Hebribi 12 - Somi He Ɔ

Wa Tsɛ Mawu

¹ Lɔ ɔ he ɔ, jehanɛ wɔ hu, be abɔ nɛ wa ngɛ odase yeli babauu nɛ mimla wɔ kaa bɔku nɛ ɔ, nyɛ ha wa je nɔ́ tsuaa nɔ́ nɛ tsiɔ wa nya kɛ yayami nɛ fi wɔ ɔ, nɛ waa kɛ hɛ mi miami nɛ tu fo nɛ fɔɔ si ngɛ wa hɛ mi ɔ,

² nɛ waa hyɛ hemi kɛ yemi sisi jelɔ kɛ nya gbelɔ nɛ ji Yesu ɔ, nɔ nɛ nyami nɛ fɔɔ si ngɛ e hɛ mi ɔ he ɔ, e mia e hɛ mi ngɛ seumi tso ɔ he amanehlu ɔ mi, nɛ e bui zo ɔ, nɛ e kɛ ya hi si ngɛ Mawu matsɛ sɛ ɔ hiɛ ɔ nɔ.

³ Lɔ ɔ he ɔ nyɛ susu nɔ mi nɛ e gblee, bɔ nɛ e to e tsui si ngɛ si nɛ yayami peeli te ngɔ si lɛ ɔ mi, konɛ nyɛ nine mi ko wo nyu nɛ nyɛ ngmɛɛ he.

⁴ Ngɛ nyɛɛ kɛ yayami ta nɛ ɔ mi ɔ, nyɛ sui he nɛ a ma pue nyɛ muɔ si ngɛ ɔ lolo.

⁵ Anɛ nyɛ hɛ je bua womi munyu nɛ kɛ nyɛ tuɔ munyu kaa bɔ nɛ a kɛ bimɛ tuɔ munyu ɔ nɔ? ke: “Ye bi, koo ngɔ Nyɔmtsɛ ɔ tsɔsemi ɔ kaa nɔ ko nyafii, Nɛ jehanɛ ke e ka o hɛ mi ɔ, ko ha o nine mi nɛ wo nyu;

⁶ Ejakaa nɔ nɛ Nyɔmtsɛ ɔ suɔ ɔ, lɛ e tsɔseɔ, Nɛ e fiaa bi tsuaa bi nɛ e ngɔ peɔ e nɔ ɔ kpa.”

⁷ Nyɛ mia nyɛ hɛ mi ngɛ nɔ́ nɛ nyɛ ngɛ nae ɔ mi kaa e ji Nyɔmtsɛ ɔ tsɔsemi; ejakaa te bi nɛ ngɛ nɛ e tsɛ tsɔse we lɛ nɛɛ?

⁸ Ke nyɛ na we tsɔsemi nɛ nihi tsuo naa a eko ɔ, lɔ ɔ lɛɛ ajuama bimɛ ji nyɛ, se pi bimɛ nitsɛmɛ.

⁹ Jehanɛ wa ngɛ he lo blɔfami tsɛmɛ nɛ tsɔseɔ wɔ nɛ wa buu mɛ; anɛ e sɛ́ kaa waa ba wa he si ngɔ ha mumihi a tsɛ ɔ mohu babauu konɛ wa yi nɛ e na wa?

¹⁰ Ejaka mɛɛ lɛɛ, be bɔɔ ko kɛkɛ a tsɔseɔ wɔ bɔ nɛ sa a hɛ mi; se Mawu lɛɛ, e tsɔseɔ wɔ, konɛ e hi ha wɔ konɛ wa na e klɔuklɔu peemi ɔ eko.

¹¹ Se tsɔsemi tsuaa tsɔsemi ɔ, a mlɔ nɛ ɔ ɔ, e pee we nɔ kaa bua jɔmi nɔ́, se dɔmi nɔ́ mohu; se ke pee se ɔ, e woɔ he jɔmi yiblii nɛ ji dami ɔ haa nihi nɛ gu nɔ kase nɔ́ ko ɔ.

Nitsɔɔmi kɛ kɔkɔbɔmi

¹² Lɔ ɔ he ɔ nyɛ wo ninehi nɛ mi jɔ ɔmɛ a nɔ nɛ nyɛɛ kpa nakutsohi nɛ gbɔle ɔmɛ a mi,

¹³ nɛ nyɛɛ nyɛɛ blɔ nɛ da nɔ, konɛ pɔtsɛ ko nɛ ko sane si, se mohu a tsa lɛ.

