Filipibi 1 - Somi He Ɔ

¹ Paulo kɛ Timoteo, Yesu Kristo sɔmɔli ɔmɛ, ngma ya ha ni klɔuklɔuhi nɛ ngɛ Yesu Kristo mi ngɛ Filipi kɛ a nɔ hyɛli kɛ a sɔmɔli ɔmɛ kulaa:

² Dloomi kɛ he jɔmi nɛ je wa Tsɛ Mawu kɛ Mawetsɛ Yesu Kristo dɛ mi ɔ ha nyɛ!

Paulo pɛɛ kpami kɛ ha e womi ɔ kaneli

³ I naa ye Mawu ɔ si be tsuaa be nɛ e kaii nyɛ,

⁴ ngɛ ye daa pɛɛ kpamihi tsuo nɛ i kpaa ngɔ haa nyɛ kulaa a mi, nɛ i kɛ bua jɔmi kpaa pɛɛ

⁵ ngɛ wa he nɛ nyɛ piɛɔ ngɛ sane kpakpa a fiɛmi mi kɛ je kekleekle ligbi ɔ nɔ kɛ ba su amlɔ nɛ ɔ he;

⁶ i ngɔ ye hɛ ngɔ fɔ enɛ ɔ nɔuu nɔ, kaa nɔ nɛ bɔni ni tsumi kpakpa ngɛ nyɛ mi ɔ, lɛ nɔuu e ma tsa nɔ kɛ maa su e maa gbe nya ngɛ Yesu Kristo ligbi ɔ nɔ.

⁷ E sa kaa ma susu enɛ ɔ ngɛ nyɛ kulaa nyɛ he, ejakaa i suɔ nyɛ, ejakaa benɛ a wo mi tsu mi ngɛ sane kpakpa a he ɔ, i kɛ nyɛ tsuo na Mawu dloomi ɔ eko.

⁸ Mawu ji ye dase kaa ye hɛ jaa ngɛ nyɛ kulaa nyɛ he ngɛ Yesu Kristo mi mi sami ɔ nya.

⁹ Enɛ ɔ he pɛɛ i kpaa kaa, nyɛ suɔmi ɔ nɛ hiɛ kɛ ya nɔ, nɛ e be nɔ pe kekle ɔ ngɛ ni lemi kɛ nɔ se kɔmi tsuo blɔfami, nɛ nyɛ yo nihi nɛ hi nitsɛ,

¹⁰ konɛ nyɛɛ hi klɔuu nɛ piami ko ko hi nyɛ blɔfami kɛ yaa su Kristo ligbi ɔ nɔ,

¹¹ nɛ dami yiblii nɛ a woɔ ngɛ Yesu Kristo mi ɔ nɛ hyi nyɛ tɔtɔɔtɔ kɛ ha Mawu hɛ mi nyami womi kɛ yi jemi.

Kristo ji wami

¹² Se, mamimɛ, i suɔ kaa nyɛɛ le kaa sanehi nɛ ba ye nɔ ɔ ha sane kpakpa a ya nɔ mohu,

¹³ nɛ e ha ye tsu mi womi ngɛ Pretorio (Kaisare aslaafohi a mɔ) ɔ mi ngɛ Kristo he ɔ pee nɔ́ nɛ nihi kulaa le.

¹⁴ Nyɛmimɛ nɛ ngɛ Nyɔmtsɛ ɔ mi ɔ a ti nihi fuu gu ye tsu mi womi ɔ nɔ na kã babauu pe kekle ɔ kɛ ngɛ Mawu munyu ɔ jajee nɛ a yi gbeye.

¹⁵ Ni komɛ lɛɛ ninye kɛ hluɛnu he a fiɛɔ Kristo ɔ nɛ; se ni komɛ hu kɛ juɛmi kpakpa fiɛɔ.

¹⁶ Ni nɛ ɔmɛ jee suɔmi mi kɛ fiɛɔ, ejakaa a le kaa sane kpakpa a he fami he je nɛ i fɔɔ si ngɛ hiɛ ɔ nɛ;

¹⁷ se ni kpa komɛ ɔ, hluɛnu mi a jee kɛ fiɛɔ Kristo, nɛ pi fiɛmi nitsɛ ʼi, se mohu a juɛmi ji kaa a kɛ dengme maa piɛ ye tsu mi womi ɔ he.

