Hebribi 10 - Somi He Ɔ

¹ Ejakaa ni kpakpahi nɛ maa ba amɛ a nini kɛkɛ Mlaa a hɛɛ, se pi ni ɔmɛ a subai nitsɛ, lɔ ɔ he ɔ, e be nyɛe nɛ e kɛ daa jeha bɔhi nɛ a saa nɔtonɔto ɔ nɛ ha nihi nɛ baa Mawu ngɔ ɔ nɛ a hi kɛ pi si.

² Jinɛ a ko jɔɔ bɔ ɔmɛ sami, ejakaa nihi nɛ ba jaa Mawu ɔ, ke a tsukɔ a he si kake pɛ ɔ, a be fɔ ko nɛ a yeɔ ngɛ a he yayamihi a he kulaa hu.

³ Se mohu bɔ ɔmɛ ɔ, kaimi a kɛ kaii yayamihi daa jeha,

⁴ ejakaa a be nyɛe maa ngɔ nahi kɛ tokuhi a muɔ kɛ je yayamihi.

⁵ Lɔ ɔ he ɔ, benɛ Kristo ma je nɔ mi ɔ, ye de Mawu ke: “Bɔ kɛ nike ni ɔmɛ ɔ, o sume, Se nɔmlɔ tso o dla ha mi

⁶ Bɔ nɛ a kɛ lohwehi saa kɛ yayami he bɔ ɔmɛ Sɛ́ o hɛ mi.

⁷ Kɛkɛ nɛ i de ke: ‘Oʼɛ, i ba, Oo Mawu, Nɛ ma ba pee o suɔmi nya ni Kaa bɔ nɛ a ngma ngɛ ye he ngɛ Mlaa womi ɔ mi ɔ.’ ”

⁸ Kekle ɔ e ke: “Bɔ kɛ nike nihi kɛ lohwehi a bɔhi kɛ yayami he bɔ ɔmɛ ɔ o sume, nɛ e sɛ́ o hɛ mi hulɔ,” (nihi nɛ a kɛ ba haa ngɛ Mlaa a nya a);

⁹ kɛkɛ nɛ e ke: “Oʼɛ, i ba nɛ ma ba pee mo, Mawu, o suɔmi nya ni.” Lɔ ɔ Mawu jeɔ kekle bɔ sami ni ɔmɛ konɛ e ngɔ Kristo nɔ ɔ ngɔ ma nane mi.

¹⁰ A kɛnɛ Yesu Kristo pee Mawu suɔmi nya ni he je ɔ, a tsukɔ wa he kɛ gu e nɔmlɔ tso nɛ e kɛ ha si kake nyɔngloo ɔ nɔ.

¹¹ Osɔfo tsuaa osɔfo ɔ, ligbi tsuaa ligbi ɔ, e daa si nɛ e sɔmɔɔ, nɛ e saa jamɛ a bɔ ɔmɛ nɔuu kpitikpiti, nihi nɛ nyɛ we yayami nɛ a je ligbi ko ligbi ko ɔ.

¹² Kristo lɛɛ e sa yayamihi a he bɔ si kake nyɔngloo, nɛ e ya hi si ngɛ Mawu hiɛ ɔ nɔ;

¹³ nɛ nɔ́ nɛ piɛ ji kaa, e ngɛ mlɛe kɛ maa su be nɛ a maa ngɔ e henyɛli ɔmɛ kɛ maa pee e nane si maangoo.

¹⁴ Ejakaa bɔ kake nɛ e sa a, e kɛ ha nihi nɛ a tsukɔ a he ɔ hi kɛ pi si nyɔngloo.

¹⁵ Mumi Klɔuklɔu ɔ hu yeɔ wɔ odase. Kekleekle ɔ, e ke:

¹⁶ “Enɛ ɔ ji somi nɛ i kɛ mɛ maa so Ngɛ jamɛ a ligbi ɔmɛ a se, Nyɔmtsɛ ɔ lɛ de: I kɛ ye mlaa amɛ maa wo a tsui mi, Nɛ ma ngma ngɔ wo a juɛmi mi

¹⁷ Nɛ a he yayami ɔmɛ kɛ a nɔ tɔmi ɔmɛ ɔ, i be kaie kulaa hu.”

¹⁸ Nɛ he nɛ a kɛ enɔmɛ pa ngɛ ɔ, yayami he bɔ sami ko be hu.

