Hebribi 4 - Somi He Ɔ

¹ Nɛ Mawu si e he jɔɔmi ɔ mi sɛmi he si womi ngɔ ha wɔ nɛ ɔ, nyɛ ha waa hyɛ nɛ hi konɛ alinɔ e ko ba mi kaa e fɔ wa ti nɔ ko.

² Ejakaa wɔ hu a fiɛ Sane kpakpa a ngɔ ha wɔ, kaa bɔ nɛ a fiɛ tsɔɔ mɛ ɔ nɔuu; se kɛ̃ ɔ munyu nɛ a nu ɔ he ya bɛ́ se nami ha mɛ, ejakaa ninɛmɛ nɛ nu ɔ kɛ hemi kɛ yemi pɛtɛ we he.

³ Ejakaa wɔ ninɛmɛ nɛ wa he ye ɔ wa ngɛ jamɛ a he jɔɔmi ɔ mi sɛe, kaa bɔ nɛ e de ɔ ke: “Lɔ ɔ ha i kɛ mi mi fumi ka kita ke: ‘Ke a sɛ ye he jɔɔmi ɔ mi fii!’ ” pohu a gbe Mawu ni tsumi ɔmɛ a nya kɛ je je mi sisije lokoo.

⁴ Ejakaa bɔ nɛ e de ngɛ he ko ngɛ ligbi nɛ ji ligbi kpaago ɔ he ji nɛ ɔ nɛ: “Nɛ Mawu jɔɔ e he ngɛ ligbi nɛ ji ligbi kpaago ɔ nɔ ngɛ e ni tsumi ɔmɛ kulaa mi;”

⁵ nɛ hiɛ ɔ nɛ ɔ e kpale de ke: “Ke a sɛ ye he jɔɔmi ɔ mi fii!”

⁶ Lɔ ɔ he ɔ akɛnɛ e fɔɔ si kaa ni komɛ maa sɛ mi, nɛ ninɛmɛ nɛ a fiɛ Sane kpakpa a ngɔ tsɔɔ kekle ɔ sɛ we mi ngɛ hemi nɛ a he we yi ɔ he je ɔ,

⁷ Mawu kpale to ligbi kpa ko ekohu, nɛ e de ngɛ David nya, ngɛ be babauu nɛ ɔ se ke, Mwɔnɛ, kaa bɔ nɛ la de sa a, “Mwɔnɛ ke nyɛ nu e gbi ɔ, Nyɛ ko wlua nyɛ tsui.’ ”

⁸ Ejakaa kaa Yosua na ha mɛ he jɔɔmi jinɛ, pee se ɔ Mawu ko tu we ligbi kpa ko he munyu hu.

⁹ Lɔ ɔ he ɔ he jɔɔmi ligbi yemi ko fɔɔ si kɛ ha Mawu ma a.

¹⁰ Ejakaa nɔ nɛ sɛ e he jɔɔmi ɔ mi ɔ, lɛ nitsɛ hu e jɔɔ e he ngɛ e ni tsumi ɔmɛ a mi, kaa bɔ nɛ Mawu jɔɔ e he ngɛ e nɔ ɔ mi ɔ.

¹¹ Lɔɔ he ɔ nyɛ ha waa bɔ mɔde, konɛ waa sɛ jamɛ a he jɔɔmi ɔ mi, nɛ nɔ ko ko nyɛɛ jamɛ a tue gbomi blɔ ɔ nɔ nɛ e laa.

¹² Ejakaa Mawu munyu hɛ ngɛ nɛ e ngɛ he wami nɛ e nya ba pe klaate nya enyɔtsɛ, nɛ e gbuu kɛ sɛɛ mi kɛ ya suu be nɛ e gbaa klaa kɛ mumi ɔ kɛ kpɔji nya amɛ kɛ wu mi zɔ ɔmɛ a mi, nɛ e ji tsui mi susumihi kɛ juɛmi ɔmɛ a kojolɔ.

¹³ A laa we bɔ nɔ́ ko ngɛ e hɛ mi, se nihi kulaa ngɛ paa nɛ a bli nɔ ngɛ lɛ nɔ nɛ waa kɛ ngɛ sane ɔ hɛngmɛ mi.

Yesu osɔfo nɔkɔtɔma ngua a

¹⁴ Jehanɛ, akɛnɛ wa ngɛ osɔfo nɔkɔtɔma ngua nɛ po mi kɛ gu hiɔwe nihi a mi, nɛ ji Yesu, Mawu bi ɔ nɛ ɔ ɔ, nyɛ ha waa pɛtɛ hemi kɛ yemi ɔ he wawɛɛ.

¹⁵ Ejakaa wa osɔfo nɔkɔtɔma nɛ wa ngɛ ɔ, e pi nɔ nɛ be nyɛe maa nu wa gbɔjɔmi ɔmɛ a he ha wɔ, se e ji nɔ ko nɛ a ka lɛ ngɛ nihi kulaa blɔfami kaa wɔ, nɛ kɛ̃ ɔ yayami ko yayami ko be e he.

¹⁶ Lɔ ɔ he ɔ nyɛ ha waa kɛ kã nɛ hɛ wɔ kɛ su dloomi sɛ ɔ he, konɛ wa nine nɛ su mɔbɔ nami nɔ nɛ wa na dloomi nɛ maa ye bua wɔ ngɛ be nɛ sa mi.