Galatabi 1 - Somi He Ɔ

¹ Paulo nɛ ji bɔfo nɛ pi nimli nɛ wo lɛ, nɛ pi nɔmlɔ ko nɔ hu nɛ e gu, se mohu, Yesu Kristo kɛ Tsɛ Mawu nɛ tle lɛ si kɛ je gbeje ɔ, nɔ e gu ɔ,

² kɛ nyɛmimɛ ɔmɛ kulaa nɛ kɛ mi ngɛ ɔ, ngma ya ha Galata asafo ɔmɛ:

³ Dloomi kɛ he jɔmi nɛ je Tsɛ Mawu ɔ kɛ wa Nyɔmtsɛ Yesu Kristo dɛ mi ɔ ha nyɛ;

⁴ nɔ nɛ ngɔ lɛ nitsɛ e he ngɔ ha ngɛ wa he yayami ɔmɛ a he, konɛ e je wɔ kɛ je je yaya nɛ ngɛ mwɔnɛmwɔnɛ nɛ ɔ mi ngɛ Mawu kɛ wa Tsɛ ɔ suɔmi nya;

⁵ nɔ nɛ nɔ́ nɛ ji hɛ mi nyami ɔ kɛ je neneene kɛ yaa neneene ɔ! Amen.

Sane Kpakpa kake ɔ

⁶ Ye hɛ mi pee mi yaa kaa amlɔ nɛ ɔ nɔuu ɔ nyɛ ngɛ nyɛ he tsɔe kɛ ngɛ nɔ nɛ tsɛ nyɛ ngɛ Kristo dloomi ɔ nya a he jee kɛ yaa sane kpakpa kpa ko he;

⁷ nɛ kɛ ɔ, ekpa ko be, mohu ni komɛ ngɛ nɛ ngɛ nyɛ yi mi puee, nɛ a ngɛ hlae kaa a plɛ Kristo sane kpakpa a hɛ mi ngɔ bu si.

⁸ Se ke wɔ po, loo bɔfo nɛ je hiɔwe tete, ba ba jaje sane kpakpa kpa ko tsɔɔ nyɛ, ngɛ nɔ́ nɛ wa jaje tsɔɔ nyɛ nɛ ɔ se ɔ, jamɛ a tsɛ ɔ e pee musutsɛ!

⁹ Kaa bɔ nɛ wa de momo ɔ, ja nɔuu i ngɛ dee ekohu ke: Ke nɔ ko ba ba jaje sane kpakpa kpa ko tsɔɔ nyɛ ngɛ nɔ́ nɛ nyɛ he nɛ ɔ se ɔ, jamɛ a tsɛ ɔ e pee musutsɛ!

¹⁰ Blɔɔ jehanɛ nimli a hɛ mi i ngɛ hlɛe nɛ ma sa loo Mawu? Aloo i ngɛ nimli a hɛ mi hlae ma sa? Ejakaa ke i ngɛ nɔ ngɛ nimli a hɛ mi sae kɛ mwɔɔ ɔ, lɛɛ pi Kristo tsɔlɔ ji mi.

Bɔ nɛ pee nɛ Paulo plɛ bɔfo

¹¹ Se i ngɛ hae nɛ nyɛɛ le, mamimɛ, kaa sane kpakpa nɛ i jaje ɔ, pi nimli a nya nɛ e je.

¹² Ejakaa pi nɔmlɔ ko dɛ mi nɛ i na kɛ je, nɛ pi tsɔɔmi hu nɛ a tsɔɔ mi; se mohu Yesu Kristo kpo jemi nya i na ngɛ.

¹³ Ejakaa nyɛ nu ye sa je mi bami he ngɛ Yudafohi a jami ɔ mi, bɔ nɛ i wa Mawu asafo ɔ yi mi babauu nɛ i kpata e hɛ mi,

¹⁴ nɛ i pã wa juahi fuu ngɛ Yudafohi a jami ɔ mi ngɛ ye wɛli a kpɛti, nɛ ye hɛ dɔ wawɛɛ ngɛ wa tsɛmɛ a blema sanehi nɛ a kɛ ha wɔ ɔmɛ a he.

¹⁵ Se benɛ e sa Mawu nɛ je mi to kɛ je maa muklii mi lokoo nɛ e kɛ e dloomi ɔ tsɛ mi kɛ ba a hɛ mi,

¹⁶ kaa e ma je lɛ nitsɛ e bi ɔ kpo ngɛ ye mi, konɛ ma jaje e he sane kpakpa a ngɔ tsɔɔ ngɛ majeli ɔmɛ a kpɛti ɔ, amlɔ ɔ, i kɛ he lo kɛ muɔ yɛ he dami,

¹⁷ nɛ jehanɛ i yɛ́ Yerusalem hu ngɛ nihi nɛ ji bɔfohi loko ji imi hu i ba plɛ bɔfo ɔmɛ a ngɔ, se mohu i pue nɔ kɛ ho Arabia ya, nɛ lɔ ɔ se ɔ, i kpale ye se kɛ ba Damasko ekohu.

¹⁸ Kɛkɛ nɛ lɔ ɔ se jeha etɛ ɔ, i ya Yerusalem nɛ i kɛ Petro ya sɛɛ ni, nɛ i hi e ngɔ ligbi nyɔngma kɛ enuɔ.

¹⁹ I nɛ bɔfo ɔmɛ a ti nɔ kpa ko kaa ja Yakobo, Nyɔmtsɛ ɔ nyɛmi ɔ.

²⁰ Nihi nɛ i ngɛ nyɛ ngmae nɛ ɔ, oʼɛ, Mawu hɛ mi i ngɛ dee ngɛ, i yi lakpa.

²¹ Lɔ ɔ se ɔ, i ba Siria kɛ Kilikia ni ɔmɛ a mi.

²² Se nɛ i ngɛ nɛ ɔ, a li ye hɛ mi ngɛ Yudea Kristo asafo ɔmɛ a mi;

²³ se mohu a nuɔ kɛkɛ kaa nɔ nɛ wa wɔ yi mi sa a, jehanɛ e ngɛ hemi kɛ yemi nɛ sa nɛ e kpata hɛ mi ɔ he sane kpakpa a jajee kɛ ngɛ tsɔɔe;

²⁴ nɛ a wo Mawu hɛ mi nyami ngɛ ye he.