Filipibi 2 - Somi He Ɔ

Kristo hesibami kɛ e gbojemi

¹ Lɔ ɔ he ɔ, ke Kristo mi munyu tumi kɛ tsɔɔmi ko ngɛ ke suɔmi bua womi ko ngɛ, ke mumi mi huɛ bɔmi ko ngɛ, ke muklii mi sami kɛ mɔbɔ nami ko ngɛ ɔ,

² nyɛ ha ye bua jɔmi ɔ nɛ hyi tɔ, kaa nyɛ hɛɛ susumi kake, nyɛ hɛɛ suɔmi kake, klaa kake, juɛmi kake.

³ Nyɛ ko ngmɛ mi gbami loo yaka hɛ mi nyami hlami blɔ, se mohu nyɛɛ kɛ he si bami juɛmi nɛ bu nyɛ sibi pe nyɛ nitsɛmɛ nyɛ he;

⁴ nyɛ ti nɔ tsuaa nɔ nɛ ko fo e nɔ mi, se e fo e nyɛmi nɔ mi.

⁵ Juɛmi nɛ ngɛ Kristo Yesu mi ɔ, kɔlɔ ɔ nɔuu nɛ pee nyɛ hu nyɛ juɛmi,

⁶ nɔ nɛ Mawu su ɔ mi e ngɛ mohu, se e bui sɔmi nɛ e kɛ Mawu sɔ ɔ kaa nɔ́ ko nɛ sa kaa e pɛtɛ he wawɛɛ;

⁷ se mohu e kpa ngɛ e he ngɔ fɔ si, e ngɔ sɔmɔlɔ su ngɔ fɔ e nɔ, e plɛ kaa nɔmlɔ, nɛ e si himi blɔfami hu a na lɛ kaa nɔmlɔ.

⁸ E ba e he si nɛ e bu tue kɛ ya gbenɔ mi, kɛ ya sɛumi tso nɔ gbenɔ mi tete.

⁹ Enɛ ɔ he hulɔ nɛ Mawu wo e nɔ gojoo nɛ e dloo lɛ biɛ nɛ pa biɛ tsuaa biɛ,

¹⁰ konɛ ninɛmɛ nɛ ngɛ hiɔwe kɛ ninɛmɛ nɛ ngɛ zugba a nɔ kɛ ninɛmɛ nɛ ngɛ zugba a sisi ɔ a ti nɔ tsuaa nɔ nakutso nɛ kpla si ha Yesu biɛ ɔ,

¹¹ nɛ lilɛ tsuaa lilɛ nɛ jaje paa ke Yesu Kristo ji Nyɔmtsɛ kɛ wo Tsɛ Mawu ɔ hɛ mi nyami.

Lakpɛmi ngɛ je ɔ mi

¹² Lɔ ɔ he ɔ, mamimɛ, kaa bɔ nɛ nyɛ buɔ tue daa nɛ ɔ, pi benɛ i kɛ nyɛ ngɛ ɔ kɛkɛ, se mohu titli ɔ, jehanɛ nɛ i be nyɛ ngɔ nɛ ɔ hu ɔ, nyɛɛ kɛ gbeye yemi kɛ he domi nɛ tsu nyɛ nitsɛmɛ nyɛ yi wami hemi ɔ he ni,

¹³ ejakaa suɔmi nɛ a maa suɔ jio, peemi nɛ a maa pee jio, Mawu ji nɔ nɛ tsuɔ lɛ tsuo ngɛ nyɛ mi ngɛ e suɔmi nya.

¹⁴ Nyɛɛ pee nyɛ nihi kulaa nɛ munyu huitihuiti kɛ nɔ jemi ko ba mi;

¹⁵ konɛ nyɛ he ko hi piami, nɛ nyɛɛ pee he tsɔli, Mawu bimɛ nɛ a he be piami ko ngɛ yi nɔ kpɛkpɛɛ nɛ be e jebo nɔ nɛ ɔ mi, nihi a kpɛti nɛ nyɛ tsoo kaa kane ngɛ je nɛ ɔ mi,

¹⁶ nɛ nyɛɛ hɛɛ wami munyu ɔ mi, konɛ e plɛ fiami nɔ ha mi ngɛ Kristo ligbi ɔ nɔ, kaa ye fotumi ɔ pee we yaka, nɛ ye dengme gbomi ɔ hu pee we gu.

