Galatabi 4 - Somi He Ɔ

¹ Nɔ́ nɛ i ngɛ tsɔɔe ɔ ji, be abɔ nɛ gbo si ni yelɔ ɔ ji bimwɔyo ɔ slɔɔto ko be e kɛ sɔmɔlɔ kpɛti, kpahu lɛ ji ni ɔmɛ tsuo a tsɛ;

² se e ngɛ nɔ hyɛli kɛ sɔmɔli nikɔtɔmahi a sisi kɛ yaa su be nɛ Tsɛ ɔ to ɔ.

³ Ja nɔuu kɛ̃ wɔ hu, benɛ wa ji bimwɔwi ɔ, a kɛ wɔ wo je nɛ ɔ mi adebɔ mumihi a nyɔguɛ yemi ɔ sisi.

⁴ Se benɛ be nɛ a to ɔ su ɔ, Mawu tsɔ lɛ nitsɛ e bi ɔ kɛ ba, yo ko ba fɔ lɛ, e ba mlaa sisi,

⁵ konɛ e ba kpɔ nihi nɛ ngɛ mlaa sisi ɔ, nɛ wa na bi peemi he blɔ.

⁶ Se akɛnɛ bimɛ ji nyɛ he je ɔ, Mawu tsɔ e bi ɔ Mumi ɔ kɛ ba nyɛ tsui mi, nɔ nɛ kpaa ngmlaa ke: “Abba, Tsaatsɛ!”

⁷ Lɔ ɔ he ɔ, o pi sɔmɔlɔ hu, se mohu bi ji mo. Nɛ ke bi ji mo ɔ, lɛɛ Mawu ni yelɔ hu ji mo ngɛ Kristo he.

Paulo ye Galatabi ɔmɛ a he kɔmɔ

⁸ Se be nɛ be ɔ mi ɔ, nyɛ li Mawu, nyɛɛ kɛ nyɛ he pee nyɔguɛhi ngɔ ha nihi nɛ pi mawu ji mɛ ngɛ a bɔmi su nya a;

⁹ se jehanɛ, nɛ nyɛ le Mawu, aloo mohu, nɛ Mawu le nyɛ nɛ ɔ, kɛ peɔ kɛɛ nɛ nyɛ pa kpaleɔ nyɛ se kɛ yaa sisi jemi nihi nɛ nyɛ we nɔ́ ko nɛ a pee nɛ a ye ohia amɛ a ngɔ, nɛ nyɛ pa hlaa kaa nyɛɛ kpale sɔmɔ mɛ ekohu ɔ nɛɛ?

¹⁰ Nyɛ buu ligbihi kɛ hlamihi kɛ behi kɛ jehahi a he akɔɔtaa fitso-fitso.

¹¹ I ngɛ gbeye yee, kaa nyɛ ma ha ma gbo nyɛ he yaka dengme.

¹² I ngɛ nyɛ pɛɛ kpae, mamimɛ, nyɛɛ pee kaa imi, ejakaa imi hu i ngɛ kaa nyɛ. Nyɛ pee we mi yayami ko;

¹³ se nyɛ le kaa he lo gbedemi mi i je kɛ jaje sane kpakpa a ngɛ ngɔ ha nyɛ kekle ɔ,

¹⁴ nɛ nɔ́ nɛ ji nya tsɔmi nɔ́ ha nyɛ ngɛ he lo mi ɔ, nyɛ gbi he guɛ, nɛ jehanɛ hu nyɛ nyangee we mi; se mohu nyɛ he mi kaa Mawu bɔfo, kaa Kristo Yesu nitsɛ.

¹⁵ Jehanɛ jije nyɛ bua jɔmi ɔ ngɛ? Ejakaa i ngɛ nyɛ he odase yee kaa, e maa hi jinɛ, nyɛ ko hia nyɛ hɛngmɛhi tete ha mi.

¹⁶ Nɛ i tuɔ anɔkuale tsɔɔ nyɛ he je ɔ, blɔɔ i plɛ nyɛ henyɛlɔ lo?

