Hebribi 11 - Somi He Ɔ

Hemi kɛ yemi

¹ Hemi kɛ yemi ji nihi nɛ wa hɛ ngɛ nɔ ɔmɛ a nɔ he waminami kɛ nihi nɛ a nɛ́ ɔmɛ a nɔ mi mami.

² Ejakaa lɔ ɔ mi a ye blemabi ɔmɛ a he odase kpakpa ngɛ.

³ Hemi kɛ yemi waa kɛ yoɔ kaa Mawu munyu a kɛ bɔ je ɔ, lɔ ɔ he ɔ nihi nɛ a naa amɛ a mi a je kɛ pee nihi nɛ a nɛ́ ɔmɛ.

⁴ Hemi kɛ yemi Habel kɛ sa bɔ nɛ pe Kain nɔ ɔ ha Mawu, nɛ lɔ ɔ he hulɔ nɛ a ye e he odase kaa dalɔ ji lɛ ɔ nɛ, ejakaa Mawu he e nike ni ɔmɛ; nɛ kɔlɔ ɔ nɔuu e kɛ ngɛ munyu tue kɔ mwɔ pohu e gbo.

⁵ Hemi kɛ yemi he a ngɔ Henok kɛ ho hiɔwe ya, konɛ e ko gbo, nɛ a nɛ lɛ hu, ejakaa Mawu ngɔ lɛ kɛ ho. Ngmami ɔ ye e he odase kaa loko a maa ngɔ lɛ kɛ ho ɔ, Henok sa Mawu hɛ mi.

⁶ Ke hemi kɛ yemi be ɔ, a be Mawu hɛ mi nyɛe maa sa, ejakaa nɔ nɛ baa Mawu ngɔ ɔ, ja e he ye kaa e ngɛ, nɛ e ji ninɛmɛ nɛ hlaa e se blɔ ɔ a hiɔ wolɔ hulɔ.

⁷ Hemi kɛ yemi Noa hu kɛ bu Mawu tue, benɛ e fa lɛ ngɛ nihi nɛ a nɛ́ ɔmɛ a he ɔ, nɛ e kɛ dla daka kɛ ha e we ɔ yi wami hemi; e hemi kɛ yemi nɛ ɔ nɔ hu e gu nɛ e bu je ɔ fɔ, nɛ e kɛ na dami nɛ je hemi kɛ yemi mi.

⁸ Hemi kɛ yemi Abraham kɛ bu tue, benɛ a tsɛ lɛ ɔ, nɛ e pue nɔ kɛ ho he nɛ Mawu wo lɛ si ke e ma ngɔ ha lɛ ɔ ya; nɛ e pue nɔ kɛ ho, pohu e li he nɛ e yaa.

⁹ Hemi kɛ yemi e kɛ ya to nibwɔ ngɛ si womi zugba a nɔ kaa nɔ kpa, nɛ e kɛ Isak kɛ Yakob nɛ e kɛ mɛ ji jamɛ a si womi ɔ nɔuu yeli ɔ hi si ngɛ bo tsuhi a mi;

¹⁰ ejakaa Abraham ngɛ ma nɛ ngɛ sisi tomi nɛ he wa nɛ e tolɔ kɛ e malɔ ji Mawu ɔ blɔ hyɛe.

¹¹ Hemi kɛ yemi Sara hu kɛ na he wami nɛ e kɛ na muklii, nɛ lɛ nɛ e bwɔ tsɔ kɛ be nɔ ɔ fɔ, ejakaa nɔ nɛ wo si ɔ, e bu lɛ anɔkualetsɛ.

¹² Lɔ ɔ he hulɔ nɛ a je nɔ kake nɛ ngɛ kaa nɔ nɛ gbo mo ɔ mi nɛ a fɔ nihi nɛ hiɛ babauu kaa hiɔwe dodoehi loo wo nya zia nɛ a be nyɛe maa kane ɔ nɛ.

¹³ Hemi kɛ yemi mi ni nɛ ɔmɛ kulaa gbo ngɛ. Lokoo kɛkɛ a na nihi nɛ a wo he si ɔmɛ ngɛ, nɛ a nya he, pohu a nine sui nɔ, nɛ a ye odase kaa nibwɔhi kɛ masetsɛmɛ ji mɛ ngɛ zugba a nɔ?

¹⁴ Ejakaa nihi nɛ deɔ jamɛ a ni ɔmɛ ɔ, a tsɔɔ faii kaa a ngɛ mɛ nitsɛmɛ a ma hlae.

¹⁵ Nɛ kaa a hɛ ngɛ ma nɛ a je mi ɔ nɔ jinɛ, a ko na he blɔ kɛ ko kpale a se kɛ ho lejɛ ɔ ya ekohu.

¹⁶ Se jehanɛ, a ngɛ ma ko nɛ hi pe lɔ ɔ nɛ ji hiɔwe nɔ ɔ hlae. Lɔ ɔ he ɔ, e pee we Mawu zo kaa a ma tsɛ lɛ a Mawu, ejakaa e dla ma ngɔ to mɛ.

¹⁷ Hemi kɛ yemi nya Abraham ngɔ Isak ngɔ ha kaa bɔ, benɛ a ka lɛ ɔ, nɛ e kɛ e bi kake ɔ ba ha, benɛ e nine su si womi ɔ nɔ momo ɔ,

¹⁸ lɛ nɔ nɛ Mawu de lɛ ke: “Isak mi a maa je kɛ tsɛ o nina,” a.

