, kaa ja Mawu tsɛ lɛ, kaa bɔ nɛ e tsɛ Aaron hu ɔ.

⁵ Ja nɔuu Kristo hu, pi lɛ nitsɛ nɛ e wo e hɛ mi nyami ngɛ osɔfo nɔkɔtɔma yemi mi, se mohu Mawu nɛ de lɛ ke: “Ye bi ji mo, mwɔnɛ i fɔ mo” ɔ, lɛ wo e hɛ mi nyami.

⁶ Kaa bɔ nɛ e de ngɛ he kpa hu ke: “Osɔfo ji mo kɛ yaa neneene Ngɛ Melkizedek blɔ ɔ nɔ.”

⁷ Ngɛ Yesu he lo be ɔmɛ a mi ɔ, e ngɔ sɔlemi kɛ pɛɛ kpami nɛ ngmlaa kpami nɛ nya wa kɛ vo nyu piɛ he sa bɔ ha nɔ nɛ ngɛ he wami nɛ e kɛ ma he lɛ kɛ je gbenɔ mi ɔ, nɛ a bu lɛ tue hulɔ, ejakaa e buu Mawu.

⁸ Nɛ pohu Mawu bi ji lɛ, se kɛ̃ ɔ e kase tue bumi ngɛ amanehluhi nɛ e na amɛ a mi,

⁹ nɛ benɛ a ha e hi kɛ pi si ɔ, e plɛ nɔ nɛ mi nɛ neneene yi wami hemi jee kɛ haa nihi tsuo nɛ buɔ lɛ tue ɔ,

¹⁰ ejakaa Mawu wo lɛ osɔfo kaa Melkizedek. Sigbeemi he kɔkɔbɔmi

¹¹ Wa ngɛ munyuhi fuu nɛ wa maa tu ngɛ enɛ ɔ he, se a sisi tsɔɔmi hu wa, ejakaa nyɛ tue mi ti;

¹² ejakaa nyɛ nɛ jinɛ e sa kaa nyɛ plɛ tsɔɔli mohu ngɛ be ɔ nya a, e hia kaa a tsɔɔ nyɛ Mawu munyu ɔ mi sisije ni ɔmɛ ekohu, nɛ nyɛ plɛ nihi nɛ nyɔ nyu hia mɛ, se pi niyeni nitsɛ.

¹³ Ejakaa nɔ tsuaa nɔ nɛ pupɔɔ nyɔ ɔ li nɔ́ nɛ da kɛ nɔ́ nɛ dɛ, ejakaa bimwɔyo ji lɛ.

¹⁴ Se ninɛmɛ nɛ wa a, a nɔ ji niyeni nitsɛ, nihi nɛ tsɔse a he numi ni ɔmɛ le slɔɔto nɛ ngɛ kpakpa kɛ yayami kpɛti.