¹⁷ Se ke a plɛ ye muɔ ngɔ pue nyɛ hemi kɛ yemi bɔ kɛ jami ɔ nɔ po ɔ, i ngɛ he tsui nɛ i kɛ nyɛ tsuo ma na bua jɔmi;

¹⁸ ja nɔuu kɛ nyɛ hu nyɛ bua nɛ jɔ nɛ nyɛɛ kɛ mi nɛ na bua jɔmi.

Timoteo kɛ Epafrodito

¹⁹ Ye hɛ ngɛ nɔ ngɛ Mawetsɛ Yesu mi kaa e be kɛe nɛ ma tsɔ Timoteo kɛ ba nyɛ ngɔ, konɛ ke i nu bɔ nɛ nyɛ ngɛ ɔ, nɛ imi hu ma na tsui.

²⁰ Ejakaa i be nɔ ko nɛ e juɛmi kɛ ye juɛmi sɔ nɛ nyɛ he sane dɔɔ lɛ nitsɛnitsɛ kaa lɛ;

²¹ ejakaa ni ɔmɛ kulaa a, mɛ nitsɛmɛ a nihi a he a pleɔ, se pi Kristo Yesu nihi.

²² Se nyɛ le e ni tsumi, kaa e kɛ mi sɔmɔɔ ngɛ sane kpakpa a he kaa bi kɛ e tsɛ.

²³ Lɔ ɔ he ɔ ye hɛ ngɛ nɔ kaa ke i na ye sane ɔ nya pɛ ɔ, ma tsɔ lɛ kɛ ba nyɛ ngɔ.

²⁴ Se ye hɛ ngɛ Nyɔmtsɛ ɔ nɔ, kaa imi nitsɛ hu, e be kɛe nɛ ma ba.

²⁵ Se kɛ ɔ, i susu kaa e hia kaa ma tsɔ wa nyɛmi Epafrodito, nɛ ji ye huɛ ni tsulɔ kɛ ta bulɔ kɛ nyɛ tsɔlɔ kɛ ye hia a he sɔmɔlɔ ɔ kɛ ba nyɛ ngɔ,

²⁶ ejakaa e hɛ ngɛ jae ngɛ nyɛ tsuo nyɛ he, nɛ akɛnɛ nyɛ nu kaa e be he wami he je ɔ, e ngɛ haoe.

²⁷ E ngɛ mi kaa e nu hiɔ wawɛɛ, nɛ piɛ bɔɔ nɛ e ko gbo, se kɛ ɔ Mawu na lɛ mɔbɔ, nɛ pi lɛ kɛkɛ, se mohu imi hu, konɛ ma ko ye kɔmɔ ngɔ to kɔmɔ nɔ.

²⁸ Lɔ ɔ he titli nɛ i bɔ mɔde tsɔ lɛ ɔ nɛ, konɛ ke nyɛ na lɛ ekohu ɔ, nɛ nyɛ na bua jɔmi nɛ imi hu ma ko ye kɔmɔ tsɔ.

²⁹ Lɔ ɔ he ɔ nyɛ he lɛ hɛmuɔ ngɛ Nyɔmtsɛ ɔ mi, kɛ bua jɔmi babauu, nɛ nyɛɛ bu kikɛmɛ a nimli nɛ ɔmɛ kaa nihi nɛ sa bumi;

³⁰ ejakaa Kristo ni tsumi ɔ he ɔ, e su gbenɔ he tataata, nɛ e sake e wami ngɔ fɔ he, konɛ e kɛ gbe nɔ́ nɛ piɛ ha nyɛ ngɛ sɔmɔmi nɛ nyɛɛ kɛ ma sɔmɔ mi ɔ nya.