Hebribi 1 - Somi He Ɔ

Mawu munyu nɛ e kɛ gu e Bi ɔ nɔ

¹ Blema be ɔmɛ a mi ɔ, Mawu kɛ wa tsɛmɛ ɔmɛ tu munyu kɛ gu gbali ɔmɛ a nɔ, ngɛ blɔ slɔɔtohi a nɔ,

² se ngɛ nyagbe ligbi nɛ ɔmɛ a mi ɔ, e Bi ɔ nya e kɛ wɔ tu munyu ngɛ, nɔ nɛ e ngɔ lɛ ngɔ pee nihi kulaa yelɔ ɔ, nɔ nɛ nɔ hu nɛ e gu kɛ bɔ je ɔ kɛ e mi ni ɔmɛ;

³ nɔ hu nɛ ji e hɛ mi nyami ɔ kpɛmi ɔ su ɔ henɔ, nɛ e kɛ lɛ nitsɛ e he wami munyu ɔ hɛɔ nihi kulaa a, benɛ e tsukɔ wa he kɛ je wa he yayami ɔmɛ a mi ɔ, e ho ya hi si ngɛ hɛ mi nyamitsɛ agbo ɔ hiɛ ɔ nɔ ngɛ hiɔwe.

Bi ɔ kle pe hiɔwe bɔfo ɔmɛ

⁴ Enɛ ɔ he ɔ Bi ɔ kle pe hiɔwe bɔfo ɔmɛ akɛnɛ biɛ nɛ Mawu ha lɛ ɔ kle pe a nɔ ɔ.

⁵ Ejakaa te bɔfo nɛ Mawu de lɛ hyɛ ke: “Ye bi ji mo, Mwɔnɛ i fɔ mo?” Loo, “Ma pee e tsɛ, Nɛ lɛ hu e maa pe ye bi?” ɔ nɛɛ?

⁶ Nɛ benɛ e kɛ e bi Tete ɔ ma je ɔ mi ɔ, e kpale de ke: “Ha Mawu bɔfo ɔmɛ kulaa nɛ a ja lɛ.”

⁷ Nɛ hiɔwe bɔfo ɔmɛ ɔ, e de ngɛ a he ke: “Nɔ nɛ plɛɛ e bɔfo ɔmɛ ngɔ peɔ kɔɔhiɔhi, Nɛ e sɔmɔli ɔmɛ hu e peɔ mɛ la lilɛhi” ɔ.

⁸ Se Bi ɔ lɛɛ e de ngɛ e he ke: “Oo Mawu, o matsɛ sɛ ɔ maa si kɛ yaa neneene kɛ neneene Nɛ o matsɛ yemi tso ɔ, dami matsɛ yemi tso ʼi,

⁹ O suɔ nɔ́ nɛ da, o nyɛɛ nɔ́ yaya peemi Lɔ ɔ he ɔ Mawu nɛ ji o Mawu ɔ Kɛ bua jɔmi nu ɔ pɔ mo pe o nyɛmimɛ ɔmɛ.”

¹⁰ Kɛ jehanɛ: “Nyɔmtsɛ, sisije ɔ, Mo lɛ o to zugba a sisi, Nɛ hiɔwe ɔ, o nine nya ni tsumi ʼi.

¹¹ Mɛɛ lɛɛ a hɛ mi ma kpata, se moo lɛɛ, o ngɛ daa, nɛ mɛ tsuo a maa bwɔ kaa tade;

¹² Nɛ o ma koklo mɛ kaa bo, nɛ a ma tsake; Se moo lɛɛ o ngɛ bɔ nɛ o ngɛ ɔ nɔuu, nɛ o jeha amɛ tɛ̃.”

¹³ Se hiɔwe bɔfo ɔmɛ a ti mɛnɔ po nɛ e de ngɛ e he hyɛ ke: “Hii ye hiɛ ɔ nɔ Kɛ yaa su be nɛ ma ngɔ O he nyɛli ɔmɛ ngɔ pee o nane si sɛ?” ɔ nɛɛ?

¹⁴ Anɛ mɛ kulaa a, pi mumihi nɛ sɔmɔɔ ji mɛ, nɛ nihi nɛ ma na yi wami hemi ɔ a sɔmɔmi he je nɛ a tsɔ mɛ?