¹⁸ Lɔ ɔ he ɔ mɛni? Bɔ tsuaa bɔ nɛ pee ɔ, lakpa tomi nya jio, anɔkuale nya jio, Kristo kɛ̃ a ngɛ fiɛe ɔ nɛ; nɛ enɛ ɔ he je ɔ, i ngɛ bua jɔmi. Nɛ jehanɛ hu ma na bua jɔmi.

¹⁹ Ejakaa i le kaa enɛ ɔ ma plɛ ye yi wami hemi ngɛ nyɛ pɛɛ kpami kɛ Yesu Kristo Mumi ɔ yemi kɛ buami nya,

²⁰ ngɛ ye blɔ hyemi kɛ hɛ kɛ nɔ fɔmi ɔ nya, kaa zo be mi gbee ngɛ nɔ́ ko nɔ́ ko mi, se mohu, bɔ nɛ a peɔ daa a, jã jehanɛ hu a kɛ kã tsuo maa wo Kristo hɛ mi nyami ngɛ ye nɔmlɔ tso mi, ngɛ wami mi jio, gbenɔ mi jio.

²¹ Ejakaa imi lɛɛ Kristo ji ye wami, nɛ gbenɔ ɔ ye se nami ʼi.

²² Se ke he lo mi wami nɛ ɔ nɔuu haa ye ni tsumi woɔ yiblii ɔ, lɛɛ i li e mi nɔ́ nɛ ma ngɔ;

²³ i ngɛ haoe ngɛ ni enyɔ nɛ ɔmɛ a he: I ngɛ hlae nɛ ma je je nɛ ɔ mi nɛ i kɛ Kristo ya hi si, ejakaa kɔlɔ ɔ hi hluu.

²⁴ Se nyɛ he ɔ, he lo mi si himi nɛ ɔ he hia pe kɔlɔ ɔ.

²⁵ I ngɛ enɛ ɔ nɔ mi mami kaa i kɛ nyɛ maa hi si nɛ ma piɛ nyɛ he nɛ nyɛɛ ya hɛ mi, konɛ nyɛ hemi kɛ yemi ɔ nɛ fu, nɛ nyɛ na bua jɔmi ngɛ mi,

²⁶ konɛ nyɛ mimifliimi ɔ nɛ hiɛ kɛ be nɔ ngɛ Kristo Yesu mi, ngɛ ye he, ngɛ kpe nɛ i kɛ nyɛ maa kpe ekohu ɔ he.

²⁷ Jehanɛ ngɛ nyɛ ma sane blɔfami ɔ, nyɛɛ ba nyɛ je mi sbɔ nɛ sa Kristo sane kpakpa a kɛkɛ, konɛ, ke i ba ba na nyɛ jio, i kɛ nyɛ be jio, ma nu nyɛ he kaa nyɛ daa si ngɛ mumi kake mi, nɛ nyɛɛ kɛ juɛmi kake ngɛ sane kpakpa a hemi kɛ yemi ɔ he plee.

²⁸ Nɛ nyɛ ko ha nɛ henyɛli ɔmɛ nɛ wo nyɛ he gbeye ngɛ nɔ́ ko nɔ́ ko mi, kɔlɔ ɔ nɔuu ji hɛ mi kpatami okadi ha mɛ, se nyɛɛ lɛɛ, e ji yi wami hemi okadi ha nyɛ, nɛ enɛ ɔ je Mawu dɛ mi.

²⁹ Ejakaa nyɛɛ lɛɛ a dloo nyɛ ngɛ Kristo he, pi ngɛ e nɔ hemi kɛ yemi mi kɛkɛ, se mohu kaa nyɛ na nɔ ngɛ e he hulɔ,

³⁰ nɛ jamɛ a pleemi kake ɔ nɔuu nɛ nyɛ na ngɛ ye he nɛ jehanɛ hu nyɛ nuɔ ngɛ ye he ɔ mi i ngɛ nɛ ɔ nɛ.