Hebribi 3 - Somi He Ɔ

Yesu kle pe Mose

¹ Enɛ ɔ he ɔ, mamimɛ, nyɛɛ tɛ̃tɛ̃ nyɛ hɛ mi, nyɛ ni klɔuklɔuhi nɛ na hiɔwe tsemi ɔ eko, nɛ nyɛɛ hyɛ Yesu wa hemi kɛ yemi jajemi ɔ he bɔfo kɛ osɔfo nɔkɔtɔma a;

² nɔ nɛ yeɔ nɔ nɛ hla lɛ ɔ anɔkuale, kaa bɔ nɛ Mose hu ye Mawu we ɔ kulaa nɔ anɔkuale ɔ.

³ Kaa bɔ nɛ nɔ nɛ bɔɔ we ko ɔ bu hiɛ pe we ɔ nɔ́ ɔ, ja nɔuu Yesu hu hɛ mi ngɛ nyami pe Mose.

⁴ We tsuaa we ɔ nɔ ko kɛ̃ lɛ bɔɔ, se nɔ nɛ bɔɔ nɔ́ tsuaa nɔ́ ji Mawu.

⁵ Mose ye anɔkuale ngɛ Mawu we mluku ɔ kulaa nɔ kaa sɔmɔlɔ, konɛ e ye nihi nɛ a ma de ɔmɛ a he odase;

⁶ se Kristo ɔ e ye anɔkuale kaa bi ngɛ Mawu we ɔ nɔ; lɛ e we ji wɔ, ke wa hɛɛ hɛ kɛ nɔ fɔmi kã kɛ fiami ɔ mi kpɛii kɛ ya su nyagbe ɔ.

Hejɔɔmi ha Mawu webi

⁷ Lɔ ɔ he ɔ kaa bɔ nɛ Mumi Klɔuklɔu ɔ de ɔ: “Mwɔnɛ, ke nyɛ nu e gbi ɔ,

⁸ Nyɛ ko wlua nyɛ tsui, Kaa bɔ nɛ a pee ngɛ mi mi la womi ɔ mi, Ngɛ nyatsɔmi ligbi ɔ nɔ ngɛ nga a nɔ ɔ,

⁹ He nɛ nyɛ tsɛmɛ ɔmɛ tsɔ ye nya nɛ a ka mi, Nɛ a na ye ni tsumi ɔmɛ ngɛ, jeha nyingmi eywiɛ sɔuu ɔ.

¹⁰ Lɔ ɔ he ɔ ye mi mi fu jamɛ a yi nɔ bi ɔmɛ Nɛ i ke: ‘Daa nɛ ɔ a tlaa blɔ ngɛ a juɛmi mi, Nɛ a li ye blɔ ɔmɛ.’

¹¹ Lɔ ɔ ha ye mi mi fu nɛ i ka kita Ke: ‘Ke a sɛ ye he jɔɔmi ɔ mi fii!’ ”

¹² Nyɛɛ hyɛ nɛ hi, mamimɛ, konɛ nyɛ ti nɔ ko ko hi tsui nɛ he we yi nɛ e kpale kɛ je Mawu hɛ kalɔ ɔ he;

¹³ se mohu nyɛɛ tu munyu ngɔ tsɔɔ nyɛ he ligbi tsuaa ligbi nɛ a tsɛɛ lɛ “mwɔnɛ” ɔ, konɛ yayami ko sisi nyɛ nɛ nyɛ wlua nyɛ tsui.

¹⁴ Ejakaa Kristo he piɛli ji wɔ ke wa hɛɛ wa he nɛ waa kɛ fɔɔ e nɔ kɛ je sisije ɔ mi kpɛii kɛ ya su nyagbe ɔ.

¹⁵ Ngmami ɔ de ke: “Mwɔnɛ ke nyɛ nu e gbi ɔ, Nyɛ ko wlua nyɛ tsui Kaa bɔ nɛ nyɛ pee Benɛ nyɛ tsɔ ye hɛ mi atua a.”

¹⁶ Nihi nɛ nu ɔ a ti mɛnɔmɛ lɛ a wo e mi mi la a? Anɛ pi ninɛmɛ nɛ kɛ Mose je Mizraim ɔ tsuo ʼi?

¹⁷ Nɛ mɛnɔmɛ e mi mi fu jeha nyingmi eywiɛ sɔuu ɔ? Anɛ pi ninɛmɛ nɛ pee yayami nɛ a fia si gbo ngɛ nga a nɔ ɔ lo?

¹⁸ Nɛ mɛnɔmɛ a nɔ e kã kita ngɔ fɔ kaa a be e he jɔɔmi ɔ mi sɛe ɔ? Anɛ pi tuegboli ɔmɛ lo?

¹⁹ Nɛ wa naa kaa hemi nɛ a he we yi ɔ he nɛ a nyɛ we mi nɛ a sɛ ɔ nɛ.