¹⁷ Pi nyɛ he dengme kpakpa ko nɛ ni kpa amɛ ngɛ gboe nɛ ɔ; se mohu a ngɛ hlae nɛ a tsi nyɛ wa ngɔ blɔ, konɛ nyɛ gbo mɛ mohu a he dengme.

¹⁸ E sa kaa nyɛ gbo dengme ngɛ nɔ́ nɛ ngɛ fɛu he daa; nɛ pi benɛ i kɛ nyɛ ngɛ ɔ kɛkɛ.

¹⁹ Ye bimɛ kpakpahi, i nu kɔɔmi ngɛ nyɛ fɔmi he ekohu kɛ maa su be nɛ a maa bɔ Kristo subai ɔ ngɛ nyɛ mi.

²⁰ I na nɛ jinɛ i ngɛ nyɛ kasa nya amlɔ nɛ ɔ nɛ ma tsake blɔ nɔ nɛ i kɛ nyɛ tuɔ munyu ngɛ, ejakaa i ngɛ haoe ngɛ nyɛ he!

Hagar kɛ Sara kaa nɔhyɛmi nɔ

²¹ Nyɛ ninɛmɛ nɛ nyɛ hlaa kaa nyɛɛ hi mlaa sisi ɔ, nyɛ de mi, anɛ nyɛ nui nɔ nɛ mlaa a de ɔ lo?

²² A ngma ke Abraham ngɛ bimɛ enyɔ, nɔ kake ɔ, e kɛ sɔmɔlɔyo ɔ lɛ fɔ; nɔ kake hu e kɛ odehe ɔ lɛ fɔ.

²³ Se jehanɛ ɔ, nɔ nɛ e kɛ sɔmɔlɔyo ɔ fɔ ɔ, a fɔ lɛ ngɛ he lo nya; se nɔ nɛ e kɛ odehe ɔ fɔ ɔ, a fɔ lɛ ngɛ si womi ɔ nya.

²⁴ Kikɛmɛ a nɔ́ nɛ ɔ, a kɛ buu abɛ. Yi nɛ ɔmɛ ji somi enyɔ ɔ nɛ; kake ɔ je Sinai yoku ɔ nɔ, nɛ nyɔguɛ yemi mi e fɔɔ woɔ; lɛ ji Hagar.

²⁵ Hagar ji Sinai yoku ɔ ngɛ Arabia; se e kɛ mwɔnɔmwɔnɔ Yerusalem ɔ tsa we nɔ, ejakaa e kɛ e bimɛ ɔmɛ ji nyɔguɛhi.

²⁶ Se hiɔwe Yerusalem ɔ ji odehe ɔ nɛ, nɔ nɛ ji wɔ kulaa wa nyɛ ɔ.

²⁷ Ejakaa sa ngma ke: “La nyami la, mo yosa nɛ o fɔ we; Nɛ o hwɔ lele kɛ bua jɔmi, mo nɛ o kɔɔ we; Ejakaa nɔ nɛ a kua lɛ ɔ mohu bimɛ maa hiɛ pe nɔ nɛ ngɛ huno ɔ po!”

²⁸ Jehanɛ, mamimɛ, wɔɔ lɛɛ Si womi ɔ bimɛ ji wɔ kaa Isak.

²⁹ Se kaa bɔ nɛ lɛ be ɔ mi hu, nɔ nɛ a fɔ lɛ ngɛ he lo nya a waa nɔ nɛ a fɔ lɛ ngɛ mumi nya a yi mi ɔ, jã nɔuu kɛ̃ e ngɛ mwɔnɔmwɔnɔ hu.

³⁰ Se kɛ ngmami ɔ de kɛɛ? “Fie sɔmɔlɔyo ɔ kɛ e bi ɔ, ejakaa e sɛ́ kaa nyɔguɛyo ɔ bi ɔ kɛ odehe ɔ bi ɔ nɛ ye gbo si ni ɔ.”

³¹ Lɔ ɔ he ɔ, mamimɛ, wa pi sɔmɔlɔyo ɔ bimɛ, se mohu odehe ɔ bimɛ ji wɔ.