Hebribi 2 - Somi He Ɔ

Yi wami hemi ngua a

¹ Lɔ ɔ he ɔ e sa kaa waa pɛtɛ nihi nɛ wa nu ɔmɛ a he wawɛɛ konɛ wa ko tsɔ kɛ je he.

² Ejakaa ke munyu nɛ a tu ngɛ hiɔwe bɔfohi a nya a maa si kpɛii, nɛ a wo nɔ tɔmi tsuaa nɔ tɔmi kɛ tuegbenɔ tsuaa tuegbenɔ he hiɔ bɔ nɛ sa a,

³ kɛ wa maa pee kɛ tu nya fo kɛɛ, ke wa bui kikɛmɛ a yi wami hemi kpetekpleenyɛ nɛ ɔ? Nyɔmtsɛ ɔ nitsɛ ji nɔ nɛ tu he munyu kekle, nɛ ninɛmɛ nɛ nu ɔ hu ma nɔ mi ha wɔ,

⁴ nɛ Mawu nitsɛ hu kɛ okadihi kɛ nyakpɛ nihi kɛ hewami nihi slɔɔtohi kɛ Mumi Klɔuklɔu hami ɔ ngɛ he odase yee kɛ ngɛ nɔ sie, ngɛ lɛ nitsɛ e suɔmi nya.

Yi wami hemi mi hɛminyɛɛlɔ

⁵ Ejakaa pi hiɔwe bɔfohi a sisi nɛ e kɛ je nɛ maa ba nɛ wa ngɛ he munyu tue ɔ wo.

⁶ Nɔ ko ye he odase faii ngɛ he ko ke: “Mɛnɔ ji nɔmlɔ adesa nɛ o kaii lɛ? Loo nɔmlɔ bi hu nɛ o hɛ ngɛ e he nɔ?

⁷ Piɛ bɔɔ kɛkɛ nɛ o ha e kɛ hiɔwe bɔfohi nɛ sɔ; O kɛ hɛ mi nyami kɛ bu fi lɛ jlasi.”

⁸ O ngɔ nihi kulaa ngɔ woʼe nane si. Ejakaa ke e kɛ nihi kulaa wo e nane si ɔ, e piɛ́ nɔ́ ko nɔ́ ko nɛ a kɛ wui e sisi. Jehanɛ wa na we nɛ waa na kaa a kɛ nihi tsuo wo e sisi.

⁹ Se nɔ nɛ a ha nɛ piɛ bɔɔ nɛ e kɛ hiɔwe bɔfo ɔmɛ nɛ sɔ ɔ, wa na kaa Yesu ʼi, nɔ nɛ gbenɔ mi amanehlu ɔ he nɛ a kɛ hɛ mi nyami kɛ bu fi lɛ jlasi ɔ, benɛ pee nɛ Mawu dloomi nya a e sa e nya gbenɔ ha nɔ tsuaa nɔ.

¹⁰ Ejakaa e sa lɛ, nɔ nɛ he nɛ nihi kulaa ngɛ kɛ nɔ nɛ nɔ nɛ a gu nɛ nihi kulaa ngɛ ɔ, nɔ nɛ ngɔɔ bimɛ babauu kɛ baa hɛ mi nyami mi ɔ, kaa e ha a yi wami hemi tatsɛ nɔkɔtɔma a nɛ gu amanehluhi a mi nɛ e hi kɛ pi si.

¹¹ Ejakaa nɔ nɛ tsukɔɔ nihi a he kɛ ninɛmɛ nɛ a tsukɔɔ a he ɔ kulaa je nɔ kake mi, lɔɔ he je nɛ zo pee we lɛ kaa e ma tsɛ mɛ nyɛmimɛ ɔ nɛ.

¹² Nɛ eke: “Ma wo o biɛ ɔ tã ngɔ tsɔɔ ye nyɛmimɛ ɔmɛ; Asafo kpɛti hu ma la kɛ je o yi ngɛ.”

¹³ Kɛ jehanɛ hu: “Ma ngɔ ye hɛ ngɔ fɔ e nɔ.” Kɛ jehanɛ: “Oʼɛ mi kɛ bimɛ nɛ Mawu ngɔ ha mi ɔ.”

¹⁴ Lɔ ɔ he ɔ akɛnɛ bimɛ ɔmɛ hɛɛ he lo kɛ muɔ he je ɔ, lɛ hu e ngɔ kɔlɔ ɔ nɔuu eko kaa mɛ, konɛ e gu gbenɔ nɔ kɛ kpata nɔ nɛ ngɛ gbenɔ nɔ he wami nɛ ji abosiami ɔ hɛ mi,

¹⁵ nɛ e kpɔ nihi nɛ gbenɔ gbeye yemi he ɔ a plɛ pee nyɔguɛhi ngɛ a wami be kulaa mi ɔ.

¹⁶ Ejakaa e fɔɔ si faii kaa, tsa pi hiɔwe bɔfohi nɛ e yeɔ buaa, se mohu Abraham nina e yeɔ buaa.

¹⁷ Lɔ ɔ he ɔ nihi kulaa blɔfami ɔ, e sa kaa e hi kaa e nyɛmimɛ ɔmɛ, konɛ e plɛ mɔbɔ nalɔ kɛ anɔkuale osɔfo nɔkɔtɔma ngɛ Mawu hɛ mi, konɛ e kpa ma a yi musu.

¹⁸ Ejakaa akɛnɛ lɛ nitsɛ ɔ e na amanehlu nɛ a ka lɛ he je ɔ, e nyɛɔ e yeɔ buaa ninɛmɛ nɛ a kaa mɛ ɔ.