Galatabi 2 - Somi He Ɔ

Paulo kɛ bɔfo kpa amɛ

¹ Kɛkɛ nɛ, lɔ ɔ se jeha nyɔngma kɛ eywiɛ sɔuu ɔ, i kɛ Barnaba kpale kɛ ya Yerusalem, nɛ i ngɔ Tito hu ngɔ piɛ ye he.

² I ya ngɛ kpo jemi ko nya, nɛ i kɛ sane kpakpa nɛ i ngɛ fiɛe ngɛ majeli ɔmɛ a kpɛti ɔ ya fɔ a hɛ mi, se titli ɔ nihi nɛ a buu mɛ ɔ a hɛ mi, benɛ pee nɛ fo nɛ i tuu ɔ aloo i ngɛ tue ɔ nɛ e ko pee yaka.

³ Se Tito tete nɛ e kɛ mi ngɛ nɛ e ji Hela no ɔ, a nyɛ́ we enɔ kaa a po lɛ,

⁴ ejakaa lakpa nyɛmimɛ komɛ ju si sɛ asafo ɔ mi kulɔɔ, konɛ a ba huɔ wa he nɛ wa ye ngɛ Kristo Yesu mi ɔ, konɛ a ye wɔ nyɔguɛ;

⁵ se mɛɛ lɛɛ wa kplɛɛ we nɛ waa bu mɛ tue ngmlɛfia kake tete, konɛ sane kpakpa a anɔkuale ɔ nɛ e hi si sɔkee ha nyɛ.

⁶ Se ninɛmɛ nɛ a buu mɛ kaa a ngɛ biɛ ɔ, — bɔ tsuaa bɔ nɛ a ngɛ sa a, pi ye he sane ko, Mawu hyɛ we nimli a hɛ mi, — ejakaa imi lɛɛ, ninɛmɛ nɛ a buu mɛ ɔ tsɔɔ we mi nɔ́ ko ngɔ piɛ we he;

⁷ se mohu, a na kaa a tu mɔmlɔtɔtsɛmɛ a kpɛti sane kpakpa a fiɛmi ngɔ wo ye dɛ, kaa bɔ nɛ a tu nɔ poli ɔmɛ a nɔ ɔ ngɔ wo Petro dɛ ɔ.

⁸ Ejakaa nɔ nɛ tsu ni ngɛ Petro mi nɛ e ha e ye bɔfo ngɛ nɔ poli ɔmɛ a kpɛti ɔ, lɛ nɔuu lɛ e tsu ni ngɛ imi hu ye mi ngɛ majeli ɔmɛ a kpɛti.

⁹ Benɛ a yo dloomi nɛ a kɛ ha mi ɔ, Yakobo kɛ Kefa kɛ Yohane nɛ a buu mɛ kaa titimahi ɔ, kɛ huɛ bɔmi hiɛ ɔ nine sa i kɛ Barnaba dɛ, konɛ wɔɔ lɛɛ waa ya majeli ɔmɛ a ngɔ nɛ mɛɛ lɛɛ a ya nɔ poli ɔmɛ a kpɛti;

¹⁰ se ohiafohi kɛkɛ a ke wa kai, kɔlɔ ɔ nɔuu he mɔde i bɔ kaa ma pee.

Paulo kã Kefa hɛ mi ngɛ Antiokia

¹¹ Se benɛ Kefa ba Antiokia a, i da e hɛ mi nɛ i kã e hɛ mi, ejakaa e nɔ be mi.

¹² Ejakaa loko ni komɛ maa je Yakobo ngɔ kɛ ba a, e kɛ majeli a bimɛ ɔmɛ yeɔ ni; se benɛ a ba a, e sã e he si, nɛ e tsɔ e he, ejakaa e ngɛ ninɛmɛ nɛ je nɔ poli ɔmɛ a kpɛti ɔ gbeye yee.

¹³ Nɛ Yudafohi nɛ piɛ ɔ hu kɛ lɛ pee jamɛ a osato ɔ, nɛ a gbla Barnaba tete ngɔ wo a sato peemi ɔ mi.

¹⁴ Se benɛ i na kaa a nyɛɛ we tutuutu ngɛ sane kpakpa a mi anɔkuale ɔ nya a, i de Kefa ngɛ mɛ kulaa a hɛ mi ke: “Ke mo nɛ o ji Yuda no ɔ, o peɔ o nihi kaa maje no se pi kaa Yuda no ɔ, mɛni he je o nyɛɛ majeli ɔmɛ a nɔ kaa a pee a nihi kaa Yudafohi ɔ?”

Hemi kɛ yemi a kɛ he Yudafohi kɛ majeli a yiwami

¹⁵ A fɔ wɔ Yudafohi, nɛ wa pi yayami peeli nɛ je majeli ɔmɛ a mi.

¹⁶ Se kɛ̃ ɔ, wa le kaa a wui nɔmlɔ nguɔ kɛ ji mlaa ni tsumihi a mi, kaa ja a gu Yesu Kristo nɔ hemi kɛ yemi ɔ kɛkɛ nɔ; enɛ ɔ he je ɔ, wɔ hu wa he Kristo Yesu nɔ ye, konɛ a wo wɔ nguɔ kɛ je Kristo nɔ hemi kɛ yemi mi, nɛ pi mlaa ni tsumihi a mi; ejakaa a be he lo ko he lo ko nguɔ woe kɛ je mlaa ni tsumihi a mi.

¹⁷ Jehanɛ, ke wɔ nɛ wa hlaa kaa a wo wɔ nguɔ ngɛ Kristo mi ɔ, a na wɔ kaa wɔ nitsɛmɛ hu yayami peeli ji wɔ ɔ, blɔɔ lɔ ɔ tsɔɔ kaa Kristo fiɔ yayami se lo? Pi ja!

¹⁸ Ejakaa ke nihi nɛ i kuɔ pueɔ si ɔ i kpaleɔ maa ekohu ɔ, blɔɔ i tsɔɔ ye he kaa nɔ tɔlɔ ji mi.

¹⁹ Ejakaa imi lɛɛ i gu mlaa a nɔ kɛ gbo ha mlaa a, konɛ ye hɛ nɛ hi ngmengmle ha Mawu.

²⁰ A sɛu mi kɛ Kristo; he je ɔ pi imi nɛ ye hɛ ngɛ hu, se Kristo lɛ hɛ ngɛ ngɛ ye mi; se ye hɛ nɛ ngɛ ngɛ he lo mi jehanɛ ɔ, Mawu Bi ɔ nɛ suɔ mi nɛ e ngɔ e he ngɔ ha ngɛ ye he ɔ nɔ hemi kɛ yemi mi ye hɛ ngɛ ngɛ.

²¹ I kua we Mawu dloomi ɔ, ejakaa, ke mlaa nɔ dami guu kɛ baa a, lɛɛ Kristo gbo yaka gu.