Nyɛ ha waa hɛ kɛ su Mawu he

¹⁹ Lɔ ɔ he ɔ, mamimɛ, akɛnɛ wa ngɛ he blɔ ngɛ Yesu muɔ ɔ nya nɛ wa kɛ maa sɛ he klɔuklɔu ɔ

²⁰ ngɛ blɔ he nɛ hɛ ngɛ nɛ e je ha wɔ ɔ kɛ gu tsu mi pomi bo ɔ nɛ ji lɛ nitsɛ e he lo ɔ mi,

²¹ nɛ jehanɛ wa ngɛ osɔfo nɔkɔtɔma ngua nɛ yeɔ Mawu we ɔ nɔ he je ɔ,

²² nyɛ ha waa hɛ kɛ su Mawu he kɛ tsui klɔuu ngɛ hemi kɛ yemi nɛ wa ngɛ he wami ngɛ nɔ ɔ mi, kɛ tsui hu nɛ a tsukɔ he nɛ e be he ni lemi yaya ko hulɔ, kɛ nɔmlɔ tso nɛ a kɛ nyu nɛ mi tsɔ du he.

²³ Nyɛ ha waa pɛtɛ wa hɛ kɛ nɔ fɔmi nɛ wa jaje ɔ mi wawɛɛ, ejakaa nɔ nɛ wo si ɔ anɔkualetsɛ ji lɛ.

²⁴ Nyɛ ha wa susu wa sibi a he, konɛ wa hɛ nɛ e dɔ ngɛ suɔmi kɛ ni tsumi kpakpahi a he.

²⁵ Nyɛ ko ha waa jɔɔ wa he nya buami, kaa bɔ nɛ ni komɛ pɔɔ peemi ɔ, se mohu waa wo wa he ga, nɛ titli ɔ, akɛnɛ nyɛ na kaa Ligbi ɔ ngɛ sue nɛ ɔ.

²⁶ Ejakaa ke wa bua nɛ wa peɔ yayami ngɛ benɛ wa le anɔkuale ɔ se ɔ, lɛɛ yayamihi a he bɔsami ko be hu,

²⁷ kojomi blɔ hyemi nɛ ngɛ gbeye kɛkɛ, kɛ la gligli nɛ maa sa nihi nɛ nyɛɛ Mawu ɔ.

²⁸ Nɔ tsuaa nɔ nɛ kuaa Mose Mlaa a, a gbee lɛ, nɛ a nɛ́ lɛ mɔbɔ ngɛ ni enyɔ loo ni etɛ a dase yemi nya.

²⁹ Mɛni tuegblami nɛ nya wa po nyɛ susu kaa e sa nɔmlɔ ko nɛ bui Mawu Bi ɔ, nɛ e bu somi muɔ nɛ a kɛ tsukɔ e he ɔ kaa yaka nɔ ko, nɛ e pee dloomi mumi ɔ nidɔ ni ɔ?

³⁰ Ejakaa wa le nɔ nɛ de ke: “Ye nɔ ji tue gblami, imi ma wo he hiɔ” ɔ. Nɛ jehanɛ: “Nyɔmtsɛ ɔ maa kojo lɛ nitsɛ e ma a.”

³¹ Mawu hɛ kalɔ ɔ dɛ mi nɔmi ngɛ gbeye pam.

³² Se nyɛ kai kekle be ɔmɛ, benɛ Mawu la a tso ngɛ nyɛ nɔ ɔ, bɔ nɛ nyɛ mia nyɛ hɛ mi ngɛ amanehlu babauu mi.

³³ Be komɛ ɔ jemi kɛ amanehlu sɔuu ha nyɛ plɛ hyemi nihi, nɛ be komɛ hu nyɛ plɛ nihi nɛ a pee mɛ ja amɛ a huɛmɛ nɔnali.

³⁴ Nyɛ muklii mi sa nyɛ ngɛ ninɛmɛ nɛ a bɔ mɛ pa amɛ a he, nɛ nyɛ nihi nɛ a ha amɛ hu nyɛɛ kɛ bua jɔmi kplɛɛ, akɛnɛ nyɛ le kaa nyɛ ngɛ juetli nɛ hi pe kɔlɔ ɔ babauu nɛ hii si daa ngɛ hiɔwe ɔ.

³⁵ Lɔ ɔ he ɔ nyɛ ko ngmɛɛ nyɛ mi kã a he, ejakaa e ngɛ hiɔwo ngua.

³⁶ Tsui si tomi he hia nyɛ, konɛ nyɛɛ pee Mawu suɔmi nya ni, nɛ nyɛ nine nɛ e su siwomi ɔ nɔ.

³⁷ Ejakaa kaa bɔ nɛ ngmami ɔ de ɔ: “E piɛ bɔɔ kɛkɛ Nɛ nɔ nɛ ma a maa ba, Nɛ e be kɛe kulaa;

³⁸ Se zdalɔ nɛ je hemi kɛ yemi mi ɔ Yi ma na wa; Nɛ ke e kpale kɛ je ye se ɔ Ye klaa be e he buajɔmi nae.”

³⁹ Se wɔɔ lɛɛ tsa pi nihi nɛ kpaleɔ kɛ yaa hɛ mi patami mi mi ɔ a ti nikomɛ ji wɔ se mohu wɔ ji nihi nɛ kɛ hemi kɛ yemi naa a klaa yi wami hemi ɔ a ti ni komɛ.