¹⁹ Abraham ngɔ lɛ kaa Mawu ngɛ he wami nɛ e kɛ ma tle Isak si kɛ je gbeje tete, nɛ niinɛ, ke a ma de ngɛ blɔ ko nɔ ɔ, e nine su e nɔ kɛ je lejɛ ɔ.

²⁰ Hemi kɛ yemi Isak kɛ gbaa Yakob kɛ Esau ngɛ nihi nɛ maa ba amɛ a he.

²¹ Hemi kɛ yemi Yakob kɛ gbaa Yosef bi ɔmɛ a ti nɔ tsuaa nɔ benɛ e miɔ nɛ e ma gbo ɔ, nɛ e ma e yi si ngɛ e dɛma tso ɔ nɔ nɛ e sɔle.

²² Hemi kɛ yemi Yosef hu kɛ wo Israelbi ɔmɛ a Mizraim jemi ɔ nɔ ta benɛ e su e gbenɔ be ɔ, nɛ e wo lɛ nitsɛ e wu ɔmɛ a he kita a.

²³ Hemi kɛ yemi Mose fɔli ɔmɛ ngɔ lɛ ngɔ laa hlami etɛ, benɛ a fɔ lɛ ɔ, ejakaa a na kaa jokuɛ ɔ he ngɛ fɛu, nɛ a yi matsɛ hiɔngɔ nɛ e wo ɔ gbeye.

²⁴ Hemi kɛ yemi he nɛ Mose nitsɛ, benɛ e wa a, e kua ke a ko tsɛ lɛ Farao biyo ɔ bi,

²⁵ e suɔ mohu kaa e kɛ Mawu ma a nɛ na amanehlu, pe nɔ́ nɛ e maa ye yayami mi ngɔmi be bɔɔ ko.

²⁶ E bu Kristo ahluabɔmi ɔ kaa ni babauu pe Mizraim juetli, ejakaa e ngɛ hiɔwo ɔ hyɛe.

²⁷ Hemi kɛ yemi Mose kɛ je Mizraim nɛ e yi matsɛ ɔ mi mi fumi ɔ gbeye; e kpale we e se, kaa nɔ nɛ ngɛ Mawu nɛ a nɛ́ lɛ ɔ hyɛe.

²⁸ Hemi kɛ yemi Mose kɛ to Hetsɔmi ɔ kɛ muɔ dikimi ɔ sisi, konɛ bɔfo nɔ hɛ mi kpatalɔ ɔ ko ba gbe Israelbi ɔmɛ a bi tete ɔmɛ.

²⁹ Hemi kɛ yemi Israelbi ɔmɛ kɛ po Wo Tsu ɔ kaa zugba gbligbli, nɔ́ nɛ Mizraimbi ɔmɛ hu ka peemi se wo ɔ ngɔ mɛ kɛ ho ɔ.

³⁰ Hemi kɛ yemi nya Yeriko gli ɔmɛ kuɔ pue si, benɛ Israelbi ɔmɛ bɔle lɛ ligbi kpaago ɔ.

³¹ Hemi kɛ yemi he nɛ Rahab, yaholɔ ɔ, kɛ nihi nɛ piɛ e he nɛ he we Mawu yi ɔ gbo we ɔ nɛ, ejakaa e he slaali ɔmɛ kɛ bua jɔmi.

³² Nɛ mɛni ma de ekohu? Ejakaa i be ye he deka nae bɔ nɛ ma kɛ sɛɛ Gideon kɛ Barak, Samson kɛ Yefta, David kɛ Samuel, kɛ gbali ɔmɛ hulɔ a he sane,

³³ nihi nɛ gu hemi kɛ yemi nɔ ye matsɛ yemihi a nɔ kunimi, a tsu dami nihi, a nine su si womihi a nɔ, a tsi jatahi a nya,

³⁴ a gbe la he wami, a je klaatehi a nya, a na he wami kɛ je gbɔlemi mi, a he wa ngɛ ta mi, a bu masetsɛmɛ a ta a.

³⁵ Yihi a nine su a nihi nɛ gbo ɔmɛ a nɔ ekohu kɛ gu si temi nɔ. Se ni kpa komɛ hu, a kɛ piimi gbe mɛ, akɛnɛ a kplɛɛ we kpɔmi, konɛ a te si kɛ ya wami kpakpa mi ɔ.

³⁶ Ni komɛ hu a ye a he fɛu nɛ a fia mɛ kplibi. Nɛ a bɔ mɛ pa nɛ a wo mɛ tsu mi;

³⁷ a fia mɛ tɛ, a kɛ sau poo a mi, a kɛ klaate gbe mɛ; a ha a wo jijɔhi kɛ apletsihi a he womi kɛ nyɛɛ, ohia hia mɛ, a wa mɛ yi mi, a pee mɛ ni yeyee;

³⁸ je ɔ hi ha mɛ. A wo lalaalo ngɛ nga kɛ yokuhi a nɔ kɛ tɛ puɔhi kɛ zugba puɔhi a mi.

³⁹ Nɛ ni nɛ ɔmɛ tsuo ɔ, a ye a he odase kpakpa ngɛ hemi kɛ yemi ɔ he mohu, se a nine sui si womi ni ɔmɛ a nɔ,

⁴⁰ ejakaa Mawu dla nɔ́ ko kpakpa ngɔ to wɔ, konɛ a ko hi kɛ pi si si wɔ.