¹⁴ Nyɛɛ bɔ mɔde nɛ nyɛɛ kɛ nihi kulaa nɛ hi si ngɛ he jɔmi mi, kɛ he tsɔmi nɛ ke nɔ ko si nɛ e be Nyɔmtsɛ ɔ nae ɔ.

¹⁵ Nyɛɛ hyɛ nɛ hi, konɛ nɔ ko ko ngmɛɛ Mawu dloomi ɔ he, konɛ poku kɛ doomi ko ko puɛ nɛ e hao nyɛ nɛ e ble nihi fuu kɛ e duɔ ɔ;

¹⁶ konɛ nɔ ko ko pee e he ajuama bɔlɔ, loo yaka nɔmlɔ kaa Esau nɛ jua e bi tete blɔ nya a kɛ he si kake niye ni ɔ.

¹⁷ Ejakaa nyɛ le kaa, benɛ pee se nɛ e hla kaa e na gbaami ɔ, a kua lɛ; ejakaa e na we tsui tsakemi he blɔ, pohu e kɛ vo nyu hla se blɔ.

¹⁸ Ejakaa nyɛ bɛ yoku nɛ a taa he nɛ ngɛ sae kɛ la, kɛ bɔku kɛ diblii kɛ kɔɔhiɔ ngua,

¹⁹ kɛ titimati pɛmi, kɛ gbi pɛmi nɛ nihi nɛ nu ɔ kpa pɛɛ ke a ko tu e ko piɛ he hu ɔ he;

²⁰ ejakaa mlaa nɛ a wo ke: “Ke lohwe ko tete ta yoku ɔ he ɔ, a fia lɛ tɛ” ɔ, a nyɛ we nɔ nɛ a ye;

²¹ nɛ nɔ́ nɛ e na a ngɛ gbeye babauu tsɔ nɛ Mose ke: “I ngɛ gbeye yee, nɛ i he ngɛ doe blibliibli.”

²² Se mohu, Zion yoku ɔ he nyɛ ba, kɛ Mawu hɛ kalɔ ma nɛ ji hiɔwe Yerusalem ɔ, kɛ hiɔwe bɔfohi akpe akpehi abɔ,

²³ kɛ kekleekle bimɛ nɛ a ngma a biɛ ngɛ hiɔwe, kɛ Mawu nɛ ji nihi kulaa a kojolɔ ɔ, kɛ dali nɛ hi kɛ pi si ɔmɛ a mumi ɔmɛ,

²⁴ kɛ Yesu nɛ ji somi he midalɔ ɔ, kɛ muɔ nɛ a kɛ fia nɛ tuɔ munyu kpakpa pe Habel nɔ ɔ ngɔ.

²⁵ Nyɛɛ hyɛ nɛ hi konɛ nyɛ ko kua nɔ nɛ ngɛ munyu tue ɔ munyu ɔ, ejakaa ke nihi nɛ kua nɔ nɛ tu munyu tsɔɔ mɛ ngɛ zugba a nɔ munyu ɔ a he ji mi ɔ, lɛɛ ke wa kpale kɛ je nɔ nɛ jee hiɔwe tuɔ munyu ɔ se ɔ, wɔ mohu wa he be mi jee kɔkɔɔkɔ;

²⁶ nɔ gbi nɛ mimiɛ zugba a ngɛ lɛ be ɔ mi ɔ, se jehanɛ e wo si ke: “E piɛ si kake nɛ ma mimiɛ, pi zugba a kɛkɛ, se hiɔwe hulɔ,” ɔ.

²⁷ Munyu nɛ ke: “E piɛ si kake” ɔ, e kɛ tsɔɔ faii kaa, nihi nɛ a mimiɛ ɔmɛ ma tsake, ejakaa nihi nɛ a bɔ ʼi, konɛ nihi nɛ be mimiɛe ɔmɛ nɛ hi si.

²⁸ Lɔ ɔ he ɔ, akɛnɛ wa na matsɛ yemi nɛ a be nyɛe ma mimiɛ nɛ ɔ ɔ, nyɛ ha waa na si, nɛ wa kɛ sɔmɔ Mawu bɔ nɛ sa e hɛ mi kɛ bu kɛ gbeye yemi;

²⁹ ejakaa wa Mawu ɔ la nɛ puɛɔ nɔ hu ji lɛ.