Filipibi 3 - Somi He Ɔ

Anɔkuale dami

¹ Nɛ nyagbe ɔ, mamimɛ, nyɛ bua nɛ jɔ ngɛ Nyɔmtsɛ ɔ mi! Pɔ tɔɛ ye he kaa ma ngma nyɛ ni nɛ ɔmɛ ekohu, ejakaa nyɛɛ lɛɛ e haa nyɛ fiɔɔ si.

² Nyɛɛ hyɛ saminya ngɛ gbe ɔmɛ a he. Nyɛɛ hyɛ saminya ngɛ ni tsuli yaya amɛ a he, nyɛɛ hyɛ saminya ngɛ nɔ pomi he!

³ Ejakaa wɔ ninɛmɛ nɛ wa jaa Mawu ngɛ mumi nya, nɛ waa kɛ wa hɛ fɔɛ he lo nɔ, se Kristo Yesu nɔ mohu wa fiaa ngɔ fɔɔ ɔ, wɔ mohu ji ninɛmɛ nɛ a po mɛ ɔ nɛ.

⁴ Pohu imi hu i ngɛ nɔ ko ngɛ he lo blɔfami nɛ jinɛ i kɛ ye hɛ maa fɔ nɔ. Ke e peɔ nɔ ko kaa e ngɛ nɔ́ ko nɛ e ngɔɔ e hɛ ngɔ fɔɔ nɔ ngɛ he lo blɔfami ɔ, ye nɔ ɔ pe.

⁵ Ligbi nɛ ji ligbi kpaanyɔ ɔ nɔ a po mi, Israel fɔfɔɛ kɛ Benyamin wetso ɔ mi no ji mi, Hebri no mi Hebri no, nɛ Mlaa a nya a Farisifo no hulɔ,

⁶ mɔde bɔmi blɔfami ɔ, asafo ɔ yi mi walɔ ji mi, nɛ dami ngɛ Mlaa a nya a, piami ko be ye he.

⁷ Se kɛ ɔ, nihi nɛ ji senami ha mi sa a, i bu kɔlɔ ɔmɛ kaa nihi nɛ laa ngɛ Kristo he.

⁸ Niinɛ kaa i buu lɛ tsuo kaa nihi nɛ laa ngɛ Kristo Yesu, ye Nyɔmtsɛ ɔ, he ni lemi nɛ pe kulaa a he, lɛ e he nɛ nihi kulaa bɔ mi, nɛ i buu mɛ kaa kuku nɔ nihi, konɛ Kristo mohu nɛ pee ye nɔ,

⁹ nɛ a na mi ngɛ e mi kaa i be imi nitsɛ ye dami nɛ je Mlaa mi, se mohu nɔ́ nɛ gu Kristo nɔ hemi kɛ yemi nɔ nɛ ji dami nɛ je Mawu dɛ mi ngɛ hemi kɛ yemi nya a i ngɛ,

¹⁰ nɛ ma le lɛ kɛ e si temi ɔ he wami ɔ kɛ e manehlu ɔmɛ a mi huɛ bɔmi ɔ, nɛ ma pee kaa lɛ ngɛ e gbenɔ ɔ blɔfami,

¹¹ kaa alinɔ, ye nine maa su ni gbogboehi a si temi ɔ nɔ lo.

Paulo kunimi yemi

¹² Pi kaa ye nine su nɔ momo aloo i hi kɛ pi si mo, se mohu i ngɛ fo tue konɛ ye nine nɛ su nɔ, ligbi abɔ nɛ Kristo Yesu nine su imi hu ye nɔ ɔ.

¹³ Mamimɛ, i bui ye he kaa ye nine su nɔ, se nɔ́ nɛ ma de ji: nihi nɛ ngɛ se blɔ ɔ, i ngɛ ye hɛ jee ngɛ nɔ, se nihi nɛ ngɛ hɛ kpɛ ɔ a he mohu i ngɛ plee,

¹⁴ nɛ i ngɛ fo tue kɛ yaa hɛ kpɛ kɛ maa su Mawu tsɛmi nɛ je hiɔwe ngɛ Kristo Yesu mi ɔ jlasi ɔ he.

¹⁵ Lɔ ɔ he ɔ, wa kpɛti nihi abɔ nɛ hi kɛ pi si ɔ, nyɛ ha waa hɛɛ kikɛmɛ a juɛmi nɛ ɔ; nɛ ke nɔ ko ngɛ nɛ susuu lɛ ekpa a, Mawu ma je kɔlɔ ɔ hu kpo ngɔ tsɔɔ nyɛ.

¹⁶ E he hia kaa waa ya wa hɛ mi ngɛ nɔ́ nɛ wa nine su nɔ mo ɔ mi nɛ waa nyɛɛ ngɛ jamɛ a susumi kpa a nɔuu nya nɛ wa susu nɔ kake.

¹⁷ Mamimɛ, nyɛɛ kase mi, nɛ nihi nɛ nyɛɛ bɔ nɛ wa toɔ nyɛ okadi ɔ, nyɛɛ hyɛ mɛ.

¹⁸ I de nyɛ enɛ ɔ si abɔ, nɛ jeha nɛ ɔ hu i kɛ vo nyu ngɛ dee, ke Kristo sɛumi tso ɔ henyɛli ji mɛ.

¹⁹ Mɛɛ lɛɛ a nyagbe ji hɛ mi kpatami, nɛ a muklii ji a mawu, nɛ a zo nihi a mi a hɛ mi nyami ngɛ, nɛ je mi nihi a he kɛkɛ a susuu.

²⁰ Se wɔɔ lɛɛ wa ma a hiɔwe e ngɛ, he nɛ wa hyɛɛ yi wami helɔ nɛ ji Mawetsɛ Yesu Kristo ɔ blɔ kɛ jee ɔ,

²¹ nɔ nɛ ma tsake wa nɔmlɔ tso nɛ hɛ mi be nyami ɔ, konɛ e pee kaa e numinyami nɔmlɔ tso ɔ su, ngɛ e he wami ni tsumi nɛ ekɛ nyɛɛ ngɔɔ nihi kulaa ngɔ toɔ e sisi hu ɔ nya a.