Filipibi 4 - Somi He Ɔ

Nyagbe gawomi

¹ Lɔ ɔ he ɔ, mamimɛ nɛ i suɔ nɛ ye hɛ jaa ngɛ nyɛ he, ye bua jɔmi kɛ ye jlasi, nyɛɛ da si ja ngɛ Nyɔmtsɛ ɔ mi, nyɛ nihi nɛ i suɔ.

² I ngɛ Evodia ga woe, nɛ i ngɛ Sintika hu ga woe kaa a juɛmi nɛ pee kake ngɛ Nyɔmtsɛ ɔ mi.

³ Nɛ mo hu, i kpa mo pɛɛ, ye huɛ sɔmɔlɔ kpakpa, kaa o ye bua yi nɛ ɔmɛ nɛ kɛ mi tsu sane kpakpa a he ni ɔ, kɛ Klemente hu kɛ ye huɛmɛ ni tsuli kpahi nɛ a biɛ ngɛ wami womi ɔ mi ɔ.

⁴ Nyɛ bua nɛ jɔ ngɛ Nyɔmtsɛ ɔ mi daa! Nɛ ma de ekohu ke: Nyɛ bua nɛ jɔ!

⁵ Nyɛ mi mi jɔmi ɔ nyɛ ha nimli kulaa nɛ le! Nyɔmtsɛ ɔ su si ta.

⁶ Nyɛ ko hao ngɛ nɔ́ ko nɔ́ ko he, se mohu nɔ tsuaa nɔ mi ɔ, nyɛɛ kɛ sɔlemi kɛ pɛɛ kpami kɛ sina nɛ wo nyɛ hiami ni ɔmɛ a ta ngɛ Mawu hɛ mi;

⁷ nɛ Mawu he jɔmi nɛ pe juɛmi kulaa a maa bu nyɛ tsuihi kɛ nyɛ juɛmi ɔmɛ a he ngɛ Kristo Yesu mi!

⁸ Nyagbe ɔ, mamimɛ, nihi nɛ da, nihi nɛ sa bu, nihi nɛ hi, nihi nɛ he tsɔ, nihi nɛ a suɔ, nihi nɛ ngɛ biɛ kpakpa amɛ kulaa, ke je mi bami kpakpa ko ngɛ, ke yi jemi ko hu ngɛ ɔ, enɛ ɔmɛ a he nyɛ susu!

⁹ Nihi hu nɛ nyɛ kase nɛ nyɛ pɛtɛ he nɛ nyɛ nu nɛ nyɛ na ngɛ ye he ɔ, kɔlɔ ɔmɛ nɔuu nyɛɛ pee, nɛ he jɔmi Mawu ɔ kɛ nyɛ maa hi si.

Nike ni he sina

¹⁰ I na bua jɔmi babauu ngɛ Nyɔmtsɛ ɔ mi kaa jehanɛ nyɛ ya nɔ ekohu ngɛ ye he susumi mi; nyɛ susu ye he lɛɛ, se he blɔ nɛ nyɛ ya na we.

¹¹ Pi kaa fimi nya nɛ i ngɛ munyu tue nɛ ɔ, ejakaa imi lɛɛ i kase kaa si himi tsuaa si himi nɛ i ngɛ mi ɔ ye bua nɛ jɔ ye he.

¹² I le ohia mi si himi, nɛ i le ni kpɔtɔɔ mi si himi hulɔ; i gblee nɔ́ tsuaa nɔ́ kɛ nihi kulaa mi, tɔ jio, huɔ jio, ni nami jio, ohia jio,

¹³ I nyɛɔ nihi kulaa peɔ ngɛ kristo, nɔ nɛ woɔ ni he wami ɔ mi.

¹⁴ Se kɛ̃ ɔ nyɛ pee saminya kaa nyɛ ba ye bua mi ngɛ ye nɔ nami ɔ mi.

¹⁵ Jehanɛ nyɛ Filipibi ɔmɛ nitsɛmɛ hu ɔ, nyɛ le kaa sane kpakpa a sisi jemi mi, benɛ i pue nɔ kɛ je Makedonia a, asafo ko be nɛ kɛ mi bɔɔ huɛ ngɛ nɔ́ hami kɛ hemi blɔfami kaa ja nyɛ kɛkɛ;

¹⁶ ejakaa benɛ i ngɛ Tesalonika a hu ɔ, nyɛ mane mi nihi nɛ hiaa mi ɔmɛ si kake kɛ si enyɔ kulaa.

¹⁷ Pi kaa nike ni i ngɛ hlae, se mohu i ngɛ se nami nɛ ma ha nyɛ kɔtaa a maa su kɛ be nɔ ha nyɛ ɔ hlae.

¹⁸ I na nihi kulaa kɛ be nɔ, i tɔ kɛ nihi nɛ nyɛɛ kɛ mane Epafrodito kɛ ba ha mi ɔ nɛ ji via jemi kpakpa kɛ bɔ nɛ sa Mawu hɛ mi ɔ.

¹⁹ Ye Mawu ɔ ma ha nyɛ nihi kulaa nɛ hiaa nyɛ ɔ ngɛ e hɛ mi nyami hiɛmi ɔ nya, ngɛ Kristo Yesu mi.

²⁰ Anuminyami ha wa Tsɛ Mawu ɔ kɛ yaa neneene kɛ neene. Amen.

Nyagbe sɛyemi

²¹ Nyɛ nga he tsɔlɔ tsuaa he tsɔlɔ ngɛ Kristo Yesu mi. Nyɛmimɛ nɛ kɛ mi ngɛ ɔ ke a biɔ nyɛ.

²² He tsɔli ɔmɛ kulaa, se titli ɔ, ninɛmɛ nɛ je Kaisare we ɔ, ke a biɔ nyɛ.

²³ Wa Nyɔmtsɛ Yesu Kristo dloomi ɔ kɛ nyɛ mumi ɔ nɛ hi si! Amen.