Galatabi 5 - Somi He Ɔ

Nyɛ ko ngmɛɛ nyɛ heyemi ɔ he

¹ Kristo pee wɔ odehehi, nɛ e ha wa ye wa he, lɔ ɔ he ɔ nyɛɛ da si kpitikplii nɛ nyɛ ko ha a bɔ nyɛ nyɔguɛ yemi pã a hu.

² Oʼɛ, imi Paulo, i ngɛ nyɛ dee ke, ke nyɛ ha a po nyɛ ɔ Kristo he be se nami ko ha nyɛ.

³ Se i pa ngɛ odase yee kɛ ngɛ nɔmlɔ tsuaa nɔmlɔ nɛ a po lɛ ɔ tsɔɔe kaa e hɛɛ hiɔ kaa é ye mlaa mluku ɔ kulaa nɔ.

⁴ Nyɛ ninɛmɛ nɛ nyɛ hlaa kaa a wo nyɛ nguɔ ngɛ mlaa mi ɔ, nyɛɛ kɛ Kristo be sane ko; nyɛ gbee si kɛ je dloomi ɔ mi.

⁵ Ejakaa wɔɔ lɛɛ, Mumi ɔ nɔ wa guu waa kɛ hemi kɛ yemi mlɛɛ dami hɛ kɛ nɔ fɔmi ɔ.

⁶ Ejakaa Kristo Yesu mi ɔ, pi nɔ pomi nɛ nyɛɔ nɔ́ ko peɔ, nɛ pi mɔmlɔtɔ hulɔ, se mohu hemi kɛ yemi nɛ guu suɔmi nɔ tsuɔ ni ɔ ʼi.

⁷ Nyɛ ngɛ mɔde bɔe saminya; mɛnɔ po lɛ tsi nyɛ blɔ kaa nyɛ ko bu anɔkuale ɔ tue?

⁸ Juɛmi tsakemi nɛ ɔ ɔ, tsa pi Mawu nɛ tsɛ nyɛ ɔ mi nɛ e je.

⁹ Ma sasɛ nyafii saa ma mluku ɔ tsuo.

¹⁰ Imi lɛɛ i ngɔ ye hɛ ngɔ fɔ nyɛ nɔ ngɛ Nyɔmtsɛ ɔ mi, kaa nyɛ be juɛmi kpa ko juɛe, se nɔ nɛ ngɛ nyɛ puee ɔ, nɔ tsuaa nɔ nɛ e ji ɔ, e musu maa tloo lɛ.

¹¹ Imi lɛɛ, mamimɛ, ke nɔ pomi i ngɛ fiee kɛ mwɔɔ ɔ, mɛni he je mɔ nɛ a ngɛ mi yi mi wae kɛ mwɔɔ? Ke ja a, lɛɛ seumi tso ɔ he sane ɔ, e pi nya tsɔmi nɔ́ hu.

¹² Oo, i na jinɛ nihi nɛ woɔ nyɛ yi mi ɔ puɛ̃ loo ta mɛ nitsɛmɛ a he.

¹³ Ejakaa he yemi mi a tsɛ nyɛ kɛ ba ngɛ, mamimɛ; se nyɛ he yemi ɔ kɛkɛ nɛ nyɛ ko ha e plɛ he blɔ ha he lo ɔ, se mohu nyɛɛ gu suɔmi mi kɛ sɔmɔ nyɛ he.

¹⁴ Ejakaa mlaa mluku ɔ kulaa nɔ yemi ngɛ munyu kake nɛ ɔ mi ke: “Suɔ o nyɛmi kaa bɔ nɛ o suɔ mo nitsɛ o he.”

¹⁵ Se ke nyɛ kɔɔ nyɛ he nɛ nyɛ plaa nyɛ he ɔ, nyɛɛ hyɛ nɛ nyɛ ko puɛ nyɛ he!

Mumi ɔ kɛ nɔmlɔ su

¹⁶ Se i ke: Ke nyɛ nyɛɛ ngɛ mumi nya a, nyɛ be he lo akɔnɔ ɔmɛ a nya ni pee.

¹⁷ Ejakaa nihi nɛ he lo ɔ dii se ɔ kɛ mumi ɔ yi, nɛ nihi nɛ mumi ɔ hu dii se ɔ kɛ he lo ɔ yi. Ni nɛ ɔmɛ kɛ a he yi, konɛ nyɛ ko pee nihi nɛ nyɛ suɔ.

¹⁸ Se ke mumi ɔ lɛ kpakpaa nyɛ ɔ, nyɛ be mlaa sisi.

¹⁹ Se he lo ɔ ni tsumi ɔmɛ jee kpo paa, kɔlɔ ɔmɛ ji gba puemi, ajuama bɔmi, mu ni tsumi, ya homi

²⁰ wɔ jami, nyuami, nyɛmi, pɛ, hunga jemi, mi mi la womi, ngmlaa kpami, atua tsɔmi, mi gbami, hɛ tsumi,

²¹ da demi, fiɛmi yaya kɛ nihi nɛ ngɛkaa enɛ ɔmɛ, nihi nɛ i de nyɛ ngɔ to, kaa bɔ nɛ i de nyɛ momoɔ, ke: nihi nɛ peɔ kikɛmɛ a ni nɛ ɔmɛ ɔ, a nine be Mawu matsɛ yemi ɔ nɔ sue.

²² Se Mumi ɔ yiblii ji suɔmi, bua jɔmi, he jɔmi, tsui si tomi, mi mi himi, kpakpa peemi, hemi kɛ yemi,

²³ he si bami, hɛ si kami; enɛ ɔmɛ ɔ mlaa ko gui.

²⁴ Se nihi nɛ ji Kristo Yesu nihi ɔ, a sɛu he lo ɔ kɛ e he numi nihi kɛ e kɔnɔ ɔmɛ kulaa.

²⁵ Ke wa hɛ ngɛ ngmengmle ngɛ Mumi ɔ mi ɔ, nya ha waa nyɛɛ ngɛ Mumi ɔ nya hulɔ.

²⁶ Wa hɛ ko kɔ yakayaka hɛ mi nyami nɔ, nɛ wa ko wo wa sibi a muklii mi la nɛ wa he ba tsɛ̃ wa sibi.